Alkitab Mobile SABDA
[VER] : [MEYAH]     [PL]  [PB] 
 <<  Kisah Para Rasul 15 >> 

1Rusnok Yahudi rineya ongga ruroru Yesus fob bera rin jeska monuh Yudea jah kota Antiokhia. Beda rua ruftuftu rusnok ongga ruroru Yesus gij kota Antiokhia oida rua tein rucosu rot riris rufom mareij ofos jeska jeni hukum Musa anggot rot ojgomu. Erek rua rineita mar erek koma guru, beda rua rinesma eiteij ah ongga efeinah guru.

2Tina Paulus jera Barnabas gonoitij rot mar ongga rua rumftuftu gu rusnok guru, jefeda rua ruga emesedema rot mar insa koma. Beda rua ongga ruroru Yesus gij kota Antiokhia rucunc Paulus jera Barnabas jera rusnok rineya tein jeskaseda rija morototuma jah kota Yerusalem beda rifesij rot mar insa koma gu Yesus efen ruforoker jera ebirfager Mod Ari enjgineg tein jah suma.

3Gij mona ongga rua rinja fob, beda rua ruira gij monuh Fenisia jera monuh Samaria. Beda rua rifesij gu Yahudi ongga Kristen jah suma rot teinefa rusnok ongga erek Yahudi guru tein ruroru Yesus fob. Nou ongga rua ringg rot mar insa koma, beda rua rudou efaga ouka eteb rot.

4Gij mona ongga Paulus jera efen mohujir rinsaga gu Yerusalem fob, beda rusnok ongga ruroru Yesus ni, Yesus efen ruforoker ni, jera ebirfager Mod Ari enjgineg tein nomnaga ruroun rua rot rudou ongga erirei eteb. Beda Paulus jera Barnabas gefesij gu rua osok gij mar nomnaga ongga Allah ontunggom gij mona ongga goga goftuftu rot efen oga jah gu monuh ofoukou fob.

5Erek koma tina rineya ongga Yahudi jeska ebic Farisi ongga ruroru Yesus fob rut noba ragot oida, "Rua ongga erek Yahudi guru ongga ruroru Yesus fob bera rucosu rot riris rerin rufom mareij ofos jeska tein. Beda rua ruroru hukum Musa nomnaga tein ojgomu!"

6Beda ruforoker jera ebirfager Mod Ari insa koma rumohoturuma jeskaseda rifesij moguma rot mar insa koma ongga rusnok Yahudi ranggot rot.

7Nou ongga rua rimfesij mar moguma rot dektek fob, beda Petrus ot noba agot oida, "Edkorer jera edkoser, iwa nomnaga ijginaga rot teinefa Allah oncunc didif jeska ifekesa sis fob jeskaseda difesij rot Allah oga ongga oufamofa gu rua ongga erek Yahudi guru fogora rua tein rig beda ruroru Yesus.

8Noba Allah, ongga ejginaga rot mar ongga angh gij rusnok rudou efesi, bera orocunc gu mimif oida Ofa oroun rusnok ongga erek Yahudi guru tein fob. Jeska Ofa eita Efena Ebsi gu rua tein morototuma erek Ofa eita gu mimif gij mona ongga sismeni fob.

9Jeska ahah Allah eiteij bera rusnok egens enekirsa jeska rusnok egema guru. Erek koma tein, Ofa onosujohu oida mimif ongga Yahudi bera erek ongkoska ekirsa jeska rusnok enjgineg guru. Jeska rua tein ruroru Yesus fob, jefeda Allah onsuna rot rua tein rerin mar ongga oska fob.

10Jefeda teinefa fogora iwa idou os itunggom mar ongga Allah onodou os rot guru fogora iradgodu rua ongga Yahudi guru jeskaseda ruroru Yahudi rerin erebent insa koma ongga okum nou rua. Jeska mifmin mimower tein runororu agama erebent insa koma rot tenten guri. Noba mar insa koma bera okum nou mimif ongga deisef tein ojgomu.

11Mimif ongga Yahudi minesma eiteij ah ongga efeinah oisouska mifmin agama erebent jinaga guru! Ongga tenten bera mimif misma eiteij ah ongga efeinah oisouska Tuhan Yesus ongga ocunc odou ongga okora rot mimif ojgomu. Noba rua ongga Yahudi guru risma eiteij ah ongga efeinah oisouska Yesus Kristus tein ojgomu."

12Beda rusnok nomnaga ongga rumohoturuma insa koma riker moubsaha ojgomu. Beda Barnabas jera Paulus gefesij gu rua tein osok gij mar onswos ofoukou ongga goga gontunggom oisouska owesa efek jeska Allah gij mona ongga goga gengker morototuma jera rusnok ongga Yahudi guru.

13Nou ongga goga gemfesij mar insa koma oisa fob, beda Yakobus agot oida, "Edkorer jera edkoser, iwa ig duga fog.

14Ainsa kef iwa ig Petrus agot rot teinefa Allah odou okora rot rusnok enjgineg tein ongga erek Yahudi guru fogora ocunc rua tein erek efen rusnok.

15Noba Koma ororu jeni mar ongga Allah anggot rot oisouska efen nabi-nabi sis fob. Ofa agot oida,

16'Rua ongga Yahudi ongga Daud ofoka ereij keingg bera erek modwok egens ongga oska efekeifa fogora ensiri fob. Noba erek rusnok ruksons jeskaseda rii mod ongga efeinah deika, beda erek koma tein Didif dimeita oufamofa sons gu rua ongga runjuj jeska rusnok insa koma si.

17Didif dimeita mar insa koma jeskaseda rusnok ongga erek Yahudi guru tein rimen skoita Didif ongga rerin Tuhan fogora rija erek dedin rusnok.

18Tuhan Allah agot rot mar erek koma jeni Ofa anggen rot gij mona ongga sis eteb fob.' "

19Beda Yakobus agot deika oida, "Jefeda didif dusujohu rot oida, erek rusnok ongga Yahudi guru ruh rudou efesi gu Allah fob, beda enadaij nou mimif miradgodu rua jeskaseda ruroru mifmin agama erebent ongga erek okum nou rua guru.

20Tina ongga oufa bera, mimif misa surat gu rua jeskaseda misisi joug rua oida rinet marska ongga rusnok enjgineg rijiteyi gu mar ongga oska guru, noba rinet marska ongga ogufu enah gij ros guru, noba rinej ogufu jeska marska insa koma tein guru. Beda rua tein rut joug risinsa jeskaseda rinesiri morototuma guru.

21Mimif magot rot mar insa kef ojgomu jeska koma morototuma erek mar ongga Musa anggot rot sis fob jeskaseda rusnok ongga Yahudi rudou onokum skoita rusnok ongga Yahudi guru. Jeska gij mona ongga sis fob onjoros mona deisef tein bera rusnok ruftuftu rot mar insa koma ongga Musa anggot rot gij mod ongga rua rum riteij gu Allah gij. Noba rua rik mar insa koma gij orofosut mona ongga Sabat tein."

22Jefeda Yesus efen ruforoker jera ebirfager Mod Ari jera rusnok nomnaga ongga ruroru Yesus gij kota Yerusalem rudou egens rot mar ongga Yakobus anggot gu rua fob. Beda rua rucunc rusnok rineya jeska rifekesa jeskaseda rija jah kota Antiokhia morototuma jera Paulus gonu Barnabas. Rua rucunc Silas jera Yudas ongga rijeka ofoka Barsabas tein. Goga gerek gebirfaga Mod Ari ongga geita mar ongga oufamofa ojgomu.

23Beda rua rita surat egens gu goga jeskaseda gorka skoita rua ongga Kristen gij kota Antiokhia. Surat egens koma agot mar erek kef oida, "Surat kef jeska memef ongga erek Yesus efen ruforoker jera ebirfager Mod Ari tein. Memef ongga merek yeyin ihujir moisu iwa ongga Yahudi guru noba ongga iroru Yesus gij kota Antiokhia ni, monuh Siria ni, jera monuh Kilikia tein.

24Memef meg oida rineya jeska memef rinja jah suma noba ruftuftu iwa gij mar okum ongga orotunggom idou eineina gij fob. Memef monobk rua jeskaseda ruftuftu rot mar insa koma gu iwa guru. Tina koma en jeska rua risinsa ojgomu.

25Jefeda memef memfesij mar moguma noba modou egens nou mocunc gosnok gegeka jeska memef jeskaseda gegja skoita iwa jah suma. Goga geja morototuma jera Barnabas jera Paulus ongga memef modou okora eteb rot.

26Barnabas jera Paulus bera gerek gosnok gegeka ongga goufamofa, noba sis fob rusnok rita mar ongga oska ofoukou skoita goga, jeska goga gemfesij mar rot Tuhan Yesus Kristus gu rua.

27Jefeda memef mobk Yudas jera Silas skoita iwa jeskaseda goga tein gagot rot mar ongga memef manggot gij surat egens kef.

28Efena Ebsi Allah oncunc gu memef fob oida enadaij nou memef ongga Yahudi meradgodu iwa gij mefmen agama erebent ongga erek okum nou iwa guru.

29Erek koma tina memef modou os meisisi joug iwa gij mar egens oskiyai ojgomu. Koma bera, iwa inet marska ongga rusnok enjgineg rirejiteyi gu mar ongga oska guru. Noba inet marska enjgineg tein ongga efen ogufu enah gij ros guru. Noba inej ogufu jeska marska insa koma tein guru. Beda iwa tein yut joug isinsa jeskaseda inesiri morototuma guru. Erek iwa iroru mar insa kef ojgomu, beda koma omofij iwa rot si. Ainsoma."

30Gij mona ongga rua nomnaga rimeisisima fob, beda rua rubk Paulus, Barnabas, Silas jera Yudas jah kota Antiokhia. Nou ongga rua rinsaga gij kota koma fob, beda rua rumohoturuma jera rusnok nomnaga ongga ruroru Yesus gij kota koma. Beda rua rita surat insa koma gu rusnok jah suma.

31Nou ongga rua ongga ruroru Yesus jah suma ringk surat egens koma fob, beda rua rudou efaga ouka eteb jeska mar ongga runggu gij surat koma ofij rua ojgomu.

32Yudas jera Silas bera erek gosnok ongga gefesij mar jeska Allah. Beda goga goftuftu rua ongga ruroru Yesus gij kota Antiokhia gij mar ofoukou jeskaseda rua ruroru Yesus rot ahais ojgomuja.

33Nou ongga Yudas jera Silas gengker jah suma gij mona ofoukou fob, beda rua rufij goga fogora goksons jah kota Yerusalem. Rua ongga ruroru Yesus gij kota Antiokhia ragot gu goga oida, "Goga geja rot godou ongga eskeira eteb jah Yerusalem!"

34((Tina Silas odou os eker gij kota Antiokhia deika.))

35Gij mona insa koma tein bera Paulus jera Barnabas geker gij kota Antiokhia. Beda goga jera rusnok enjgineg rufoukou tein ruftuftu noba rifesij mar osok gij Tuhan oga.

36Gij mona egema deika beda Paulus agot gu Barnabas oida, "Nagef naksons jah monuh nomnaga ongga nagef nafasij rot Tuhan oga gij sis fob jeskaseda nak rot oida rua riker erek teinefa."

37Barnabas odou os oroun Yohanes Markus morototuma jera goga.

38Tina Paulus odou os erek koma guru, jeska sis fob Markus ororu goga, tina gij mona ongga Paulus jera Barnabas gemfesij rot Tuhan oga gij monuh Pamfilia ros, beda Markus aha goga jah noba goksons jah Antiokhia.

39Beda Paulus jera Barnabas goga omosokuma eteb rot Markus, jefeda goga gemekebema ojgomu. Beda Barnabas oroun Markus noba goga geifef meg meifeni jah motowohu Siprus, tina Paulus oroun Silas.

40Nou ongga rua ongga ruroru Yesus gij kota Antiokhia rum riteij keingg goga jeskaseda Allah omofij Paulus jera Silas, beda goga geja

41rejrej monuh Siria jera monuh Kilikia. Beda goga geisisi joug rusnok ongga ruroru Yesus gij monuh insa koma jeskaseda rumororu Yesus rot ahais deika.



 <<  Kisah Para Rasul 15 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel