1Erek koma beda Yesus eifef meg egens noba oksons jah meren enama. Beda Ofa ecira jah Ofa efen kota.
2Jah suma bera rusnok rurka osnok egens esij mofka skoita Yesus. Osnok egens koma aki emageima. Nou ongga Yesus ek rot oida rudou ororu Ofa rot tenten fob, beda Ofa agot gu osnok egens koma ongga aki emageima oida, "Edesa, bua binemeesa guru. Jeska Didif dusuna rot bebin mar ongga oska jeska budou efesi."
3Beda rusnok rineya ongga rirek Guru agama jah suma ragot moguma oida, "Mar ongga Ofa kef anggot fob bera erek Ofa ohurmei mar skoita Allah!"
4Yesus ejginaga rot mar ongga rua ragot moguma, jefeda Ofa agot gu rua oida, "Teinefa fogora iwa insujohu rot mar ongga ofogog erek komo.
5Erek Didif dagot gu ofa oida, 'Bebin mar ongga oska bera dunsuna rot,' beda koma onorocunc rot mar egema tein guru. Tina erek Didif dagot gu ofa oida, 'Bua bidebecki noba bija jah bebin mod,' beda koma orocunc rot dedin owesa efek eteb. Jefeda Didif dumocunc gu iwa rot oida, Didif ongga Rusnok Efesa, bera dedin owesa efek gu mebif jeskaseda dusuna rot rusnok rerin mar ongga oska." Erek koma beda Yesus agot gu osnok egens koma ongga aki emageima oida, "Bua bidebecki, bita bebin meidibi beda bicira baki jah bebin mod."
6(9:5)
7Ainsa koma tein, osnok egens koma edebecki beda ecira aki jah efen mod rot eskeira.
8Nou ongga rusnok jah suma rik mar insa koma, beda rudou emeesa rot Yesus efen owesa efek eteb. Beda rua risitit Allah ofoka jeska Ofa eita owesa efek insa koma gu Yesus.
9Erek koma beda Yesus eja jeska monuh insa koma. Noba askesi Ofa ecira ros, beda Ofa ek didif, dusnok Yahudi egens ongga dufoka Matius. Didif bera erek osnok egens ongga ohoturu pajak jeska rusnok Yahudi enjgineg nou raja Kaisar ongga ofoka ereij keingg monuh Israel. Gij mona insa koma didif dingker gij dedin kantor. Beda Yesus agot gu didif oida, "Bua buroru Didif." Beda didif durogna jeska kantor koma noba duroru Ofa ojgomuja.
10Yesus eja jah dedin mod jeskaseda et maat morototuma jera didif. Noba rusnok ongga ruhoturu pajak jera rusnok enjgineg ongga rusnok Yahudi rusujohu bera erek oska tein rin noba rit maat morototuma jera Yesus gij dedin mod.
11Beda rusnok Yahudi ongga ebic Farisi rineya rik rot mar insa koma. Jefeda rua ragot gu Yesus efen ruforoker oida, "Teinefa fogora yeyin Guru et maat morototuma jera rusnok ongga oska erek komo!"
12Yesus eg rua ragot mar insa koma, jefeda Ofa agot gu rua oida, "Rusnok ongga rifaga eskeira bera runohca dokter guru. Tina rusnok ongga marenir bera ruhca dokter ojgomu.
13Iwa isujohu osok gij mar kef ongga runggu gij Mar Efeyi Ebsi rot efen ofou ojgomu. Runggu rot oida, 'Didif dunodou os rot marska ongga iwa irougif gu Didif rot guru. Tina Didif dudou os jeskaseda rusnok rucunc rudou ongga oufamofa moguma ojgomu.' Didif dinen jeskaseda ducunc rusnok ongga rufra risinsa rufoka aksa erek dedin ruforoker guru. Tina Didif din jeskaseda ducunc rusnok ongga iwa incunc erek oska erek dedin ruforoker ojgomu."
14Erek koma beda Yohanes ongga eita baptis gu rusnok, efen ruforoker ongga rin skoita Yesus. Beda rua ragot gu Ofa oida, "Akeina, memef ongga mororu Yohanes jera rua ongga ebic Farisi tein bera menet maat gij mona juens guru jeskaseda mom meiteij gu Allah ojgomu. Tina Bua bebin ruforoker rineita mar erek koma guru. Koma rot meidu?"
15Beda Yesus era mar ongga orocunc jeskaseda oroun gu rua rot mar insa koma. Ofa agot oida, "Gij mona ongga rusnok ruina maat keingg rot igers egens ongga oskotu arja fob, beda rua rudou onokum rot guru, noba rua rinebisa rot gij mona insa koma tein guru. Tina gij mona egens ongga emen, beda orna egens ongga oskotu arja insa koma emeja jeska rua si. Beda gij mona insa koma bera rua rimeita rudou ongga okum fogora rinet maat gij mona juens guru tein.
16Erek rusnok rib meifeti ongga efeinah jera meifeti ongga efeyei beda koma enadaij guru. Jeska meifeti ongga efeinah koma emegrina meisoufa ongga efeyei insa koma fogora emebga eteb deika.
17Erek koma tein, anggur efei ongga efeinah bera runotkinaja gij mesina kambing ofos ongga efeyei guru. Jeska anggur efei ongga efeinah koma bera emefifij gij mesina kambing ofos ongga efeyei insa koma. Beda mesina koma emecka rot, noba anggur efei insa koma omotkinaja jeska. Noba mesina ongga efeyei insa koma bera eja erek oska ojgomu. Tina anggur efei ongga efeinah bera rutkinaja gij mesina kambing ofos tein ongga efeinah ojgomu jeskaseda egeka tein ah rot ahais ojgomu."
18Askesi Yesus efesij rot mar insa koma gu rua ongga ebic Farisi ros, beda ebirfaga Yahudi egens en skoita Yesus. Beda ofa es okeibi gu mebi noba ebisa rot gu Ofa oida, "Dedin edesa ojaga agos fob. Tina erek Bua bin noba baha bitma esij ofa, beda dudou ororu rot tenten oida ofa efena ebah sons deika si."
19Jefeda Yesus eja jera ofa jah efen mod. Noba Ofa efen ruforoker ruroru Ofa jah suma tein.
20Askesi Yesus encira gu moroju ros, beda ojaga egens tein bera ecira otoij Ofa. Ofa erek maren tein, jeska efen mesta eba ojgomuja gij tahun rara setka kungkob erfeka fob. Ofa osujohu gij odou efesi oida, erek ofa ahtec Yesus efen meisoufa, beda efen efaga emeita eskeira rot si. Jefeda ofa en doida Yesus ejmeg beda ahtec Ofa efen meisoufa.
21(9:20)
22Beda Yesus ekikif noba eyajga ofa. Beda Ofa agot oida, "Edesa, bua binemeesa deika guru. Budou ororu Didif rot tenten fob, jefeda bua bita eskeira fob." Beda ainsa koma tein ojaga egens koma efen efaga eita eskeira fob.
23Nou ongga Yesus ensaga gu ebirfaga Yahudi insa koma efen mod, beda Ofa ek rusnok ongga en suling ofou nou rusnok gij mona ongga rerin osnok egens anggos fob. Noba Ofa ek rot oida rusnok jah suma rudou oubsaha eteb noba ebisa rot ofa ongga anggos fob.
24Beda Ofa agot gu rusnok jah suma nomnaga oida, "Iwa nomnaga irogna jeska mer efesi kef ojgomu. Oforokai ojaga kef bera enagos guru. Ofa ahca ojgomu." Nou ongga rusnok jah suma rig Yesus agot mar insa koma beda rua rutut rot Ofa, jeska rua rijginaga rot oida oforoka egens koma bera anggos rot tenten fob.
25Tina nou ongga rua insa koma rurogna jeska mer efesi fob, beda Yesus oira gij mer efesi koma. Beda Ofa agei oforoka egens koma efen etma. Beda ainsa koma tein oforoka egens koma efena ebah sons.
26Jefeda rusnok rufoukou rifesij rot mar onswos koma gij kota-kota ongga angh rejrej monuh insa koma.
27Nou ongga koma oisa fob beda Yesus eja jeska monuh insa koma. Noba askesi Ofa ecira gu moroju ros, beda gosnok gegeka ongga geiteij ofou gororu gotoij Ofa. Beda goga gagerir gu Ofa oida, "Bua ongga bunjuj jeska raja Daud, bucunc budou ongga oufamofa skoita magefo!"
28Nou ongga Yesus oira gij mod efesi, beda gosnok gegeka insa koma gen skoita Ofa. Beda Ofa ejeka gu goga oida, "Goga godou ororu rot tenten oida Didif dedin owesa efek ongga adaij jeskaseda dita eskeira gu goga ei?" Beda goga gagot oida, "Tuan, madou ororu mar koma rot tenten!"
29Beda Yesus ahtec goga geiteij noba agot oida, "Iwa isma eskeira jeni erek idou ongga ororu Didif rot ojgomu."
30Beda ainsa koma tein goga geiteij eskeira noba goga gek mar fob. Beda Yesus eyahehir joug rua rot ahais oida, "Goga genagot rot mar insa koma gu rusnok egema tein jinaga guru."
31Tina gij mona egema deika, beda goga geja rejrej monuh insa koma noba gefesij gu rusnok rufoukou osok gij mar ongga Yesus ontunggom insa koma nou goga fob.
32Nou ongga goga insa koma geja jeska Yesus fob, beda rusnok ruroun orna egens ongga erek osumu skoita Yesus, jeska efena ofogog oira gij efen odou efesi fob.
33Nou ongga Yesus ekemeji efena ofogog insa koma jeska ofa, beda osnok egens koma eita eskeira fogora agot mar deika sons. Beda rusnok rufoukou rudou oubsaha eteb rot. Rua ragot oida, "Wah! Mimif minek mar onswos egema tein ongga erek koma gij monuh Israel jinaga enesi!"
34Tina rusnok Yahudi ongga ebic Farisi ragot oida, "Ebirfaga efena ofogog bera ongga eita owesa efek gu Yesus fogora Ofa ekemeji efena ofogog jeska rusnok ojgomu."
35Yesus ojogog rusnok ongga ringker gij kota-kota ongga angh gij monuh Galilea. Ofa oftuftu mar gij rerin mod ongga rua rum riteij gu Allah gij ni. Ofa efesij mar gu rusnok osok gij Allah efen oga ongga oufamofa jera osok gij mona ongga Allah omofoka ereij keingg rusnok tein ni. Ofa eita eskeira gu rusnok rot mar nomnaga ongga orotunggom rua erek marenir tein.
36Ofa eyajga rusnok rufoukou insa koma, noba Ofa odou okora eteb rot rua. Jeska rua bera erek rimeesa noba rerin owesa efek jeskaseda rufij risinsa rot jinaga guru. Rua bera erek domba-domba ongga rusnok egema tein runot joug guru.
37Ofa ek rusnok erek insa koma jefeda Ofa agot mar ongga erek orocunc gu efen ruforoker erek kef oida, "Maat efek ongga angh gu mekeni bera erek ofoukou doska. Tina rusnok ongga rumohoturu maat efek insa koma bera erek oskiyai ojgomu.
38Jefeda iwa yum iteij gu Ofa ongga efen mekeni insa koma jeskaseda Ofa omobk rusnok dokun deika fogora rua tein rumohoturu efen efek si."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel