1Nou ongga mar insa koma oisa fob, beda didif dik malaikat egens jeska malaikat cinja erfeka insa koma ongga orka mongkei mos cinja erfeka en skoita didif. Beda ofa agot gu didif oida, "Bua bin beda didif dumocunc gu bua rot mar okum ongga emah keingg rusnok gij kota Babel ongga ofoka eiskiskma. Jeska rua bera ongga rudou eftirir keingg rot mar ofoukou erek ojaga eja motu egens ongga odou eftirir keingg runer rufoukou. Kota Babel koma bera ongga angh doida mei mosu ofoukou.
2Raja-raja mebif nomnaga rinsiri morototuma jera rusnok insa koma fob. Noba rusnok mebif ruroru rerin mar ongga oska efekeifa ojgomuja, erek rusnok ongga rudou erebibei rot mofut efei ojgomuja."
3Erek koma beda, Efena Ebsi eita owesa efek gu didif fogora didif dik mar erek malaikat egens ongga oroun didif jah monuh egens ongga mebi oska. Beda didif dik mar egens ongga erek ojaga egens engker esij mar egens ongga ofogog noba efena ebah. Mar koma efen efeb titnetna erek ekenkeni. Noba runggu mar ofoukou tumu efen efaga ongga erek ruga oruh mar rot Allah. Noba ojaga egens koma efen ebirfaga cinja erfeka jera oubukum setka.
4Noba ofa ergi meifeti ongga efera osok eteb noba ongga efen efeb titnetna erek esjiji jera ekeni ofom ahta. Noba mar ongga erek emas jera mamu ongga eirirbi eteb noba efen efera osok eteb jera siriow efej ongga efen efera osok eteb doska bera ruroumna tumu efen meisoufa. Noba ofa agei mok osku ongga runtunggom jeska emas tumu etma. Noba mar ongga angh gij mok osku insa koma bera erek orocunc rot efen mar ongga oska efekeifa jera rot teinefa ofa ensiri morototuma jera runer rufoukou tein.
5Noba mar ongga runggu tumu efen eitoufu ongga erek ah jejema jeska rusnok enjgineg riteij bera efen ofou erek kef oida, "Mar kef bera ah jejema jeska rusnok riteij. Ofa bera erek orocunc rot rusnok ongga ringker gij kota Babel ongga ofoka eiskiskma. Ofa bera erek ebic ongga rujager rija motu nomnaga jera mar ongga oska efekeifa ongga orogna jeska mebif efesi."
6Beda didif dik ojaga egens insa koma odou erebibei noba odou efaga ouka rot Allah efen rusnok ongga ofa anggob sis fob. Rusnok insa koma ongga ofa anggob fob bera erek rua ongga rimfesij mar rot Yesus Kristus oga sis fob. Nou ongga didif dik ojaga egens insa koma beda didif dudou oubsaha eteb rot.
7Beda malaikat egens insa koma agot gu didif oida, "Bua budou onoubsaha rot ojaga egens koma guru. Jeska didif dimefesij osok gij ojaga egens insa koma ongga eifef esij mar ongga ofogog insa koma ongga efen ebirfaga cinja erfeka jera oubukum setka insa koma rot efen ofou gu bua si.
8Mar ongga ofogog insa koma ongga bua bingk bera angh gu mebif sis fob. Noba ebeibeyaif ofa eja jeska fob. Tina gij mona kahma, beda ofa omorogna jeska mebi efesi ongga eteb sons si. Erek koma tein rusnok mebif rimek mar ofogog insa koma, beda rua rudou omoubsaha eteb rot. Jeska sis fob rua rik mar ofogog insa koma efena ebah ros. Noba ebeibeyaif rua rinek ofa deika guru. Tina gij mona kahma beda rua rimek ofa deika si. Beda gij mona insa koma Allah emeij ofa gij mahmei meren. Rua ongga rudou oubsaha rot mar ofogog insa koma bera Allah onogu keingg rerin rufoka gij Ofa efen buku eiteij ah gij mona ongga Ofa onotunggom mebif enesi guru.
9Bua bireni rot iskusk jeskaseda budou ebriyi gij mar kef efen ofou erek kef: Mar ofogog insa koma ongga efen ebirfaga cinja erfeka bera orocunc rot mar ofoka egeka. Mar ofoka egens bera memaga ofog oduma cinja erfeka ongga ojaga egens insa koma engker esij. Noba mar ofoka egeka bera raja cinja erfeka tein.
10Noba raja cinja insa koma bera rerin owesa efek ensiri fob. Noba egens enofoguma ros. Noba egens bera enen enesi. Tina gij mona ongga ofa en, beda ofa omofoka ereij keingg rusnok gij mona ongga estir ojgomu.
11Noba mar ofogog egens insa koma ongga engker sis fob, noba ongga rusnok rinek ofa deika guru, ofa bera erek raja ongga cinja orfomu ongga omokahma otoij raja cinja erfeka insa koma. Noba ofa bera Allah emeij gij mahmei meren tein si.
12Noba oubukum setka ongga bua bingk insa koma bera orocunc rot raja setka ongga runofoka ereij keingg rusnok enesi. Rua bera rimesma owesa efek jeskaseda rufoka ereij keingg rusnok morototuma jera mar ofogog egens insa koma. Tina rua rumofoka ereij keingg rusnok gij mona ongga ai estir ojgomu.
13Raja ongga setka insa koma bera rumofoka ereij keingg rusnok rot rudou ongga erek egens ojgomu. Noba rua rumofij mar ofogog egens insa koma rot rerin owesa efek tein.
14Beda rua rimeja rimedima jera Ofa ongga erek Allah efen Domba Efer. Tina Domba Efer omoin keingg rua nomnaga ojgomu, jeska Ofa bera ongga erek Tuhan, ongga erek ebirfaga eteb ekirsa jeska mar nomnaga. Noba Ofa bera erek raja ongga ekirsa jeska raja-raja nomnaga tein. Noba rusnok ongga rumororu Ofa gij mona insa koma bera rua ongga Ofa enjeka erek efen ruforoker sis fob. Rua bera ongga Ofa ocunc erek efen rusnok ongga ruroru Ofa rot tenten fob."
15Beda malaikat egens agot gu didif deika oida, "Mei mosu ofoukou ongga bua bingk ojaga eja motu engker doida insa koma, mei koma bera orocunc rot rusnok rufoukou jera rusnok ebic rufoukou, jera monuh ofoukou, jera ruga rusnok ofoukou.
16Noba mar ofogog jera oubukum setka ongga orocunc rot raja cinja erfeka insa koma bera rudou ofogog rot ojaga eja motu egens insa koma. Beda rua rimekris efen mareibra nomnaga jeska ofa ojgomu fogora ofa eker rot ofos robrob ojgomu. Beda rua rimet ofa efen ofogu tein, noba rumokub efen efaga tein gij mah ojgomu.
17Rua rimeita mar erek insa koma jeska Allah bera ensah mar koma gij rudou efesi fob jeskaseda rua rutunggom mar jeni Ofa odou ejginaga rot ojgomu. Jefeda Allah oitij rot oida mar ofogog insa koma ofoka ereij keingg rusnok rot owesa efek onjoros mona ongga Allah efen oga ongga Ofa anggot rot sis fob bera ah gij efera fob.
18Noba ojaga eja motu egens ongga bua bingk insa koma bera orocunc rot rusnok gij kota Babel ongga efen ofoka eiskiskma eteb. Jeska rusnok gij kota insa koma bera ongga ofoka ereij keingg raja-raja mebif."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel