Alkitab Mobile SABDA
[VER] : [MONGONDOW]     [PL]  [PB] 
 <<  1 Korintus 11 >> 

1Duduiaidon onu in inaidanku, naí doman aku'oi dinumudui kon onu inta inaidan i Kristus.

2Pujionkubií totok im mo'ikow sin umuran mokotorop ko'i nakoí. Bo onu inta sinunduíku ko'i monimu, umuran doman duduian monimu.

3Tongaí ibogonku im baí kota'auan doman monimu in atorang mita kom bonu in jama'at. Tongguḷu i Kristus ing ki Allah. Tongguḷu in ḷoḷaki ing ki Kristus. Yo tongguḷu im bobay tuata in ḷoḷaki.

4ḷoḷaki inta mosambayang ande inta mopoyaput in Habar Mopia nongkon i Allah kon tayowon intau mobarong bo mogi koḷob in uḷu, yo tua mangalenya moningkule ko'i Kristus in sia.

5Tongaí aka bobay bo mosambayang ande mopoyaput in Habar Mopia nongkon i Allah bo diaí mogi koḷob in uḷu, yo tua mangalenya diaí harga'annya ing ki buḷoinya ḷoḷaki inta nobalií tongguḷunya. Bobay tatua naonda bo intau inta nokiḷogatdon.

6Sim podudui ing kabiasa'an kon jama'at, aka bobay bo doií mogikoḷob in uḷu yo manikah poki ḷogatdon im bu'oknya tua. Ta'e aka moki ḷogat ande mokigonsing domandon in sia, yo tua notongakai bidon mokopohinamai ko'inia tontanií. Manangka intua sia musti mogi koḷob in uḷu.

7Aka ḷoḷaki yo diaíbií nongonu aka diaí mogi koḷob in uḷu, sim bayongan ka'ada'an bo kakuasa'an i Allah ontongonbií ko'inia. Ta'e kahormatan in ḷoḷaki ontongonbií kom bobay,

8sin ḷoḷaki de'emanbií inaidan nongkon bobay, ta'e bobaybií in inaidan nongkon ḷoḷaki.

9Bo ḷoḷaki inaidan, de'emanbií lantaran oyuíon im bobay, ta'e bobaybií in inaidan lantaran oyuíon in ḷoḷaki.

10Tuamai baí mopia ing gina im malaekat mita, daí bobay im mustibií mogi koḷob in uḷu, saḷaku tanda kon sia tua ing kom bonupabií ing kakuasa'an i buḷoinya.

11Umpakah natua ing kabiasa'an naton saḷaku intau Keresten, ta'e bobay in diaíbií mobiag aka diaí in ḷoḷaki. Natua doman, ḷoḷaki in diaíbií doman mobiag aka diaí im bobay.

12Sin umpakah inaidan nongkon ḷoḷaki im bobay inta muna, ta'e no'iduduimai kon tua ḷoḷaki no'ilahir bidon nongkon bobay; sim bayongan yagi-yagi komintanbií nongkon i Allah.

13Raikah monimu: Umpakah yo mopia im bobay inta mosambayang ko'i Allah kon tayowon intau mobayong bo diaí mogi koḷob in uḷu?

14Kinota'auan bidon naton komintan, kon aka ḷoḷaki bo bu'ok moḷanggoí yo diaíbií mopia.

15Ta'e aka bobay bo moḷanggoí im bu'ok, yo tua in tobatuíbií kahormatan ko'inia, sim bu'ok tatua inogoi ko'inia, sim pogolingoi kon uḷunya.

16Tongaí aka oyuíon im momayow kon soaáḷ tana'a yo nana'a im pogumanku: "Kita andeka jama'at mita i Allah ibanea komintanbií tongaí tobatuí tatua in nobalií kabiasa'an kom bonu in jama'at i Allah, diaíbií ibanea makow."

17Aka soaáḷ mo'iduduimai na'a, yo diaíbií pujionku im mo'ikow. Sin aka moyosipun mosambayang i mo'ikow, yo de'emanbií mokopoaíngoi kon inta mopia ta'e inta diaíbií mopia.

18Sin ain dinongogku, kon aka aindon moyosipun i mo'ikow mosambayang saḷaku jama'at, yo tantuípabií doman oyuíon im bobayowan kon sigad monimu. Bo iraiku kon totu'ubií in habar tana'a.

19Tongaí oyuíonbií doman pianya kon tua, simbaí ko'ontongandon in intau inta totu-totu'u nobali Keresten.

20Ko wakutu moyosipun i mo'ikow, de'emanbií mogaid kom perjamuan i Tuhan.

21Si wakutu im monga'an, mo'ikow tumpaḷabií mogamaí kong ka'anonnya-ka'anonnya, sahingga oyuíon im moko'ulií kon mo'iliu, ta'e oyuíon doman in diaí moko'ulií.

22Nongonu sin natuabií in aid monimu? Eta degaí diaí im baḷoi tontanií ponga'anan bo ponginuman monimu? Andeka degaí tumu'odbií i mo'ikow mokopohinamai kon jama'at i Allah bo mokopo'oyakmai kon intau mita bogaí? Naíondapa degaí im mopomangale ko'i monimu? Onupa im posingogku ko'i monimu? Degaí pujionku i mo'ikow? Aka oaíid natua yo diaíbií duiíonku!

23Sin onu inta ain sinunduíku ko'i monimu, yo nongkon i Tuhanbií intua komintan: kon doḷom tua, wakutu ing ki Yesus, Tuhan naton motoyongdon posarahkan, Sia nogamaí kon roti,

24bo naonda in sinambayangan-Nya in roti tatua poḷat binonsi-bonsig-Nya bo noguman, "Na'a in awak-Ku inta posarahkan ko'i monimu. Aidai in na'a simbaí umuran kotoropan monimu in Aku'oi."

25Naí doman tua, naonda in nopaḷutdon makow nonga'an, Sia nogamaí kom palo kobonu-bonu in anggur bo noguman, "Anggur tana'a in dodandianbií mobagu i Allah, bo duguí-Ku im mobalií tanda. Tuamai pomuḷoi monginum kon nana'a, ponginumbií sim monorop ko'i-Nakoí."

26Sim pomuḷoi mo'ikow moka'an kon roti tana'a bo monginum kon anggur tana'a, tua mangalenya mo'ikow mopota'audon ing kinopatoian i Tuhan modapot im mamangoi bui in Sia.

27Tuamai intau inta noka'an kon roti i Tuhan ande nonginum kon anggur i Tuhan, ta'e diaí totou-totu'u yo baradosa'anbií ko'i Tuhan inta ain noposarahkan in awak bo duguí-Nya sing kopontingan intau tatua.

28Manangka intua intau mustipabií muna momirikisa kon awaknya bain tua bo mota'au moka'an kon roti bo monginum kon anggur tatua.

29Sin aka intau inta noka'an kon roti andeka nonginum kon anggur, ta'e diaí basií mopirisaya kom perjamuan tatua in no'idoyonbií kon awak i Tuhan, yo o..o..bií kon nonga'an bo nonginum in intau tatua, ta'e tongaíbií potarima'annya kon hukuman i Allah in aidnya tatua.

30Tuabií manangka in nobayong ing kon sigad monimu in notakit bo diaí kokakuatan, bo nodapot doman kon oyuíon im minatoi.

31Ta'e aka akuondon muna naton in aid mita naton inta diaí mopia, yo diaíbií hukumon i Allah ing kita.

32Ta'e aka hukumon i Allah, yo tua in didikan-Nyabií ko'i naton, simbaí diaí hukumon ing kita moyotakin in dunia na'a.

33Tuamai ule utatku mita, aka mo'ikow bo notobatuí kong gina mogaid kom perjamuan i Tuhan, yo musti mosi'oḷatan.

34Bo munapa monga'an kom baḷoi im batangan, simbaí diaí ḷagi gogoyon. Sin aka mosi duduian mo'ikow, yo ibadah monimu tua im mopiabií. Diaíbií moko'ulií kon hukuman i Allah im mo'ikow. Tongaípabií na'a in insilanganku ko'i monimu, ibanea makow im bain mo'iangoi bui aku'oi.



 <<  1 Korintus 11 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel