1Gij mona ongga Allah anggot eimofoj rot sismeni insa koma, bera Ofa ocunc gu rusnok rot mar ongga rua rutunggom erek jeni jeskaseda rugif gu Ofa. Noba Ofa tein ocunc gu rua rot teinefa rua rii efen Mod erek jeni nou Ofa. Beda rua rumougif gu Ofa gij Mod efesi egens insa koma.
2Mod egens insa koma bera erek modwok frak efeyi eteb ongga rusnok runtunggom jeska meifeti. Beda gij modwok efesi insa koma bera rua runtunggom morongsu egens ongga erek eteb. Noba gij morongsu efesi egens insa koma bera rua raha lampu egens jera meja egens. Beda rua raha roti esij meja egens koma erek mar ongga rurougif gu Allah rot. Noba rua rijeka morongsu egens insa koma oida, Morongsu ongga Ebsi Komowa.
3Beda rua rutunggom morongsu egens deika gij morongsu egens insa koma efesi ongga rua rira meifeti rurof joug montoj rot rusnok. Noba rua rijeka morongsu ongga egeka koma oida, Morongsu ongga Ebsi Komowa Eteb.
4Beda rua raha meja egens ongga rutunggom jeska emas gij morongsu efesi insa koma. Beda rua ris mah gij mar ongga efen ensesa esij meja egens koma erek mar ongga rurougif gu Allah rot. Noba rua raha burwa egens ongga runtunggom jeska emas gij morongsu efesi insa koma. Noba rua rijeka burwa koma oida, "Burwa ongga orocunc rot mona ongga Allah anggot eimofoj jera rusnok ongga Israel." Beda rua risah mar egens ongga erek roti egema gij burwa insa koma. Beda rua risah Harun efen moskur gij burwa insa koma tein. Noba rua tein risah mamu ongga Allah onggu efen hukum-hukum tumu nou Musa gij burwa insa koma tein.
5Beda rua rutunggom mar erek malaikat-malaikat ongga efen efembra ofou. Beda rua raha mar koma skida burwa insa koma. Noba mar ongga erek Malaikat efembra ofou insa koma bera orocunc rot Allah efen eskeira eteb. Noba mar efembra ofou koma bera orocohun joug burwa insa koma tein. Noba rua rira marska efen ogufu fogora rires burwa insa koma. Koma erek orocunc rot rusnok rerin mar ongga oska ongga Allah onsuna jeska rudou efesi fob. Didif dinagot rot mar insa koma nomnaga efen ofou deika enesi.
6Nou ongga imam-imam runtunggom mar insa koma nomnaga oisa fob, beda imam-imam Yahudi ruira gij morongsu ongga sismeni. Beda rua rutunggom mar ongga erek rurougif gu Allah jah suma.
7Tina imam egens ongga ofoka aksa esinsiyai bera ongga oira gij morongsu ongga egeka koma ongga meifeti orof joug rot rusnok enjgineg ojgomu. Noba ofa oira erek ofosma juens gij tahun egens ojgomu. Gij mona insa koma bera ofa orka ogufu jeska marska ongga ofa eris fob. Beda ofa eita ogufu insa koma gu Allah erek mar ongga orougif gu Ofa rot. Ofa otunggom mar erek koma rot ofa esinsa efen mar ongga oska sismeni fog. Beda ofa otunggom koma tein juens deika nou rusnok enjgineg rerin mar ongga oska ongga rua runtunggom rot rudou ongga osumsumu ojgomu.
8Noba oisouska mar ongga imam-imam runtunggom insa koma bera Efena Ebsi orocunc rot oida mar ongga Allah anggot eimofoj rot nou rusnok bera angh gij mona kahma ros. Jeska oisouska mar insa koma bera Allah ocunc rot oida enadaij nou rusnok giskini rin teisis skoita Ofa enesi. Jeska mar ongga imam-imam runtunggom ecira rot efen owesa efek ros.
9Noba mar insa koma bera orocunc rot mona ongga Allah anggot eimofoj sismeni fog, ongga ecira gij efen owesa efek ros. Jeska gij mona insa koma bera rusnok rurka mar insa koma jeskaseda rita gu Allah noba ris mah gij gu Ofa tein. Beda Ofa onofra mar okum keingg rua rot rerin mar ongga oska guru. Rua rutunggom mar erek insa koma jeni hukum Musa, tina gij rudou efesi bera rua rijginaga rot oida rerin mar ongga oska bera enahuma ros.
10Rua rutunggom mar insa koma jeska hukum Musa agot rot erek koma ojgomu. Koma erek mar enjgineg tein ongga rua rutunggom jeni hukum Musa. Jeska hukum Musa agot rot maat ongga rusnok rinet guru, era mar ongga rusnok rinej guru, jera rot teinefa rua rut rerin mar oboha erek jeni sismeni fog. Noba hukum-hukum insa koma ongga Allah eita gu rua bera nou rusnok rifaga ojgomu. Noba hukum-hukum koma efen owesa efek ecira ojgomuja onjoros mona ongga Allah anggot eimofoj rot mar efeinah bera encira fob.
11Yesus Kristus en erek mifmin imam ongga ofoka aksa eteb fob. Noba Ofa otunggom mar ongga ongkoska ekirsa nou mimif jeska mar ongga hukum Musa insa koma ontunggom nou rusnok sis fob. Ofa bera eja eker morototuma jera Allah gij efen Mod ongga tenten noba ongga ongkoska eteb gu mebaga. Jah suma bera rusnok rugif gu Ofa rot tenten.
12Gij orofosut tahun egens bera imam-imam orka mar ogufu jeska kambing jera sapi efer jeskaseda eita gu Allah erek mar ongga rurougif gu Ofa rot rerin mar ongga oska. Noba gij mona ongga Yesus ogufu eya jeska esinsa efaga tumu mega salib, beda koma bera erek Ofa oira gij morongsu gu Mod Allah efesi jeskaseda eita esinsa efen ogufu erek mar ongga orougif gu Allah tein. Noba Ofa eita mar koma gu Allah rot ofosma juens ojgomu jeskaseda osuwa mimif nomnaga jeska mifmin mar ongga oska. Jefeda oisouska mar ongga Ofa ontunggom fob bera mimif misma eiteij ah ongga efeinah noba ongga ah aibin ojgomuja tein.
13Ororu Yahudi rerin erebent bera imam-imam rira mar ogufu jeska kambing jera ogufu jeska sapi orna fogora rires ogufu koma gij Mod Allah efesi. Noba rua tein ris mah gij sapi efer onjoros ofora ebsi fob. Beda rua rira ofou insa koma tein fogora rires gij Mod Allah efesi. Noba rua rutunggom mar insa koma jeni rerin agama erebent jeskaseda Allah onofra mar okum keingg rua rot rerin mar ongga oska guru. Tina koma bera ororu rerin agama erebent insa koma ojgomu.
14Erek koma tina, Yesus bera aha esinsa efaga erek mar ongga eirirbi eteb gu Allah nou mifmin mar ongga oska fob. Noba Ofa otunggom mar koma oisouska owesa efek jeska Efena Ebsi ongga eker rot ah aibin. Noba mar ongga Ofa ontunggom koma bera efen owesa efek ekirsa jeska ogufu ongga sapi efen. Jeska Ofa efen ogufu bera ongga orosuna rot mifmin mar ongga oska nomnaga. Noba mar ongga oska koma bera ongga orotunggom mimif fogora miseiseifa rot ojgomu. Tina ebeibeyaif bera mudou efesi onokum rot mifmin mar ongga oska deika guru. Jefeda mimif mufij Allah ongga efen owesa efek eteb ojgomuja.
15Noba rusnok rerin mar ongga oska ros jeska rua runororu jeni hukum-hukum ongga Allah anggot eimofoj rot sismeni fob erek jeni guru. Jefeda Yesus Kristus aha esinsa fogora anggos tumu mega salib jeskaseda orosuwa rusnok nomnaga jeska rerin mar ongga oska fob. Noba ebeibeyaif Ofa ot deismos nou mimif skoita Allah jeskaseda rusnok ongga Allah enjeka bera rimesma mar ongga efeinah koma ongga Ofa anggot eimofoj rot sis fob. Mar ongga efeinah koma bera oida mimif misma eiteij ah ongga efeinah rot ah aibin ojgomuja.
16Didif dagot mar orocunc egens osok gij mar ongga Yesus ontunggom insa koma fob. Giskini bera rusnok ragen mar rot idu ongga emesma osnok egens efen mareibra gij mona ongga ofa anggos fob. Tina rua ongga rimesma mareibra insa koma bera rinesma askesi osnok egens insa koma efena ebah ros guru. Jeska mar ongga osnok egens insa koma anggen rot bera ah gij efera gij mona ongga ofa anggos fob ojgomu.
17(9:16)
18Erek koma tein rot hukum-hukum Musa ongga Allah anggen rot sismeni fob. Hukum koma efen owesa efek enecira guru onjoros mar egens agos sismeni fog. Beda rua rira mar koma efen ogufu fogora rires gij Mod Allah efesi. Beda hukum-hukum efen owesa efek ecira ojgomu fob.
19Jeska gij mona ongga Musa emfesij rot Allah efen hukum-hukum nomnaga gu rua ongga Israel fob, beda ofa eita ogufu jeska sapi efer jera kambing fogora orohoh mar ogufu koma jera mei. Beda ofa eita domba efeji ongga ekeni fogora erakid koma rejrej mega efetma ongga ofoka hisop. Beda ofa ec mega efetma koma rot domba efeji gij mar ogufu insa koma. Beda ofa era mar koma eres kertas efeyi ongga rungkuku noba ongga rua runggu hukum-hukum Allah tumu. Noba ofa tein eres rusnok jah suma rot mar ogufu insa koma tein.
20Beda ofa agot gu rusnok insa koma oida, "Oisouska ogufu kef bera Allah orocunc gu iwa oida hukum-hukum ongga Ofa anggot eimofoj rot bera erek tenten ojgomu. Jefeda iwa iroru hukum-hukum koma rot tenten ojgomu."
21Beda ofa tein era ogufu insa koma eres Mod Allah jera mar nomnaga ongga rua risah gij Mod koma efesi tein.
22Ofa otunggom mar erek koma jeska hukum-hukum insa koma agot rot oida rua rira ogufu fogora rires mar ofoukou ojgomu. Noba erek rua rineres mar rot ogufu guru, beda Allah onosuna rot rerin mar ongga oska tein guru.
23Mod Allah jera mar ongga angh gij Mod efesi insa koma bera erek orocunc rot mar ongga angh gu mebaga. Jefeda imam-imam insa koma rucosu rot rira mar ogufu jeskaseda rutunggom mar insa koma erek ebsi komowa ojgomu. Tina enadaij nou mar insa koma orotunggom mar ongga angh gu mebaga erek ebsi komowa jinaga guru. Jefeda Yesus ongga anggos tumu mega salib bera orotunggom mar koma ongga ah gu mebaga erek ebsi komowa ojgomu.
24Noba Ofa onoira gij mod egens ongga rusnok rii fob jeskaseda era efen ogufu fogora orougif gu Allah rot guru. Jeska Mod Allah koma bera erek mar ongga orocunc rot mebaga ojgomu. Tina Yesus oira gij mebaga ojgomu. Noba ebeibeyaif bera Ofa eker jah suma morototuma jera Allah jeskaseda ot deismos nou mimif skoita Allah tein.
25Rua ongga imam-imam rucosu rot ruira gij Mod Allah orofosut tahun egens jeskaseda rutunggom mar insa koma nomnaga ongga hukum Musa anggot rot ojgomuja. Noba rua runoira oisouska risinsa rerin rugufu guru. Tina rua rira mar ogufu rot ojgomu. Erek koma tina Yesus oira gij mebaga erek imam egens oisouska esinsa efen ogufu jeskaseda otunggom mar rot ofosma juens ojgomu. Noba koma bera adaij nou tein.
26Jeska erek Yesus oira mebaga gij orofosut tahun egens jeskaseda otunggom mar erek imam egens, beda koma bera erek Ofa eita efera okora tumu mega salib gij orofosut tahun egens tein ojgomuja. Koma erek Ofa otunggom mar insa koma sis mona ongga Allah ontunggom mebif ojgomuja onjoros ebeibeyaif tein, tina guru. Jeska gij mona ongga enja ejgwaga kef bera Yesus angha esinsa efaga erek mar ongga orougif gu Allah rot ofosma juens ojgomu. Noba Ofa ontunggom mar erek koma jeskaseda mifmin mar ongga oska enah gu mimif deika guru.
27Rusnok nomnaga ragos erek ofosma egens ojgomu. Beda Allah oga ojga rot rerin rita mar nomnaga.
28Jefeda erek koma tein, Yesus agos rot ofosma egens ojgomu jeskaseda osuwa mimif jeska mifmin mar ongga oska. Beda Ofa omoksons en gu mebif deika si. Tina Ofa onoksons jeskaseda osuwa rusnok jeska rerin mar ongga oska deika guru. Ofa omoksons en jeskaseda eita eiteij ah ongga efeinah gu rusnok nomnaga ongga rug moroju nou Ofa.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel