Alkitab Mobile SABDA
[VER] : [MEYAH]     [PL]  [PB] 
 <<  Roma 5 >> 

1Erek koma jefeda, oisouska mudou ongga ororu Allah oga rot tenten fob, beda Ofa oncunc mimif erek rusnok ongga rerin mar ongga oska oskiyai tein guru. Noba oisouska mar ongga Yesus Kristus ontunggom nou mimif fob bera Allah odou onokum rot mimif deika guru.

2Noba Yesus Kristus bera ongga oroun mimif skoita Allah. Jefeda ebeibeyaif Allah ocunc efen odou ongga eskeiramera skoita mimif ojgomuja. Noba mar koma tein bera en oisouska mudou ongga ororu Yesus Kristus rot tenten fob. Jefeda mimif mudou efaga ouka eteb rot noba muisum gij Allah, jeska Ofa omfra mifmin mufoka erek aksa morototuma erek Ofa efen ofoka ongga aksa tein fob.

3Erek koma tina, askesi mar okum ereneni mimif ojgomuja ros, beda mimif mudou onokumkum rot guru. Tina mimif mug mijmeg rot noba mudou eskeira rot tein ojgomu. Jeska mar okum insa koma bera oroftuftu mimif jeskaseda muin keingg mudou efesi gij mona ongga mar okum ereneni mimif ojgomuja.

4Beda oisouska mar insa koma bera Allah odou eskeira rot mimif. Noba oisouska Allah odou ongga eskeira rot mimif bera mimif muisum gij Ofa rot oida Ofa omocunc efen oufamofa eteb gu mimif si.

5Mar insa koma bera oroufij mimif jeskaseda mifena enesiri rot guru. Jeska oisouska Efena Ebsi, ongga Allah ombk skoita mimif, bera Ofa oncunc rot oida Ofa odou okora eteb rot mimif.

6Erek koma, jeska askesi mimif mingker gij mifmin mar ongga oska ros, beda enadaij nou mimif musuwa misinsa jeska mar ongga okum insa koma guru. Beda Yesus Kristus anggos nou rusnok nomnaga fob. Ofa otunggom mar insa koma gij mona ongga Allah oga eris rot.

7Erek giskini bera rusnok rinaha risinsa jeskaseda ragos tumu ruhujir guru. Noba erek rusnok rineya ongga rudou ocosu efei ahtah eteb tein, beda rua ragos tumu ruhujir ongga rerin mar ongga oufamofa ei era gurei.

8Erek koma tina Allah oncunc efen odou ongga okora eteb rot mimif fob. Jeska askesi mimif mingker gij mifmin mar ongga oska ros, beda Yesus Kristus anggos nou mimif.

9Noba oisouska efen ogufu ongga eya jeska efen efaga tumu mega salib bera Allah oncunc mimif erek rusnok ongga rerin mar ongga oska oskiyai tein guru. Jefeda koma bera orocunc erek ekirsa rot oida Yesus omoskotu mimif jeska mar okum ongga Allah omofra keingg rusnok rot odou ongga otkonu oska gij mona kahma si.

10Sis fob bera mimif mita mar erek rusnok ongga rufogog skoita Allah ojgomu oisouska mifmin mar ongga oska. Tina ebeibeyaif oisouska efen efesa Yesus Kristus ongga anggos tumu mega salib nou mimif fob bera Allah eita odou ongga eskeiramera rot mimif. Noba ongga oufamofa ekirsa bera, oisouska Yesus Kristus ongga efena ebah sons fob, Ofa omoskotu mimif jeska Allah efen mar okum si.

11Noba erek koma tein, mimif mudou efaga ouka eteb rot mar ongga Allah ontunggom nou mimif oisouska mifmin Tuhan Yesus Kristus. Ofa bera ongga oroun mimif skoita Allah rot mudou ongga eskeiramera ojgomu.

12Erek koma jefeda iwa isujohu rot kef oida, gij mona ongga sismeni bera Adam otunggom mar ongga oska fob. Jefeda Allah oga ojga rot oida ofa emagos rot ojgomu. Noba rusnok nomnaga bera runjuj jeska Adam. Jefeda rusnok nomnaga rerin mar ongga oska noba rimagos rot tein. Adam anggos rot efen mar ongga oska, jefeda rusnok nomnaga ragos rot rerin mar ongga oska tein. Erek Koma jeska oisouska mar ongga oska ongga Adam otunggom fob, bera rusnok nomnaga runtunggom mar ongga oska fob.

13Noba gij mona ongga Allah eneita hukum gu rusnok enesi, beda rusnok ruroru mar ongga oska fob. Tina erek hukum egema enah enesi, beda Allah onocunc rusnok erek oska rot rerin rita mar ongga oska insa koma tein enesi.

14Tina sis mona ongga Adam efena ebah ros onjoros mona ongga Musa efena ebah bera rusnok nomnaga ruroru mar ongga oska fob, jefeda rua ragos rot ojgomu. Noba mar ongga rusnok runtunggom ongga erek oska bera toga jeska mar ongga Adam ontunggom gij mona ongga ofa okoja rot Allah oga. Tina rusnok nomnaga ragos rot rerin mar ongga oska insa koma morototuma erek Adam ojgomu. Noba gij mona ongga Adam ontunggom mar ongga oska, beda koma orok mokcin rusnok nomnaga morototuma erek mar ongga Yesus omotunggom omorok mokcin rusnok gij mona ongga Ofa emen tein.

15Tina mar ongga gosnok gegeka insa koma gontunggom bera erek toga toga ojgomu. Jeska oisouska mar ongga Adam ontunggom fob bera rusnok nomnaga rimagos rot ojgomu. Erek koma tina Allah bera oncunc efen odou ongga oufamofa eteb skoita mimif. Jefeda oisouska mar ongga Yesus Kristus ontunggom rot odou ongga oufamofa skoita mimif bera rusnok nomnaga rimesma rudou ongga ebsi komowa rot tein.

16Mar ongga Allah ontunggom rot odou ongga eskeiramera bera enerek mar ongga Adam ontunggom ongga erek oska guru. Jeska oisouska mar ongga Adam ontunggom fob bera Allah oga ojga rot oida rusnok nomnaga ragos ojgomu. Tina oisouska mar ongga Yesus Kristus ontunggom fob rot odou ongga oufamofa, bera Allah onsuna rot rusnok rerin mar ongga oska fogora rua risma rudou ongga ebsi komowa.

17Jeska mar ongga Adam ontunggom sis fob bera rusnok nomnaga ragos rot ojgomu. Enadaij nou mimif musuwa misinsa jeska mar koma jinaga guru. Mar Koma bera ofoka ereij keingg mimif ojgomuja. Tina rusnok nomnaga ongga Allah oncunc erek rudou ebsi komowa fob bera rimesma mar ongga oufamofa eteb jeska Ofa gij rerin riteij ah ainsa kef tein si. Rerin mar ongga oska insa koma onofoka ereij keingg rua deika guru. Noba mar ongga oufamofa insa koma nomnaga bera en oisouska mar ongga Yesus Kristus ontunggom nou mimif fob. Allah eita mar koma rot oubji.

18Jefeda oisouska mar egens ongga Adam ontunggom fob ongga erek oska bera rusnok risma mar ongga okum rot jeska Allah. Tina erek koma tein, oisouska mar egens ongga Yesus Kristus ontunggom ongga erek oufamofa fob bera rusnok rita rudou ongga ebsi komowa ahah Allah eiteij. Jefeda rua rimesma eiteij ah ongga ah aibin ojgomuja.

19Erek koma tein, oisouska Adam ongga onororu jeni Allah oga guru bera rusnok rija erek rua ongga rerin mar ongga oska fob. Tina oisouska Yesus Kristus ongga ororu jeni Allah odou ejginaga rot bera rusnok rija erek rua ongga rerin mar ongga oska oskiyai tein jinaga guru.

20Erek koma jefeda Allah eita efen hukum gu Musa nou rusnok jeskaseda hukum koma omorocunc rot oida rusnok nomnaga rerin mar ongga oska fob. Tina askesi hukum Musa insa koma orocunc rot mifmin mar ongga oska erek ogun odudu deika, beda erek koma tein Allah ocunc efen odou ongga oufamofa eteb rot mimif erek ogun odudu deika tein.

21Sis fob, mifmin mar ongga oska bera efen owesa efek ongga ah keingg mimif ojgomuja fogora mimagos rot ojgomu. Tina Allah eita efen odou ongga oufamofa skoita mimif. Noba Ofa efen owesa efek ongga ekirsa jeska mar nomnaga. Noba oisouska efen owesa efek insa koma bera Ofa ocunc mimif erek efen rusnok ongga rerin mar ongga oska oskiyai tein guru. Jefeda mimif misma eiteij ah ongga ah aibin ojgomuja oisouska Yesus Kristus ongga erek mifmin Tuhan.



 <<  Roma 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel