Alkitab Mobile SABDA
[VER] : [MONGONDOW]     [PL]  [PB] 
 <<  Efesus 4 >> 

1Manangka intua aku'oi -- saḷaku intau inta pinonjara sin nogaid kon oaíidan i Tuhan -- mopo'igum totok ko'i monimu: simbaí mo'ikow, intau inta inoiniídon kobiag domandon naí inta ka'ada'anmu saḷaku intau inta inoinií i Allah.

2Umuranbií pokopo'ompaí kon dodia, mokopoaáḷus kom pososingog bo umuran domandon mokoposabar. Popo'ontongbií in tabimu kon oaíid inta mo'ibog mosituḷungan.

3Ramijibií totok im mobiag moyodame simbaí kobiagan notobatuí inta aim pinomia in Roho i Allah tantuí koḷukadan.

4Tongaíbií tobatuí in awak bo tobatuí in Roho. Daí natua doman im mo'ikow inoinií sim moharap kon tobatuí inta notongkai tua.

5Tongaíbií doman tobatuí in Tuhan, tobatuí im pirisaya, tobatuí im baptisan,

6bo tobatuí in Allah inta nobalií ki Amaí im bayongan intau. Sia tuata in Tuhan in dunia na'a inta nogaid pinongin bayongan yagi-yagi bo nongawasa kom bonu in yagi-yagi.

7Ki Kristus ain nobogoi in totabi-Nya ko'inaton tobatuí bo tobatuí.

8Sing kom bonu im Buk Mosuci aim pinais nana'a, "Wakutu in Sia namonik in tampat inta paling moḷantud, Sia nodia kon intau mobayong inta sinokodomok; bo Sia nobogoi in totabi mita kon intau."

9Daí aka kai naton "Sia noponik" daí mangalenya kon tua munapabií in Sia noponag nodapot kong gantog im butaí na'a.

10Bo Sia inta ain noponag tua, Sia doman tua inta ain noponik nodapot in tampat inta lebe moḷantud nongkon ḷangit sahingga kon ondakabií Sia oyuíonbií kon dunia na'a.

11Sia doman tua inta nobogoi in rasul, nabi bo intau mita inta mopoyaput in Habar Mopia, gombala bo guru mita.

12Mosia na'a inogoi i Allah simbaí umat i Allah tokotompia'an simbaí mosia mota'au mogaid kon oaíidan i Tuhan bo moduḷu moposindog in awak i Kristus.

13Sahingga kita komintan motobatuídon kom pirisaya bo motongkaidon im pongortian kon soaáḷ ki Adií i Allah. Bo kita im mobalií intau mita inta noguyangdon kom pirisaya, inta ko'onggot-ko'onggot kodugang-kodugangdon ing kososempurna naí ki Kristus.

14Daí kita in diaíbií naonda bo mongoaídií mita inta pinoyaying magií-makow in rupa-rupa totunduí in intau mita inta mongomunapik. Mosia tua mongonguman kon diaí totou'u sim mopotaḷaí kon onu inta no'itutui.

15Ta'e mustibií ing kita mopo'ontong in aid mita inta mo'itutui takin tabi moḷoben, sahingga kom bayongan yagi-yagi kita modugangdon mosempurna naonda bo ki Kristus inta tongguḷu naton.

16Kom bonu im pimpinan-Nya bayongan anggota in awak tatua nosusung notompia noyotondoḷ in ugat bo buku mita in tuḷan. Bo aka kom batuían anggota mita tatua mogaid naí sabanarnya daí bayongan awak im mobiagbií moguyang bo moropot bo kototabi.

17Tuamai podoyon kon tangoi i Tuhan, na'a in singogku bo ponoropku: dona'ai mobiag naonda bo intau inta diaí nonota'au ko'i Allah bo tongaí morai kon inta diaí im mangalenya.

18Raian monia tua in nosindipdon. Diaíbií kinota'auan monia ing kobiagan inta inogoi i Allah, sim mosia im beresibií diaí nonota'au onu bo onu soaáḷ ki Allah. Natua im mosia sing gina motogat.

19Diaíbií in oyak monia sahingga mosia tantuídon dumudui kon ibog in awak monia bo mobiag mokotor kino'o ibogbií ing gina.

20Ta'e ki Kristus inta ain kinota'auan monimu de'emanbií natua!

21Kinodongogan bidon monimu in soaáḷ Sia! Bo saḷaku dumodudui-Nya mita, sinunduí domandon ko'i monimu in sipat mita i Allah inta oyuíon ko'i-Nia!

22Manangka intua taḷa'aidon in aid monimu kolipod inta dinumudui kong kobobiag koyongan inta aim pinoguya'at im bayongan ibog mokobaradosa.

23Tomobagudon im bayongan gina bo raianmu.

24Bo kobiagdon mo'ikow saḷaku intau mobagu inta pinomia podudui in ibog i Allah, inta mo'ibog dinumudui kon tabiat mo'itutui, motulid bo mosuci.

25Manangka intua utatku mita, dikadon mo'ibog monguboḷ. Mokopojujurbií aka mobiag, sing kita komintan na'a in tumpaḷabií anggota in awak i Kristus.

26Aka mo'ikow bo tumoruí, yo mokopopia simbaí diaí baradosa'an lantaran toruímu tatua. Dika tumoruí tumongo singgai tua.

27Simbaí mo'ikow diaí kawasa'an in Ibilis.

28Intau inta biasa monakow, musti mogogaidon monakow, bo mustidon mogaid baí moko'ulií kon onu im pakeíonnya bo mota'au doman motuḷung kon intau ibanea inta paraḷu tuḷungan.

29Aka mosingog im mo'ikow yo dika mosingog kon inta mora'at, singogdon onu inta mokobaraguna moginropot kom pirisaya bo singog mita tonggina inta mota'au potuḷung kon intau ibanea. Sin singog mita inta baraguna mokopoaíngoi kong kopia'an ko'i monia inta mokodongog.

30Dika mopoaíjar kong gina in Roho i Allah, sim mo'ikow aindon sinontanda'an-Nya simbaí mobalií kapunya'an i Allah. Bo Roho doman tatua inta mobalií jaminan, kon singgai pobebasan tatua im mo'iangoibií ko'i monimu.

31Lumbuídon im bayongan inta mokosaki kong gina, dona'aidon motaguí kong gina bo rogi. Dona'ai domandon umuran moyogenggeng bo mosiponapudan in diaí totu'u bo ḷumbuí domandon im bayongan inta mora'at.

32Ta'e mokopopia kong gina kon tumpaḷa intau, bo mo'ikow musti domandon mototabian, bo mosiaímpungan naonda bo ki Allah inta ain nongampung ko'i monimu pinongin i Kristus.



 <<  Efesus 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel