1Didif dudou os difesij mar deika rot imam egens insa koma ongga ofoka Melkisedek. Gij mona ongga sismeni eteb fob, ofa bera raja egens ongga ofoka ereij keingg kota Salem. Noba ofa tein bera erek Allah efen imam egens ongga ofoka aksa eteb ekirsa jeska nomnaga. Erek koma, noba gij mona ongga Abraham jera efen rusnok rimagobuma jera raja-raja enjgineg, beda raja-raja insa koma risiri gu Abraham. Beda ofa oksons gu efen monuh. Noba askesi ofa encira gu moroju ros, beda Melkisedek orodosu Abraham. Beda Melkisedek ois gu Allah jeskaseda Ofa eita oufamofa eteb gu Abraham.
2Beda Abraham ekeba egema jeska efen mareibra ofoukou ongga ofa eita jeska raja-raja insa koma gu Melkisedek. Ofoka Melkisedek efen ofou erek egeka. Ongga sismeni bera efen ofou oida, "Raja ongga ofoka ereij keingg rot odou ongga efen mar ongga oska oskiyai tein guru." Noba ofa tein erek raja rot kota Salem. Jefeda efen ofou ongga egeka bera oida, "Raja ongga ofoka ereij keingg rot odou ongga eskeiramera eteb tein."
3Noba runogu gij Mar Efeyi Ebsi rot ofa efen meka jera mosu, era rot rusnok ongga ofa onjuj jeska tein jinaga guru. Noba mimif minejginaga rot mona ongga ofa onjuj jeska efen mosu jera mona ongga ofa anggos tein jinaga guru. Jefeda koma erek ofa bera Allah efen imam egens ojgomuja morototuma erek Allah efen efesa Yesus erek imam egens ojgomuja.
4Mimif mijginaga rot oida imam Melkisedek bera efen ofoka ongga aksa eteb. Jeska mifmin mimowa Abraham bera efen ofoka ongga aksa eteb tein. Tina ofa ougif gu Melkisedek fogora eita egema jeska efen mareibra ofoukou ongga ofa agei jeska raja-raja insa koma gu ofa.
5Rusnok ongga runjuj jeska Abraham efen medebesa Lewi bera rufij Allah erek imam-imam. Noba gij hukum Musa bera mar egens agot rot oida Allah efen rusnok nomnaga rikeba rerin mareibra egema gu rua ongga ebic Lewi. Noba Allah efen rusnok insa koma nomnaga bera erek rumokosama ongga runjuj jeska Abraham tein. Tina rua rugif gu hukum Musa ojgomu fogora rikeba rerin mareibra egema gu ebic Lewi insa koma ongga rufij Allah erek efen imam-imam.
6Noba Abraham bera erek imam ongga sismeni. Jeska ofa bera erek ebic Lewi insa koma rerin rimowa. Erek koma, tina gij mona ongga Melkisedek orodosu Abraham fob, beda Abraham ougif gu Melkisedek fogora ekeba efen mareibra egema gu ofa. Noba Melkisedek tein bera ongga ois gu Allah jeskaseda Allah eita oufamofa eteb gu Abraham. Erek koma tein, mimif mijginaga rot oida sis fob bera Allah anggen rot oida Ofa emeita oufamofa eteb gu Abraham si.
7Noba mimif tein mijginaga rot oida rusnok ongga rufoka aksa ekirsa bera ongga ruis oufamofa oisouska Allah ofoka gu rusnok ongga rufoka oin gij rua. Jefeda mar ongga egeka insa koma orocunc rot oida Melkisedek bera efen ofoka ongga aksa ekirsa jeska Abraham.
8Imam-imam jeska ebic Lewi ongga risma mifmin mareibra egema gij mona ebeibeyaif tein bera rimagos gij mona kahma si. Tina runogu gij Mar Efeyi Ebsi rot imam Melkisedek efen mona ongga ofa anggos guru. Beda koma bera erek ofa efena ebah ojgomuja. Jefeda ofa ongga erek efena ebah ojgomuja bera esma rusnok rerin mareibra egema tein.
9Noba Abraham ekeba efen mareibra egema gu Melkisedek. Jefeda koma tein erek imam-imam jeska ebic Lewi bera ongga rikeba rerin mareibra egema insa koma gu Melkisedek. Jeska Abraham bera erek rua rerin rimowa ongga rua runjuj jeska.
10Koma tenten, jeska gij mona ongga Melkisedek orodosu Abraham, beda rua ongga ebic Lewi runojuj jeska Abraham enesi.
11Gij mona ongga sismeni eteb fob bera Allah eita efen hukum-hukum gu Musa. Noba mar egens jeska hukum koma agot rot oida rua ongga ebic Lewi rufij Allah erek efen imam-imam. Tina mar ongga rua rutunggom nou rusnok skoita Allah bera enadaij nou eita rusnok rudou erek ebsi komowa ahah Allah eiteij guru. Jefeda Allah ocosu rot omobk imam egens ongga ofoka ekirsa jeska ebic Lewi jera rerin rimowa Harun tein. Ofa efen ofoka ongga aksa morototuma erek Melkisedek ojgomu. Ofa koma bera Yesus Kristus.
12Erek koma tina mimif mijginaga rot oida Yesus onojuj jeska ebic Lewi guru. Tina Ofa onjuj jeska efen meimowa Yehuda ojgomu. Noba sis fob Musa onocunc rusnok jeska ebic Yehuda jeskaseda rufij Allah erek imam-imam guru. Tina Allah ombk Yesus erek efen imam egens ongga efeinah deika. Jefeda Ofa otunggom hukum-hukum ongga erek efeinah deika tein.
13(7:12)
14(7:12)
15Beda mimif mijginaga rot oida koma erek tenten ojgomu, jeska gij mona ongga Yesus Kristus en gu mebif fob, beda Ofa esma efen ofoka ongga aksa morototuma erek Melkisedek.
16Noba Ofa eneja erek imam egens oisouska mar ongga hukum Musa anggot rot gu rusnok ongga runjuj jeska ebic Lewi guru. Tina Ofa eja erek imam egens oisouska efen owesa efek ongga adaij nou efena ebah rot ah aibin ojgomuja.
17Koma erek tenten, jeska gij Mar Efeyi Ebsi bera Allah anggot osok gij Yesus oida, "Bua bimeja erek imam egens ongga efena ebah ojgomuja morototuma erek Melkisedek."
18Erek koma beda oisouska mar insa koma bera Allah oncunc rot oida mar ongga hukum Musa anggot rot imam-imam bera efen owesa efek deika guru. Jeska hukum insa koma bera onotunggom rusnok rudou ebsi komowa erek Allah odou os rot guru. Beda Ofa obk Yesus ongga mimif muisum gij erek osnok egens ongga ofoka aksa ekirsa. Jeska oisouska Ofa bera mimif mita mudou ongga egens jera Allah tein.
19(7:18)
20Gij mona ongga Allah ocunc rusnok ebic Lewi erek imam-imam, beda Ofa enagen rot mar gu rua guru. Tina gij mona ongga Allah oncunc Yesus erek efen imam egens, beda Ofa agen rot mar gu Yesus ojgomu.
21Mimif mijginaga rot erek koma jeska runggu gij Mar Efeyi Ebsi oida, "Allah anggen rot oida Bua bimeja erek efen imam egens ojgomuja. Noba Ofa eneferwei mar insa koma jinaga guru."
22Noba oisouska Yesus bera mimif muisum gij rot ahais oida mimif mimesma mar nomnaga ongga Allah anggot eimofoj rot si. Jeska mar koma bera oufa ekirsa jeska mar ongga Ofa anggen rot oisouska hukum Musa sis fob.
23Sis fob Allah efen imam-imam jeska ebic Lewi erek rufoukou doska. Jeska gij mona ongga rineya ranggos fob, beda Ofa oncunc egema deika ongga eferwei rua ongga ranggos insa koma.
24Erek koma tina ebeibeyaif bera Ofa efen imam Yesus Kristus ongga efena ebah rot mona ongga ah aibin ojgomuja. Jefeda Ofa onocosu rot eferwei efen imam egema deika guru.
25Jefeda adaij nou Ofa oskotu rusnok nomnaga ongga rin skoita Ofa oisouska Yesus Kristus ojgomu. Jeska ebeibeyaif bera Yesus Kristus onot deismos nou rusnok nomnaga skoita Allah rot mona ongga ah aibin ojgomuja.
26Noba mimif mucosu rot imam egens ongga erek Yesus Kristus ojgomu. Jeska Ofa bera ongga Allah oncunc ongga erek ebsi komowa. Noba Ofa eneita mar ongga oska oskiyai tein jinaga guru. Noba gij mona ongga Ofa efena ebah gu mebif ros, beda Ofa ebes efaga jeska mar ongga oska ongga rusnok runtunggom ojgomuja. Noba ebeibeyaif Ofa omfra jah mebaga fogora ensma efen ofoka ongga aksa eteb fob.
27Rua ongga imam-imam jeska ebic Lewi ongga rufoka aksa bera rita mar ongga rurougif gu Allah rot risinsa rerin mar ongga oska sismeni fog. Beda rua rutunggom mar erek koma juens deika rot rusnok enjgineg nomnaga rerin mar ongga oska ojgomuja. Tina Yesus bera eneita mar erek koma ojgomuja jinaga guru. Jeska gij mona ongga Ofa aha esinsa skoita rusnok ongga rufogog fogora rua runtob Ofa tumu mega salib, beda efen efaga koma bera erek mar ongga Ofa orougif gu Allah rot rusnok nomnaga rerin mar ongga oska. Ofa otunggom mar koma erek ofosma juens ojgomu, beda koma erek adaij nou.
28Noba oisouska hukum-hukum Musa bera Allah oncunc efen imam-imam ongga ofoka aksa. Tina rua tein rerin mar ongga oska erek rusnok giskini ojgomu. Erek koma, tina gij mona kahma deika beda Allah agen rot oida Ofa omocunc efen efesa erek imam egens ongga ofoka aksa. Noba ebeibeyaif Ofa bera efena ebah rot odou ongga ebsi komowa ojgomuja.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel