Alkitab Mobile SABDA
[VER] : [MONGONDOW]     [PL]  [PB] 
 <<  1 Korintus 13 >> 

1Umpakahbií aku'oi nonota'au kom bayongan bahasa, nodapot kom bahasa im malaekat, ta'e aka diaí in tabiku kon tumpaḷa intau, yo singogku mita tua in tongaíbií naonda bo dorom inta diaí ko bonu andeka lonceng inta moḷangon in singognya, ta'e diaí im mangalenya.

2Bo umpakahbií in aku'oi mopandoi mopoyaput in Habar Mopia nongkon i Allah bo mota'au doman totok in soaáḷ mita inta nongo'ibuni, ande nonota'au kom bayongan yagi-yagi bo mopirisaya doman totok ko'i Allah, sahingga im mota'au mopopamping im buḷud, ta'e aka diaí in tabiku kon tumpaḷa intau, yo diaíbií im mangale ing kobiaganku!

3Bo umpakah daitonku ogoi kon intau nobogaí ing kapunya'anku, modapot posarahkanku doman in awakku sin tuba'an, ta'e aka diaí in tabiku kon tumpaḷa intau, yo tua komintan beresibií diaí im baragunanya.

4Intau inta motabi kon tumpaḷa intau, monahangbií kon yagi-yagi bo mopia ing gina. Diaí im porasa'an mo'intoi, diaí kumaḷakuang bo diaí doman mododia.

5Sia in diaíbií mogaid kon inta diaí mopia bo diaíbií doman motayak kong ka'untungan tontanií. Sia in diaíbií morogi bo diaíbií doman mo'ibog motaguí kong gina kon intau.

6Diaíbií mopia ing ginanya aka intau mogaid kon inta mora'at, sing ko'ibognya in tongaíbií inta mopia.

7Monahangbií in sia tumayow kom bayongan rupa-rupa bo mopirisaya kom bayongan inta mopia; sia tantuí koharapan bo monahang doman im mogoḷat bo motanggung kom bayongan rupa-rupa inta mobalií.

8Diaíbií in wakutu kon diaí mositabian. Sim masa in tana'a oyuíon intau mopandoi mopoyaput in habar nongkon i Allah, ta'e ko'onggotannya mogogai in sia. Masa in tana'a oyuíon doman intau mopandoi mosingog kom bonu im bahasa inta mokoherang, ta'e koonggotannya mogogay domandon in sia. Masa in tana'a nobarong doman intau nonota'au kom bayongan yagi-yagi, ta'e ko'onggotannya yo koliongannyabií intua komintan.

9Sim pongotahuan bo komampuan naton mopoyaput in habar nongkon i Allah diaípabií totok nosempurna.

10Oyuíonbií in wakutu i Allah moposompurna kon tua komintan, bo inta diaí nosompurna tua im modait bidon mo'inggamaí.

11Wakutu im mongoaídiípa in aku'oi, pososingogku in naí doman onda bo mongoaídií. Natua doman im porasa'an bo pikiranku, naí bií doman onda bo mongoaídií. Ta'e tana'a nogurangdon in aku'oi, daí oaíidku inta mongoaídiípa, nodait bidon sinaḷaíanku.

12Sin onu inontong naton tana'a, naí bií onda bo olinow kom posilag inta diaí totok motarang. Ta'e kon singgai mo'iduduimai ontongonbií naton motarang. Tana'a aku'oi diaípa nonota'au kon rupa-rupa, ta'e kon singgai mo'iduduimai kota'auankubií, naí ki Allah nonota'au kom bayongan yagi-yagi ko'inakoí.

13Daí toḷu tana'a im musti tantuí aidan monimu: mopirisaya, umuran moharap bo tantuí mositabian. Bo nongkon toḷu nohal tana'a totabianbií kon tumpaḷa intau im paling moponting.



 <<  1 Korintus 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel