Alkitab Mobile SABDA
[VER] : [MONGONDOW]     [PL]  [PB] 
 <<  2 Tesalonika 3 >> 

1Na'a doman im po'igumonku ko'i monimu utat mita: tantuí sambayangai ing kami, simbaí habar nongkon i Tuhan umuran pota'au magií-makow bo tarima'an domandon takin pia ing gina naí pinototarima monimu kolipod.

2Bo umuraibií doman sambayangai simbaí kami posaḷamaton i Allah nongkon kawasa in intau mita inta mongacau bo mora'at, sin diaíbií komintan mopirisaya in intau kon habar nongkon i Tuhan tua.

3Ta'e ki Tuhan umuranbií mosatia moginrigon kong gina bo moḷukad ko'i monimu nongkon inta mora'at.

4Bo kami im mopirisayabií totok ko'i Tuhan kom mo'ikow nion in tantuíbií mogaid kon onu inta pinokiaíid nami ko'i monimu.

5Po'igumon makow tua ki Tuhan umuran motunduí kon daḷan mopia ko'i monimu simbaí kota'auandon totok monimu kom motabibií totok ing ki Allah ko'i monimu bo ogoianbií i Kristus ing kasabaran mo'ikow.

6Utatku mita, podoyon kon tangoi i Tuhan Yesus Kristus, kami moguman ko'i monimu simbaí mo'ikow umuran mokopoyayuk ko'i monia inta maḷas bo doií dumudui kon onu inta sinunduí mita nami ko'i monia.

7Kinota'auan bidon monimu, kom musti dumudui im mo'ikow kon aid nami. Kami in diaíbií tongaí mosiug makow wakutu ing koyuaí-yuaíkpa monimu.

8Kami in de'emanbií tongaí moka'an kon onu in ogoi intau bo diaí mogaid, ta'e kami in iyumoyigabií totok mogaid doḷom bo singgai simbaí diaí tongaí mokoposusahmai kon intau ibanea.

9De'emanbií lantaran diaí in hak nami moki tuḷung ko'i monimu, ta'e ibogon nami baí mo'ikow dumudui kon aid nami.

10Sing kowakutu ing kami kon yuaí-yuaíkpa monimu na'aia im poraturan inta pinoguman nami ko'i monimu, "Aka intau doií mogaid yo dona'ai monga'an in sia."

11Pinoguman nami in nana'a sin dinongog nami kon oyuíon in intau kon sigad monimu in doiídon mogaid kon soaáḷ inta baraguna tongaí bidon mogaid kon inta diaí baraguna.

12Podoyon kong kawasa i Tuhan Yesus Kristus, kami mobogoi im poringatan bo tonggina kon intau mita natua, simbaí mosia umuran tumompia bo mogaid kon oaíidannya, sahinggai im moka'an in sia kom bungai in ḷopiínya tontanií.

13Dikabií angoian maḷat im mogaid kon inta mopia.

14Bo aka oyuíon intau inta doií mokidongog kon onu im pinoguman nami kom bonu in surat tana'a, yo mokopo'ingat kon intau natua bo dona'ai moyobayat takin mosia simbaí mo'oyak in sia.

15Tongaí dikabií anggapon saturu in sia, ta'e tonggina'ai saḷaku utat.

16Ki Tuhanbií tua im pangkoi kobiagan naton motompia. Po'igumon makow umuran in Sia mobogoi ko'i monimu ing kobiagan motompia bo mo'onow kom bayongan yagi-yagi. Bo igumon doman makow simbaí ki Tuhan umuran moyotakin monimu komintan.

17Aku'oi, ki Paulus mopoyaput in salam ko'i monimu. Aku'oibií tontanií in nomais kon surat tana'a. Na'a in tanda pinakeíku kom bonu im bayongan suratku.

18Totabi bo barakat i Yesus Kristus ki Tuhan naton umuran koyota-yotakin monimu komintan. Hormat nami, Paulus



 <<  2 Tesalonika 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran