1Nou ongga Yesus oftuftu rot mar insa koma oisa fob, beda Ofa eja jeska monuh Galilea beda ecira jah monuh Yudea ongga ah gu mei Yordan enama.
2Rusnok rufoukou ruroru Ofa gij mona insa koma, jefeda Ofa eita eskeira gu rua ongga marenir jah suma.
3Rusnok Yahudi rineya ongga ebic Farisi rudou os rijeka joug Yesus jeskaseda rucunc Ofa erek oska rot mar ongga Ofa oroun gu rua ojgomu. Jefeda rua rijeka gu Ofa oida, "Akeina, oisouska mifmin agama erebent bera runer ribes rerin ruhoner jeni risinsa rudou os rot ei era gurei?"
4Beda Yesus oroun gu rua oida, "Iwa ik mar egens ongga runggu gij Mar Efeyi Ebsi sis fob juens deika ojgomu. Jeska mar egens koma agot rot oida gij mona ongga sismeni fob bera Allah otunggom runer jera rujager.
5Beda Allah agot oida, 'Erek koma jefeda orna egens emeja jeska efen meka jera mosu noba Ofa eja erek egens jera efen mohona.'
6Jefeda goga geneker rot godou ongga egeka deika guru. Tina godou efesi eja erek egens fob. Noba Allah bera ongga ebiedi goga godou erek egens fob. Jefeda enadaij nou rusnok enjgineg rita mar ongga orotunggom goga fogora gemekebema deika jinaga guru."
7Beda rua ongga ebic Farisi insa koma rijeka gu Yesus deika oida, "Tina sis fob bera Musa agot gu mifmin mimower rot oida runer rugu gij surat egens ongga oncunc rot oida ofa ebes efen mohona, beda gemekebema ojgomu. Musa anggot mar insa koma rot meidu?"
8Beda Yesus oroun oida, "Musa oitij rot oida yeyin imower ribes rerin ruhoner jeska rua ribirfaga ombrera ojgomu. Tina Allah onodou os mar erek koma gij mona ongga Ofa otunggom rusnok guru.
9Jefeda erek orna egens efen mohona ongga ensiri jera orna egens enjgineg, noba ofa ebes efen mohona insa koma rot, beda koma onoska guru. Erek koma tina erek orna egens ebes efen mohona erek rourou ojgomu, noba ofa oskotu mohona ongga efeinah deika, beda ahah Allah eiteij koma bera erek ofa jera efen mohona ongga efeinah gesiri morototuma ojgomu fob."
10Beda Yesus efen ruforoker ragot oida, "Erek koma jefeda ongga oufa ekirsa bera runer runoskotu rujager guru."
11Beda Yesus oroun oida, "Enadaij nou runer nomnaga riker fogora runoskotu mohona guru. Tina rua ongga risma owesa efek jeska Allah bera rerin owesa efek rot fogora runoskotu rujager guru.
12Jeska runer rineya bera runoskotu arja oisouska mar ongga erek toga toga. Runer rineya bera rifaga rineja erek egens jera ojaga egens guru, jeska rerin rifaga ongga enadaij nou guru. Noba rineya bera riris rerin rici ofongga jeska fob ojgomu, jefeda runoskotu arja guru. Noba runer rineya runoskotu arja guru jeskaseda rua rufij Allah ojgomu. Jefeda erek runer rerin owesa efek jeskaseda ruroru mar erek insa koma, beda rua rita mar erek koma fogora runoskotu rujager guru."
13Rusnok rineya rurka rerin ruforoka rifes gu Yesus jeskaseda Ofa aha efen etma esij rua fogora ois gu Allah jeskaseda Ofa eita oufamofa gu ruforoka rifes insa koma. Tina Yesus efen ruforoker ritaha joug rusnok insa koma jeskaseda ruroun ruforoker koma jeska Ofa ojgomu.
14Beda Yesus agot oida, "Iwa ineragou joug ruforoka rifes koma guru, tina yuitij rot rua rin skoita Didif ojgomu. Jeska rusnok ongga rita rudou efesi erek ruforoka rifes insa kef rerin rudou efesi bera rumoira jera rusnok ongga Allah ofoka ereij keingg."
15Beda Ofa aha efen etma esij ruforoka rifes insa koma jeskaseda Allah eita oufamofa gu rua. Beda Ofa obk rua sons jah rerin mod.
16Gij mona egema deika bera oforoka orna egens en skoita Yesus. Beda ofa agot oida, "Akeina Guru, didif dita mar ongga oufamofa erek meidu jeskaseda disma eiteij ah ongga efeinah?"
17Beda Yesus oroun oida, "Bua bijeka gu Didif osok gij mar ongga erek oufamofa rot meidu? Allah ojgomu bera ongga oufamofa. Bua buroru mar nomnaga ongga Ofa anggot rot, beda bua bimesma eiteij ah ongga efeinah si."
18Beda ofa ejeka gu Yesus oida, "Mar ongga Allah anggot rot bera erek meidu?" Beda Yesus oroun oida, "Allah agot oida inagob rusnok enjgineg guru ni, inesiri morototuma guru ni, inoukoreka mar guru ni, inohurmei mar rot rusnok enjgineg guru ni,
19yugif gu yeyin iker jera isir ni, ita idou ongga okora rot yeyin ihujir morototuma erek idou okora rot isinsa ni."
20Beda orna egens koma agot oida, "Didif duroru mar insa koma nomnaga erek jeni fob. Jefeda didif dita mar egema tein erek meidu?"
21Beda Yesus agot gu ofa oida, "Erek bua budou os bita mar ongga oufamofa rot tenten, beda buhu bebin mareibra nomnaga ojgomu. Beda bikeba bebin fifi insa koma gu rusnok ongga rufojingki ojgomu. Bita mar erek koma beda bua bimesma bufons ongga ongkoska eteb gu mebaga si. Beda buroru Didif ojgomu."
22Nou ongga orna egens engg rot mar insa koma ongga Yesus anggot gu ofa fob, beda ofa oksons jah efen mod rot osum oskusk ojgomu. Jeska ofa bera erek orna mei ahta eteb.
23Beda Yesus agot gu efen ruforoker oida, "Ongga tenten bera okum eteb nou rusnok ongga ruisum gij rerin mareibra ofoukou jeskaseda ruira jera rusnok ongga Allah ofoka ereij keingg.
24Didif dagot juens deika oida, okum eteb nou unta efaga egens oira mohunu mos esta. Tina okum ekirsa nou rusnok ongga ruisum gij rerin mareibra ofoukou jeskaseda ruira jera rusnok ongga Allah ofoka ereij keingg ojgomu."
25Nou ongga Yesus efen ruforoker rig rot mar insa koma, beda rua rudou oubsaha eteb. Jefeda rua ragot oida, "Jefeda Tuhan, idu bera omoira jera rusnok ongga Allah ofoka ereij keingg erek komo?"
26Beda Yesus orumba gij rua beda agot oida, "Tenten, oisouska rusnok risinsa rerin owesa efek bera enadaij guru. Tina oisouska Allah efen owesa efek bera rusnok rimeita eiteij ah ongga efeinah si."
27Beda Petrus agot oida, "Tuhan, memef maha mefmen mar nomnaga jah fob jeskaseda mororu Bua ojgomu. Jefeda memef memesma mar erek meidu?"
28Beda Yesus agot gu rua oida, "Kef bera tenten oida, gij mona ongga Didif, Rusnok Efesa, dingker gu mebaga jeskaseda dufoka ereij keingg rusnok rot dufoka ongga aksa eteb, beda iwa ongga irek dedin ruforoker rufok setka kungkob erfeka bera imeker jera Didif jah suma tein. Beda iwa imofoka ereij keingg rusnok jeska Yahudi efen ebic setka kungkob erfeka si.
29Rusnok nomnaga ongga raha rerin mod ni, mokoser jera meyeser ni, meka jera mosu ni, riser ni, rerin mekeni ni, jeskaseda ruroru Didif ojgomu, beda rua rimesma mar insa koma nomnaga rot ofosma wuntin egens ekirsa deika gij rerin riteij ah ainsa kef. Noba rua rimesma eiteij ah ongga ah aibin ojgomuja tein.
30Tina rusnok ongga ruhca rufoka ongga aksa gij mona ebeibeyaif bera runofoka aksa gij mona ongga emen deika guru. Noba rusnok ongga runohca rufoka ongga aksa gij mona ebeibeyaif guru, rua bera rimesma rufoka ongga aksa gij mona ongga emen gij mona kahma si."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel