Alkitab Mobile SABDA
[VER] : [MEYAH]     [PL]  [PB] 
 <<  Wahyu 9 >> 

1Beda malaikat ongga cinja bera en manghi mei oga ongga cinja deika. Beda ainsa koma tein didif dik malaikat egens ongga erek mensir efaga ongga ensiri gu mebif sis fob. Ofa esma gusin jeskaseda orohoda moksu ongga eja ah degini kemb montouj jeska.

2Nou ongga ofa ohoda moksu insa koma efen montouj jeska fob, beda mah efeb ofoukou orogna jeska moksu efesi insa koma. Mah efeb insa koma ofoukou doska erek mocgoj ofog ongga ocohun monuh ofoukou. Jefeda mowa jera mebaga eja erek motkobah.

3Beda mof ofoukou orogna jeska mah efeb insa koma noba rujuj rejrej mebif nomnaga. Noba mof insa koma efen owesa efek jeskaseda eska rusnok morototuma erek mouma ofon ongga eska rusnok.

4Beda riyahehir joug mof ofoukou insa koma jeskaseda rinet mofombra era marfok era mega egema tein guru. Tina riska rusnok ongga Allah enaha mar insa koma tumu ritoufu guru. Ofa aha mar insa tumu efen rusnok ritoufu ojgomu ongga erek orocunc rot idu ongga Ofa efen rusnok.

5Noba mof ofoukou insa koma rinesma owesa efek jeskaseda riska rusnok insa koma onjoros ranggos rot guru. Tina rua riska rusnok insa koma jeskaseda rua rufogu okora ojgomuja gij mesta rara cinja. Mof ongga eska rusnok insa koma rita rufogu okora ahais doska morototuma erek mouma ofon ongga eska rua ojgomuja.

6Noba gij mona insa koma bera rusnok rudou os ragos ojgomu, tina guru. Rua rifena ebah askesi mar insa koma enska rua ojgomuja ros. Rua rujohca moroju nou jeskaseda ragos, tina guru.

7Noba mof ongga ofoukou insa koma bera rinsejah nou rija skoita rusnok mebif erek kuda ofoukou ongga rusnok rifef fogora rija rimedima. Noba mof insa koma bera rirgi manggem ongga erek emas tumu ritoufu. Noba rusum bera erek rusnok rusum tein.

8Ribirfaga efeji bera erek rujaga ribirfaga efeji ojgomu. Noba rerin rufon bera erek singa efen ofon ongga akseij doska.

9Noba mof insa koma rerin mar erek monska ofos ontumba ongga erek besi. Nou ongga mof ofoukou insa koma rumfu fob, beda rifembra ofou ogugur eteb doska. Koma erek kuda eskembemba ongga rusnok rifef jeskaseda rija rimedima fogora ogugur eteb doska tein.

10Noba rerin ruiraga ongga eska rusnok erek mouma ofon eska tein. Noba rua tein rerin owesa efek nou riska rusnok mebif fogora rita rufogu okora eteb ojgomuja gij mesta cinja.

11Noba rerin ebirfaga bera malaikat egens insa koma ongga ohoda moksu montouj insa koma. Ofa efen ofoka gij Yahudi oga bera Abadon. Noba gij Yunani oga efen ofoka bera Apolion. Ofoka koma efen ofou oida, "Ofa ongga onghoda mar rot ahais."

12Ebeibeyaif mar okum ongga ah keingg rusnok rot sismeni bera oisa fob. Tina mar okum ongga egeka deika emen gij mona kahma deika ros.

13Erek koma beda malaikat ongga cinja erfens bera en manghi mei oga ongga cinja erfens deika. Beda ainsa koma tein didif dig oga egens en jeska oubukum ongga angh gu meja emas jah Allah odou.

14Beda oga insa koma agot gu malaikat ongga cinja erfens oida, "Bua bija gu mei mosu eteb ongga ofoka Efrat. Beda bua busuwa malaikat tohkuru ongga rinrakid rua jah suma fob."

15Beda malaikat egens insa koma onsuwa malaikat tohkuru insa koma fob. Jeska sis fob rua rinsejah nou tahun kef, jera mesta kef, jera mona kef, jera aras kef tein jeskaseda rijagob rusnok mebif oknama fogora ragos ojgomu.

16Noba didif dig rot oida rerin tentarer ongga rifef kuda bera erek rufok juta wuntin egeka.

17Beda askesi didif diajga mar onswos insa koma, beda didif dik kuda-kuda jera rua ongga rifef kuda insa koma bera erek kef oida, rerin mar erek monska ofos ontumba ongga efen titnetna erek ekenkeni doska jera ofrahamaha jera orugrug tein. Beda kuda-kuda insa koma rerin ribirfaga bera erek singa ebirfaga ojgomu. Beda mah ongga et mar jera mah efeb jera mah eisa ongga erek orugrug bera orogna jeska rawesi.

18Beda mar orgomu insa koma edi rusnok mebif fogora oknama ragos rot.

19Noba kuda-kuda insa koma rerin owesa efek eteb ongga orogna jeska rawesi jera ruiraga tein. Jeska rerin ruiraga bera erek womfieda ongga eska rusnok fogora rita rufogu okora eteb ojgomuja.

20Erek koma tina rusnok mebif enjgineg ongga rinagos gij mar insa koma guru bera rinekikif jeska rerin mar ongga oska jinaga guru. Tina rua rugif gu mar ongga erek tenten guru ojgomuja ros. Mar koma ongga rua rugif gu bera erek efena ofogog jera mar ongga rua risinsa runtunggom jeska emas ni, perak ni, timbaga ni, mega ni, mamu ni. Noba mar insa koma ongga rua rugif gu bera efena enebah guru. Mar insa koma rinek mar guru, noba rineg mar guru, noba rinecira tein guru.

21Noba rusnok insa koma rinekikif jeska rerin mar ongga oska enjgineg tein guru. Tina rua ragob rusnok ebireira ojgomuja ni, rugif gu rerin meseya ojgomuja ni, risiri morototuma ojgomuja ni, rungkoreka mar ojgomuja ni.



 <<  Wahyu 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel