Alkitab Mobile SABDA
[VER] : [MEYAH]     [PL]  [PB] 
 <<  Kisah Para Rasul 25 >> 

1Gubernur Festus oira gij monuh insa koma fob. Noba gij mona orgomu deika, beda ofa eja jah kota Yerusalem.

2Gij mona ongga ofa ensaga gu kota Yerusalem fob, beda ebirfager imam-imam ongga Yahudi jera ebirfager Yahudi rineya rija skoita ofa noba rua rucunc Paulus erek oska.

3Beda rua rusos Festus jeskaseda ocunc odou ongga oufamofa skoita rua fogora obk Paulus sons jah kota Yerusalem. Rua rirejgei ofa erek koma jeska rua rudou oromom nou rusk joug gu moroju beda ragob ofa.

4Tina Festus oroun oida, "Ebeibeyaif Paulus angh gij mod egens gu kota Kaisarea. Noba gij mona estir deika beda didif dumoksons jah suma.

5Jefeda iwa yubk yeyin ebirfager jeskaseda rija morototuma jera didif jah kota Kaisarea. Noba erek Paulus ontunggom mar oska rot tenten fob, beda rua rucunc rot gij kota Kaisarea ojgomu."

6Festus eker gij kota Yerusalem erek ari egens jeska, beda ofa oksons jah kota Kaisarea. Erek monog rahah beda ofa ohoturu ebirfager Yahudi insa koma nomnaga, beda ofa obk rusnok jeskaseda rujoroun Paulus skoita rua.

7Nou ongga Paulus ensaga fob, beda rua ongga Yahudi jeska kota Yerusalem rut rejrej Paulus noba ragot mar ofoukou noba rucunc ofa erek oska rot ojgomuja. Tina mar ongga rua ranggot insa koma nomnaga bera enerek tenten guru.

8Beda Paulus agot gu Festus oida, "Didif dinekirsa rot hukum raja Kaisar egema tein guru. Noba didif dinekirsa rot hukum agama Yahudi egema tein guru, noba dunotunggom mar ongga oska gij Mod Allah tein guru. Noba dunoga oruh rot raja Kaisar tein jinaga guru."

9Tina Festus odou os otunggom mar ongga ereita Yahudi rudou oufamofa rot ofa jefeda ofa ejeka gu Paulus oida, "Bua budou os bija jah Yerusalem jeskaseda didif duga ojga rot mar okum ongga rua runcunc skoita bua gij kota koma ei?"

10Beda Paulus oroun oida, "Gubernur Feliks, ebeibeyaif didif dut jah bua budou. Noba bua bera erek raja Kaisar efen ebirfaga egens gij monuhif. Jefeda adaij nou bua buga ojga rot didif jah sif ojgomu. Bua bisinsa tein bijginaga fob oida dunotunggom mar ongga oska egema tein skoita rua ongga Yahudi guru.

11Erek didif duntunggom mar ongga oska fogora danggos rot, beda didif duitij rot ojgomu. Tina mar ongga oska ongga rua runcunc osok gij rot didif bera enerek tenten jinaga guru. Jefeda enadaij nou osnok egens egema tein aha didif gij rua ritma jinaga guru! Didif duis gu bua jeskaseda raja Kaisar esinsa oga ojga rot didif ojgomu!"

12Jefeda Festus efesij mar jera efen rusnok ongga rumfij ofa rot mar ongga Paulus anggot insa koma fob. Beda ofa agot gu Paulus oida, "Bua bisinsa buis rot jeskaseda raja Kaisar bera omoga ojga rot bua, jefeda bua bimeja skoita Kaisar ongga engker gu kota Roma si!"

13Erek dektek deika guru, beda raja Agripa jera Bernike geja jah kota Kaisarea noba gorodosu Festus jah suma.

14Askesi goga gengker jah suma ros, beda Festus efesij mar gu raja Agripa osok gij Paulus. Ofa agot oida, "Osnok egens ongga rangha gij mod oskusk sis mona ongga Feliks erek Gubernur jah sif bera eneker ros.

15Gij mona ongga didif dija jah kota Yerusalem, beda ebirfager imam-imam jera ebirfager Yahudi rineya rucunc ofa erek oska eteb. Noba rua ruis gu didif jeskaseda duga ojga rot ofa ojgomu.

16Tina didif dagot gu rua oida memef ongga mofij raja Kaisar bera menaha mar okum keingg rusnok ebeirens erek koma guru. Tina sismeni bera memef mohoturu rua ongga rucunc osnok egens erek oska. Beda memef mejeka osnok egens koma tein jeskaseda ofa esinsa oroun rot mar ongga rua runcunc rot fog ojgomu.

17Jefeda gij mona ongga ebirfager Yahudi insa koma rin jah sif fob, beda didif dineker erek dektek guru. Tina erek monog beda didif duhoturu rua nomnaga. Beda didif duroun Paulus insa koma skoita didif.

18Nou ongga rua rucunc ofa erek oska, beda didif dusujohu oida rua rimagot rot mar ongga okum eteb. Didif dig, tina ofa onotunggom mar oska eteb egema tein guru.

19Rua ruga emaksama rot rerin hukum agama ojgomu. Noba rua tein ruga ofoukou osok gij osnok egens ongga ofoka Yesus. Osnok egens koma bera anggos fob, tina Paulus agot oida Ofa efena ebah sons fob.

20Didif dudou erebibei rot mar insa koma. Jefeda didif dijeka gu Paulus oida erek ofa odou os rot beda ofa eja jah Yerusalem jeskaseda duga ojga rot ofa jah suma.

21Tina Paulus esinsa ois gu didif oida ofa odou os raja Kaisar oga ojga rot ofa ojgomu. Jefeda didif dubk dedin tentara jeskaseda ot joug ofa gij mod egens onjoros didif dubk ofa skoita raja Kaisar."

22Beda raja Agripa agot gu Festus oida, "Didif disinsa tein dudou os dig mar jeska osnok egens koma." Beda Festus agot oida, "Monog bera bua bimeg mar jeska ofa si."

23Erek monog beda Agripa jera Bernike gen jah suma noba gergi meisoufa ongga erek ongkoskamoka. Noba ebirfager tentarer ongga rufoka aksa jera rusnok enjgineg tein ongga erek rufoka aksa gij kota insa koma nomnaga ruroun goga jah suma. Rua nomnaga ruira gij mod eteb ongga rusnok ranggot mar gij. Beda Festus obk rusnok jeskaseda rujoroun Paulus skoita rua.

24Beda Festus agot oida, "Raja Agripa jera iwa nomnaga ongga ifoka aksa! Iwa ig fog, jeska rusnok ongga Yahudi ongga ringker jah kota Yerusalem jera rusnok Yahudi ongga ringker jah sif tein, rua runcunc osnok egens kef erek oska eteb fob. Noba rua ruis rot oida ofa agos ojgomu.

25Tina didif dinek mar egema tein ongga ofa ontunggom ongga erek oska fogora agos rot jinaga guri. Tina ofa esinsa oisa rot oida didif dubk ofa skoita raja Kaisar ojgomu. Jefeda didif disejah nou dumobk ofa jah suma.

26Tina didif dinejginaga rot mar meidu ongga dumogu gij surat egens osok gij ofa skoita raja Kaisar guru. Jefeda didif duroun ofa skoita bua raja Agripa ongga ofoka aksa jera iwa nomnaga. Didif dutunggom koma jeskaseda iwa ijeka gu ofa rot mar ongga Yahudi oncunc rot ofa deika. Beda erek didif dimeg rot mar ongga adaij nou dugu gij surat egens gu raja Kaisar.

27Jeska didif dusujohu oida enadaij nou didif dubk osnok egens gu raja Kaisar, tina erek dinagot rot efen mar oska ongga ontunggom enesi."



 <<  Kisah Para Rasul 25 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel