Alkitab Mobile SABDA
[VER] : [MEYAH]     [PL]  [PB] 
 <<  Markus 4 >> 

1Yesus ot doida meren Galilea efembra jeskaseda oftuftu mar gu rusnok deika. Rusnok rufoukou ongga rin odudu deika skoita Ofa jah suma. Rua nomnaga bera erek rufoukou doska, jefeda Ofa eifef meg egens jeskaseda oftuftu rusnok insa koma ongga rut jah meren efembra.

2Beda Ofa efesij mar ofoukou ongga erek orocunc rot gu rua.

3Ofa agot oida, "Iwa ig mar ongga Didif dimefesij kef rot iskusk noba isujohu rot mar insa koma efen ofou ojgomu. Osnok egens ongga ef efen mekeni eja noba era maat efej erebirma.

4Askesi ofa era maat efej insa koma enerebirma ros, beda eneya ongga ensiri gu moroju. Beda mem rin noba rit maat efej insa koma.

5Beda eneya ongga ensiri gu mebi ongga mamu tuturu. Beda maat efej insa koma er ebeirens jeska mebi erek oskiyai noba orohu mamu tein. Tina nou ongga mowa orogna noba edi maat efej insa koma, beda maat koma efej nomnaga ojgomu, jeska maat efej insa koma ener gij mebi ongga erek eteb guru.

6(4:5)

7Beda maat efej eneya tein ongga ensiri gij moworug ofogog. Noba moworug ofogog insa koma er morototuma jera maat efej koma. Tina moworug koma eij keingg maat efej jefeda enefek guru.

8Beda maat efej eneya tein ongga ensiri gij mebi ongga ofogu rara. Beda maat efej insa koma er erek ongkoska ojgomu noba enjefek erek ofoukou doska. Noba egema ongga enjefek erek ofoukou tein. Noba egema ongga enjefek erek adaij nou tein."

9Nou ongga Yesus emfesij mar ongga orocunc insa koma gu rua fob, beda Ofa agot deika gu rua oida, "Iwa ongga ingg mar ongga Didif danggot insa kef rot iskusk fob, beda isujohu rot mar insa koma efen ofou ojgomu."

10Nou ongga Yesus ejeker gu esinsa, beda efen ruforoker rufok setka kungkob erfeka jera rusnok enjgineg tein ongga ringg mar ongga Ofa oftuftu insa koma bera rija skoita Ofa. Beda rua rijeka gu Ofa rot mar ongga orocunc insa koma efen ofou.

11Beda Ofa agot gu rua oida, "Didif dimfesij gu iwa rot teinefa Allah ofoka ereij keingg efen rusnok fob. Tina rusnok enjgineg ongga runoira gij rusnok ongga Allah ofoka ereij keingg enesi bera rudou enebriyi gij mar insa koma efen ofou rot tenten enesi, jeska mar koma bera ah jejema jeska rua ros.

12Erek koma jeska sis fob nabi egens anggot mar osok gij rua oida, 'Rua riteij ah keingg mar ongga didif dutunggom, tina rudou enebriyi gij efen ofou guru. Noba rua rig mar ongga didif danggot, tina rudou enejginaga rot mar koma efen ofou tein guru. Jefeda rua rinemeesa joug rot rerin mar ongga oska guru. Erek koma jefeda Allah onosuna rot rerin mar ongga oska koma jeska rudou efesi guru.' "

13Erek koma beda Yesus agot gu rua deika oida, "Didif dudou okum rot iwa jeska idou enebriyi gij mar ongga durocunc rot insa koma efen ofou enesi. Jefeda idou enebriyi gij mar ongga orocunc enjgineg ongga dimefesij gu iwa tein guri.

14Jefeda Didif dimagot gu iwa rot orocunc insa koma osok gij maat efej efen ofou. Osnok egens ongga era maat efej erebirma insa koma bera erek osnok egens ongga efesij rot Allah oga ongga oufamofa.

15Maat efej ongga ensiri gu moroju insa koma bera erek rusnok ongga rig rot Allah oga insa koma. Nou ongga rua ringg rot oga insa koma fob, beda ainsa koma tein Bilis en noba ereni rudou rot ahais jeskaseda rudou ofoj joug rot Allah efen oga insa koma nomnaga ojgomu.

16Noba maat efej ongga ensiri gij mebi ongga mamu tuturu insa koma bera erek rusnok ongga rig rot Allah oga noba ruroun efen oga insa koma rot rudou ongga efaga ouka eteb.

17Tina rua rinesah Allah efen oga insa koma gij rudou efesi rot ahais guru. Jefeda gij mona ongga mar okum ereneni rua, era rusnok rita mar ongga oska skoita rua, beda rua raha Allah oga insa koma jah noba runororu deika guru.

18Maat efej ongga ensiri gij moworug ofogog insa koma bera erek rusnok ongga ringg rot Allah oga fob. Tina rua rusujohu ekirsa rot maat ongga rimet, jera meisoufa ongga rimergi ojgomuja. Noba rua tein rudou erebibei rot mareibra ofoukou ojgomuja jera rot rerin riteij ah insa kef tein ojgomu. Jefeda mar insa koma nomnaga of joug rudou efesi ojgomu fogora rua runosujohu rot Allah oga insa koma deika guru.

19(4:18)

20Noba maat efej ongga ensiri gu mebi ongga ofogu rara insa koma bera erek rua ongga ringg Allah oga noba rinsah efen oga insa koma rot koisoisa gij rudou efesi. Jefeda rua rutunggom mar ofoukou ongga oufamofa eteb erek maat efej insa koma ongga efen efek ofoukou ongga oufamofa."

21Beda Yesus agot rot mar ongga orocunc gu rua deika oida, "Rusnok ongga ris mah gij lampu bera runocohun lampu ongga eisa insa koma guru. Noba rua tein rinaha lampu ongga eisa insa koma jah mebera obohoh guru. Ongga tenten bera rua raha lampu insa koma rot tomnomna jah skidameda ojgomu.

22Erek koma tein, mar nomnaga osok gij Allah oga ongga angh jejema jeska rusnok gij mona ebeibeyaif bera rua rimejginaga rot gij mona kahma si. Mar koma osok gij Allah oga ongga iwa ijginaga rot fob bera gij mona kahma rusnok enjgineg tein rimejginaga rot si.

23Jefeda iwa isujohu rot iskusk osok gij mar ongga Didif dimfesij rot gu iwa fob ojgomu.

24Erek koma jefeda iwa ig noba isujohu rot iskusk osok gij mar kef ongga Didif dimfesij rot gu iwa. Jeska erek iwa isujohu rot iskusk, beda Allah omofij iwa jeskaseda idou ebriyi gij mar insa koma efen ofou. Noba Ofa tein emeita idou ongga ebriyi gij ekirsa gij mar insa koma si.

25Jeska erek iwa isujohu rot iskusk osok gij mar insa koma efen ofou fogora idou ebriyi gij, beda Allah omofij iwa jeskaseda idou ebriyi gij rot ekirsa deika. Tina erek iwa inosujohu rot iskusk osok gij mar insa koma efen ofou guru, beda mar ongga oskiyai insa koma tein ongga idou embriyi gij fob bera emeseiseifa jeska iwa si."

26Beda Yesus agot gu rua deika oida, "Didif dimefesij mar ongga orocunc gu iwa rot teinefa rusnok ongga Allah omofoka ereij keingg bera rumogun odudu dokun deika. Koma bera erek osnok egens insa koma ongga era maat efej erebirma gij efen mekeni.

27Nou ongga ofa otunggom mar insa koma oisa fob, beda ofa onosujohu deika rot oida maat efej insa koma emer erek teinefa guru. Tina gij orofosut mona bera ofa ahca noba edebecki erek giskini ojgomu, noba maat efej insa koma er ojgomuja.

28Mebi ofogu koma bera otunggom maat efej insa koma fogora ener rot oufamofa. Beda maat efej insa koma ener ojgomuja onjoros efen efeyi ofokoku orogna fogora emfebi.

29Nou ongga maat efej insa koma emfek fob, beda ofa obk rusnok jeskaseda ruhoturu maat efek insa koma jeska mekeni. Erek koma tein, rusnok ongga Allah omofoka ereij keingg bera rumogun odudu dokun deika si."

30Yesus agot rot mar ongga orocunc gu rua juens deika oida, "Didif dimefesij mar osok gij mega moj efej egens jeskaseda durocunc gu iwa rot teinefa rusnok ongga Allah omofoka ereij keingg bera rumogun odudu dokun deika.

31Osnok egens erefa mega mos efej egens gij efen mekeni. Sismeni bera mega mos insa koma erek efej ai ojgomai.

32Tina mega mos efej insa koma er erek mega ongga akseij eteb fob. Beda mem ofoukou ojoka efem gij mega esta insa koma."

33Yesus efesij mar ofoukou ongga erek orocunc nou rusnok jeni erek rudou ebriyi gij rot mar koma ojgomu.

34Mar nomnaga ongga Ofa emfesij gu rua bera erek mar ongga orocunc rot ojgomu. Tina gij mona ongga Ofa eker jera efen ruforoker ojgomu, beda Ofa oftuftu gu rua rot koisoisa osok gij mar ongga orocunc insa koma nomnaga efen ofou.

35Gij mona insa koma tein erek moworu fob, beda Yesus agot gu efen ruforoker oida, "Mimif mija jah meren enama konj."

36Jefeda Ofa efen ruforoker rifef meg egens insa koma ongga Yesus engker gij jeska rusnok rufoukou ongga runt gu meren efembra. Beda rusnok enjgineg tein rifef meg egema noba ruroru Yesus jah meren enama insa koma.

37Nou ongga rua rinsaga gu mei ogbug, beda mof edebecki rot okuj ongga owesa eteb. Noba ainsa koma tein mei mojumu ofog ongga eteb endebecki noba edi meg rot rua onjoros mei mojumu efei embera gij meg rot rua fob.

38Askesi mof endi rua erek koma ros, beda Yesus ebirfaga erebgi moroirebi noba Ofa ahca ahaingkongka ojgomu gij meg osku. Tina Ofa efen ruforoker rimeesa eteb, jefeda rua rijebs Ofa. Beda rua ragot oida, "Akeina, ai juens beda meg omojuj rot mimif gu mei kefi! Bua binemeesa rot gurei!"

39Jefeda Yesus edebecki noba Ofa etaha joug mof ongga eteb insa koma, beda Ofa agot joug meren ofog eteb ongga endebecki insa koma tein. Beda ainsa koma tein mof esiri toumou noba meren ofog insa koma tein edeider sons.

40Beda Yesus agot gu rua oida, "Teinefa fogora iwa imeesa rot erek komo? Erek iwa idou inororu Didif rot tenten enesei!"

41Erek koma jefeda rua rudou oubsaha eteb rot Ofa fogora rua ragot moguma oida, "Ofa kef bera efen owesa efek eteb, jeska mof jera mei mojumu ofog tein ororu efen oga!"



 <<  Markus 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel