Alkitab Mobile SABDA
[VER] : [MEYAH]     [PL]  [PB] 
 <<  Titus 2 >> 

1Erek koma, tina bua Titus buftuftu rot mar ongga tentenmen gu rusnok jah suma ojgomu.

2Buftuftu mar gu runer jeskaseda ribirfaga enerebibei rot mofut efei guru ni, rita mar rot rudou ongga ocosu efei ahtah ni, rut joug rudou efesi jeska mar ongga oska ni, ruroru Allah oga rot ahais ojgomuja ni, rita rudou ongga okora rot rusnok enjgineg erek tenten ni, rut rot ahais gij mar ongga ereneni rua ni.

3Beda bua bisisi joug rujoner jeskaseda rua tein rita riteij ah ongga ongkoska jeni rujager ongga ruroru Allah rot tenten fob. Enadaij nou rua ruga oruh rusnok enjgineg jinaga guru. Noba ribirfaga enerebibei rot mofut efei ojgomuja guru. Ongga oufamofa bera rua rucunc rot mar ongga erek oufamofa ojgomu

4jeskaseda rujowu enjgineg rimek fogora rimejginaga rot teinefa rua rudou okora rot rerin rahiner jera riser.

5Beda rujowu insa koma rumot joug rudou efesi jeska mar ongga oska fogora rimeita mar rot rudou ongga ebsi komowa ojgomu. Beda rua rifarur rot iskusk gij rerin mod etma noba rumougif gu rerin rahiner tein. Rua rita mar ongga oufamofa erek insa koma jeskaseda enadaij nou rusnok enjgineg ruga oruh Allah rot mar ongga rujager insa koma runtunggom ongga erek oska guru.

6Erek koma tein buis gu ruforoker runer jeskaseda rua tein rut joug rudou efesi rot ahais jeska mar ongga oska ojgomu.

7Bua bisinsa tein bita mar nomnaga ongga erek oufamofa ojgomu jeskaseda rusnok enjgineg jah suma rimek fogora rumororu mar insa koma tein. Noba gij mona ongga bua buftuftu mar, beda bagot mar insa koma rot budou ongga eriagamaga ojgomu, noba binagot mar ongga erek rourou gij mona insa koma guru.

8Bagot rot mar ongga erek tenten ojgomu jeskaseda enadaij nou rusnok enjgineg ruga onoruh bua rot guru. Bita mar erek koma jeskaseda enadaij nou rusnok enjgineg rik mar egema tein ongga bua buntunggom ongga erek oska jinaga guru. Beda mojenir rot mar ongga risinsa ranggot fob ojgomu.

9Beda bua bisisi joug rua ongga rumfij rerin ebirfager jeskaseda rua rugif gu ebirfager insa koma rot tenten. Noba rua rita mar rot rudou ongga ocosu efei ahtah tein ojgomu. Enadaij nou rua ragot mar esesa sons gu rerin ebirfager insa koma guru.

10Noba enadaij nou rua rukoreka mar jeska rerin ebirfager insa koma tein guru. Tina ongga oufamofa bera rua rucunc rot oida rerin rudou ongga aharukamoka noba ruroru mar nomnaga ongga rerin ebirfager insa koma ranggot rot ojgomu. Rua rita mar erek insa koma nomnaga jeskaseda rusnok enjgineg rimek fogora rimejginaga rot oida mar ongga mimif muftuftu osok gij Allah, ongga oskotu mimif, bera erek oufamofa ojgomu.

11Erek koma jeska Allah bera oncunc rot efen odou ongga oufamofa skoita rusnok nomnaga fob. Noba oisouska efen odou ongga oufamofa insa koma bera rusnok rimesma eiteij ah ongga efeinah si.

12Noba oisouska Allah odou ongga oufamofa insa koma bera mimif mijginaga rot oida munororu mar ongga eretei rot Ofa efen oga guru. Noba mimif mukoja mar ongga oska ongga oroku mudou efesi ojgomuja ni, mimif mut joug mudou efesi rot ahais gij mar koma nomnaga ni, mimif mita mar rot mudou ongga ebsi komowa ojgomu ni.

13Mimif mita mar insa koma nomnaga askesi mimif muisum gij mona ongga Ofa emen rot efen ofoka aksa eteb. Jeska gij mona insa koma bera mimif mimek Yesus Kristus ongga erek Allah. Ofa bera ongga onskotu mimif jeska mifmin mar ongga oska fob.

14Noba Ofa bera ongga aha esinsa gu rusnok ongga rufogog fogora agos. Ofa ontunggom mar koma jeskaseda osuwa mimif jeska mifmin mar nomnaga ongga ofogog. Beda oisouska mar insa koma bera Ofa ontunggom mimif erek efen rusnok ongga ebsi komowa fob. Jefeda mimif mudou os mita mar ongga oufamofa nou Ofa ojgomuja.

15Erek koma jefeda bua buftuftu rusnok jah suma rot mar insa koma nomnaga ojgomu. Bua bisisi joug rusnok rineya ongga rita mar ongga oufamofa, noba bagot joug rot buga ahais skoita rusnok rineya ongga rita mar ongga oska ros. Noba bita mar insa koma oisouska bebin owesa efek ojgomu. Enadaij nou rusnok egema tein rita rudou ongga oska rot mar ongga bua buftuftu insa koma jinaga guru.



 <<  Titus 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel