1Nou ongga koma oisa fob beda rusnok Yahudi ongga ebic Farisi jera rineya ongga erek Guru-Guru agama rin jeska kota Yerusalem.
2Beda rua rijeka gu Yesus oida, "Teinefo fogora Bua bebin ruforoker runororu mar ongga mifmin mimower erebent rot sis fob guri. Jeska bebin ruforoker runot rerin ritma jeni mifmin mimower ranggot rot fogora rit maat guru!"
3Beda Yesus agot gu rua oida, "Tina iwa tein bera ineita mar jeni ongga Allah anggot rot guru jeskaseda iwa iroru mar ongga iwa isinsa yuftuftu rot ojgomu.
4Jeska Allah agot rot oida, 'Yugif gu yeyin ika jera isu ojgomu.' Noba Ofa agot tein oida, 'Rusnok ongga ragot mar ofogog skoita rerin rika jera rusu bera rimagos rot ojgomu.'
5Erek koma noba Allah agot oida, erek rusnok rerin mar ongga adaij nou beda rua rufij rerin riker jera rusir rot ojgomu. Tina rusnok rineita mar koma jeni guru. Jeska iwa yuftuftu rot oida, erek rua rita rerin mar gu Allah ojgomu,
6beda rua runofij rerin riker jera rusir tein deika guru. Jefeda koma erek rua ringkirsa rot mar ongga Allah anggot insa koma rot rerin riker jera rusir jeskaseda ruroru mar ongga iwa yuftuftu rot ojgomu.
7Mar ongga iwa yuftuftu rot bera erek oska eteb ojgomu. Jeska koma onororu jeni Allah oga jinaga guru. Mar ongga nabi Yesaya anggot jeska Allah osok gij iwa sis fob bera erek tenten ojgomu. Jeska ofa agot rot oida,
8'Allah agot oida, "Rusnok Israel kef rugif gu Didif rot ruga ongga eyejkita, tina rudou efesi onororu Didif rot tenten guru.
9Jefeda enadaij nou rua rugif gu Didif guru. Jeska rua ruftuftu mar ongga en jeska risinsa rudou efesi ojgomu. Noba mar insa koma onofij rua jinaga guru." ' "
10Erek koma beda Yesus ohoturu rusnok rufoukou jah suma, beda Ofa agot gu rua oida, "Iwa ig duga rot iskusk jeskaseda idou ebriyi gij efen ofou ojgomu.
11Mar ongga oira gij rusnok rawesi bera onotunggom rua erek oska jeni erek mifmin agama erebent agot rot guru. Tina mar ongga orogna jeska rusnok rawesi bera ongga orotunggom rua erek oska jeni mifmin agama erebent ojgomu."
12Erek koma beda Yesus efen ruforoker rin skoita Ofa noba ragot gu Ofa oida, "Mar ongga Bua banggot insa koma otunggom rua ongga ebic Farisi rudou okum rot."
13Beda Yesus agot oida, "Rua ongga Farisi insa koma bera erek marfok ongga Akeina ongga engker gu mebaga enerefa guru. Jefeda Ofa omoku marfok insa koma jeska mebi beda eij jeska si.
14Iwa inosujohu rot rua deika guru. Jeska rua bera erek rusnok ongga riteij ofou ongga rinja okag rot rusnok enjgineg ongga riteij ofou tein ojgomu. Jefeda rua nomnaga rimesiri gij mebi efesi si."
15Beda Petrus agot oida, "Akeina, mar ongga Bua binefesij insa koma bera efen ofou erek meidu?"
16Beda Yesus agot oida, "Iwa idou osumsumu ros ei.
17Teinefa fogora idou enebriyi gij mar insa koma efen ofou enesi. Mar koma efen ofou bera erek kef: Mar ongga oira gij rusnok rawesi bera eja jah rerin rutkonu ojgomu. Beda mar koma orogna jeska rua gij mona ongga rua ribeyi rot ojgomu.
18Tina mar ongga orogna jeska rusnok rawesi bera en jeska rudou efesi ojgomu. Noba koma bera orotunggom rua erek oska jeni agama erebent agot rot tein.
19Jeska mar ongga rusnok rutunggom ongga erek ofogog bera en jeska rudou efesi ojgomu. Mar koma bera erek rusnok ongga ragob rusnok enjgineg ni, risiri jera egema efen mohona ni, risiri morototuma ni, rukoreka mar jeska rusnok enjgineg ni, rucuwei mar gu rusnok enjgineg ni, ruhurmei mar rot rusnok enjgineg ni.
20Mar insa koma bera ongga otunggom rusnok erek oska ojgomu. Tina erek rusnok rit maat rot rerin ritma ongga runot enesi, beda koma onotunggom rusnok erek oska jinaga guru."
21Nou ongga Yesus emfesij rot mar insa koma oisa fob, beda Ofa eja jah monuh egens ongga angh doida kota Tirus jera kota Sidon.
22Ojaga egens ongga erek Yahudi guru noba ongga ojga jeska monuh Kana bera eker jah suma. Ofa en skoita Yesus noba ebisa gu Ofa oida, "Bua ongga bera erek raja Daud efen efesa, bucunc budou ongga okora rot didif. Jeska efena ofogog oira gij edesa ojaga egens efen odou efesi fob. Noba efena ofogog insa koma otunggom ofa fogora eita efera okora eteb rot."
23Tina Yesus enagot mar egema tein sons skoita ofa guru. Beda Yesus efen ruforoker rin skoita Yesus noba agot gu Ofa oida, "Bua bubk ojaga egens jeskaseda eja jeska mimifo. Jeska ofa ororu mimif noba agerir mar insa koma ojgomuja fogora modou eskes rot fob."
24Beda Yesus agot oida, "Allah obk Didif jeskaseda dufij Ofa efen rusnok Yahudi ongga rirek domba-domba ongga riseiseifa ojgomu."
25Beda ojaga egens koma es okeibi gu mebi jah Yesus odou noba agot oida, "Tuan, bufij didif rot dedin edesa ojaga egens koma ojgomu."
26Beda Yesus agot oida, "Ruforokai rint maat sismeni onjoros maat insa koma ereya rua fog. Jeska enadaij nou rusnok rita maat insa koma jeska ruforokai fogora rij gu mes guru."
27Beda ojaga egens koma agot oida, "Tuan, koma bera tenten ojgomu. Tina mes tein ongga engker gu meja owohoh ongga efen ebirfaga ent maat esij bera et maat oskiyai ongga ensiri jeska meja insa koma tein."
28Beda Yesus agot gu ofa oida, "Ojaga, budou ororu Didif rot tenten fob. Jefeda mar ongga bua buis rot gu Didif bera bimesma si." Beda ainsa koma tein ojaga egens koma efen efesa bera eita eskeira fob.
29Erek koma beda Yesus eja jeska monuh insa koma, beda Ofa ecira gu meren Galilea efembra. Beda Ofa osok gij memaga ofog oduma noba eker jah suma.
30Beda rusnok rufoukou rin skoita Ofa jah suma. Rua ruroun rerin rusnok ongga marenir erek riteij ofou ni, raki emageima ni, rusnok ongga rinagot mar guru ni, jera rusnok ongga marenir rot mar enjgineg tein ni skoita Yesus. Beda Ofa eita eskeira gu rua nomnaga.
31Rusnok jah suma rudou oubsaha eteb jeska rua rik oida rusnok ongga osumu sis fob bera ragot mar ni, rua ongga rifaga oskukwok bera rita eskeira fob ni, rua ongga raki emageima bera ricira raki ni, rua ongga riteij ofou bera rik mar koisoisa ni. Jefeda rua nomnaga risitit mar gu Allah ongga efen rusnok Israel.
32Erek koma beda Yesus ohoturu efen ruforoker beda agot gu rua oida, "Didif dudou okora rot rusnok jah sif, jeska rua ringker jera Didif jah sif gij mona orgomu fob, tina rinet maat egema tein enesi. Didif dunodou os dubk rua sons jah rerin monuh enesi, jeska rifaga erek eriaga fob, jefeda erek rumosra gu moroju."
33Beda Ofa efen ruforoker ragot oida, "Mifmin maat gij monuh ongga owowa kef jeskaseda mita gu rua nomnaga bera enadaij jinaga guru."
34Beda Yesus ejeka gu rua oida, "Yeyin roti ofog egaho?" Beda rua ragot oida, "Mefmen roti ofog cinja erfeka jera mos erek oskiyai ojgomu."
35Jefeda Yesus obk rusnok rufoukou jah suma jeskaseda riker gij meskeingg efen.
36Beda Ofa eita roti ofog cinja erfeka jera mos insa koma noba ois oufamofa eteb skoita Allah rot maat insa koma. Beda Ofa ekeba maat insa koma dogdog skoita efen ruforoker. Beda efen ruforoker rikeba maat insa koma skoita rusnok rufoukou jah suma.
37Beda rusnok koma nomnaga rit maat onjoros maat ereya rua fob. Beda Yesus efen ruforoker ruhoturu maat ofod ongga ok morungga eteb erek cinja erfeka.
38Noba runer ongga rint maat gij mona insa koma bera erek ribu tohkuru. Noba rugun rujager jera riser ongga rint maat insa koma bera erek ekirsa deika.
39Beda Yesus obk rusnok insa koma sons jah rerin monuh noba Ofa eifef meg egens beda eja jah monuh egens ongga ofoka Magadan.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel