1Gij mona ongga sismeni eteb fob bera Allah anggot mar ofoukou skoita mifmin mimower. Ofa anggot mar koma oisouska mar ongga Ofa oncunc gu efen nabi-nabi gij rudou efesi. Noba Ofa era efen moroju ongga erek ofoukou jeskaseda oroftuftu rot efen oga gu nabi-nabi insa koma. Beda rua rifesij rot mar insa koma gu rusnok enjgineg.
2Erek koma tina, gij mona ongga enja ejgwaga insa kef bera Ofa anggot mar skoita mimif oisouska efen efesa Yesus Kristus. Noba oisouska Yesus Kristus bera Allah ontunggom mar nomnaga. Noba Ofa bera ongga Allah oncunc jeskaseda eja erek ebirfaga ongga ofoka aksa egens rot mar nomnaga tein.
3Ofa bera ongga orocunc erek jeni rot Allah efen ofoka ongga aksa eteb noba ongga eskeira eteb tein. Noba Ofa bera ongga otunggom mar nomnaga jeni erek Allah otunggom mar tein. Noba oisouska efen oga bera Ofa agei joug mar nomnaga rot owesa efek eteb tein. Noba gij mona ongga Ofa aha esinsa jeskaseda agos tumu mega salib, beda Ofa onsuna rot rusnok rerin mar ongga oska nomnaga fob. Beda Ofa eja eker desi Allah gu mebaga. Beda jah suma bera Ofa ofoka ereij keingg mar nomnaga oisouska efen owesa erek eteb morototuma jera Allah ongga efen ofoka aksa eteb tein.
4Erek koma jefeda Allah oncunc rot oida Yesus bera efen ofoka ongga aksa ekirsa jeska malaikat-malaikat tein. Noba koma bera ongga orocunc rot oida Ofa efen owesa efek ongga ekirsa jeska malaikat-malaikat nomnaga tein.
5Erek koma jeska gij Mar Efeyi Ebsi bera Allah enagot gu malaikat-malaikat rot mar insa kef guru. Ofa agot oida, "Deisef bera Didif dagot rot tomnomna oida Bua bera dedin edesa noba Didif bera erek bebin mekeb."
6Ofa agot mar insa koma osok gij Yesus Kristus ojgomu. Jeska nou ongga Ofa omobk Yesus jah gu mebif, beda rusnok runggu gij Mar Efeyi Ebsi rot sismeni oida, "Allah efen malaikat-malaikat nomnaga bera rugif gu Ofa ojgomu."
7Noba mimif mijginaga rot oida Yesus ofoka bera aksa ekirsa jeska malaikat-malaikat, jeska rusnok runggu gij Mar Efeyi Ebsi oida, "Malaikat-malaikat ongga Allah obk bera erek mof eteb. Ofa obk malaikat-malaikat koma ongga rumfij Ofa erek mah eisa egigir eteb."
8Tina runggu gij Mar Efeyi Ebsi osok gij mar egens mar enjgineg deika ongga Allah anggot rot efen efesa Yesus erek kef oida, "Edesa, Bua bera bufoka ereij keingg mar nomnaga nou mona ongga ah aibin ojgomuja. Noba Bua bufoka ereij keingg mar nomnaga rot budou efesi ongga aharukamoka ojgomu tein.
9Bua budou okora rot rusnok ongga runotunggom mar ongga oska oskiyai tein guru. Noba Bua bukoja rusnok nomnaga ongga rutunggom mar ongga ofogog. Beda Didif ongga bebin mekeb bera dimeita budou efesi ongga erirei eteb ekirsa jeska rusnok nomnaga si."
10Erek koma tein, rusnok runggu mar osok gij Yesus erek kef oida, "Tuhan, gij mona ongga bua butunggom mar nomnaga rot sismeni, beda Bua buntunggom mebif nomnaga fob. Noba Bua tein buntunggom mar nomnaga ongga angh gij mebaga tein.
11Noba mar insa koma nomnaga bera emeja oska erek meisoufa ongga efeyei eteb ongga eja erek oska. Beda mar koma nomnaga bera emeseiseifa si. Tina Bua bera biker rot mona ongga ah aibin ojgomuja. Noba Bua bumohoda rot mar insa koma nomnaga fogora bimeferwei mar koma jera mar ongga erek efeinah deika. Koma erek osnok egens ongga eij efen meisoufa ongga efeyei eteb jah fogora eferwei rot meisoufa ongga efeinah deika. Tina Bua bineja erek mar ongga efeyei fob jinaga guru. Bua bera biker rot mona ongga ah aibin ojgomuja."
12(1:11)
13Noba mar kef ongga Allah anggot gu Yesus bera Ofa enagot gu malaikat-malaikat tein guru. Ofa anggot oida, "Bua biker desi Didif rot bufoka ongga aksa eteb, noba Didif dumoin keingg mesa nomnaga fogora rumougif gu Bua si."
14Allah agot mar insa koma gu Yesus Kristus ojgomu. Jeska efen malaikat-malaikat insa koma bera erek mar ongga Ofa obk skoita rusnok ongga rimesma eiteij ah ongga ah aibin jeskaseda rufij rua ojgomu.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel