1Wakutu intua kon jama'at Antiokhia oyuíon tongonumai nabi bo guru, na'a in tangoi monia tua: Ki Barnabas, ki Simeon inta dinonoi ki Niger, ki Lukius intau ing Kirene, ki Menahem inta noyobiag i Raja Herodes, bo ki Saulus.
2Kon singgai tobatuí wakutu im mosia nosambayang ko'i Tuhan bo nopuasa, Roho i Allah noguman ko'i monia nana'a, "Piliídon ing ki Barnabas bo ki Saulus mobalií totabaí-Ku, simbaí mosia mogaid kon oaíidan inta aindon sinantuí-Ku pokiaíid ko'i monia."
3Naonda in nopaḷutdon nopuasa bo nosambayang im mosia, binarakatandon monia ing ki Barnabas bo ki Saulus bo poḷat pinotabaí minayak in taya dua.
4Lantaran pinotabaí in Roho i Allah, daí ki Barnabas bo ki Saulus minayakdon in Seleukia. Nongkon tua mosia sinumakoi kon uangga minayak in Siprus.
5Naonda no'iyaput im mosia kon lipuí in Salamis, mosia nopota'a-ta'au makow im pirman i Allah kom bonu im baḷoi mita pososambayangan intau Yahudi. Kom binaya'an monia tatua, ki Yohanes inta dinonoi ki Markus notuḷung ko'i monia.
6Mosia minayak nolibu kom bayongan pulau kon tua no'idapot kom Papos. Kon tua mosia noyodungkuḷ in tobatuí intau Yahudi, inta ki Bar Yesus in tangoinya. Tobatuí mososihir bo mongaku kon sia in tobatuí nabi.
7Sia na'a totok noyobayat i Sergius Paulus, gubernur kom pulau tatua, intau inta totok mopandoi. Sia nogoinií ko'i Barnabas bo ko'i Saulus sim mo'ibog mokidongog kon pirman i Allah.
8Ta'e ki Elimas (tangoi in mososihir tatua aka kom bahasa Yunani) in tantu momayow ko'i Barnabas bo ko'i Saulus, sin ramijionnya baí ki gubernur diaí mopirisaya ko'i Yesus.
9Ta'e ki Saulus -- inta sinangoiandon ki Paulus -- kinawasaan in Roho i Allah inimindoi ko'inia,
10bo noguman, "Hei intau inta mo'uboḷ totok, ki adií in Ibilis! Ikow nion saturu im bayongan inta mopia. Nongonu sin diaíbií doman mogogai ikow moḷamboi kon roncana i Allah moposaḷamat kon intau?
11Yo indoiai in tana'a, hukumon i Tuhan ikow! Ikow mobilog bo diaídon moko'ontong kom mataín singgai samantara na'a."
12Naonda inontongdon i gubernur onu inta nobalií tatua, nopirisayadon totok in sia ko'i Yesus; sin nopia totok ing ginanya kon totunduí mita soaáḷ ki Tuhan.
13Ki Paulus bo yobayatnya mita, nongkon Papos sinumakoi kon uangga bo minayak im Perga inta kom Pampilia. Kon tua ki Yohanes Markus nonaḷaímaidon ko'i monia bo nobui kon Yerusalem.
14Nongkon Perga, ki Paulus bo yobayatnya mita nongingguput kom bobayaan monia no'idapot kon Antiokhia inta kom Pisidia. Onda intua kon singgai in Sabat mosia minayak im baḷoi pososambayangan bo ilimituí makow kon tua.
15Naonda in nopaḷutdon binaca in Hukum i Musa bo Buk in Nabi mita, itoi mita im baḷoi pososambayangan tatua nopotabaí in intau minayak noliboí ko'i Paulus bo kon yobayatnya mita. Nana'a in ḷoliboí monia tua, "Utat mita, aka oyuíonbií ing koyow inta mokoyigon kom pirisaya bo mokohibur kom bayongan umat i Allah tana'a mita, yo pogumandon."
16Daí baḷuídon sinimindog ing ki Paulus bo noponuḷadaí in limanya bo noguman, "Ule bayongan ginaḷumku intau mita Israel bo utat mita ibanea kon na'a inta motoindudui ko'i Allah! Indongogaipa in singogku na'a:
17Ki Allahbií in intau Israel inta nomilií kom mogoguyang naton bo inta nobogoi ing katurunan mobayong ko'i naton sahingga in nobalií bangusa inta moḷoben wakutu in nogutunpa kom Mesir mosia saḷaku mokokiaíngoi. Onda intua takin kawasa moḷoben ki Allah nopoḷuai ko'i monia nongkon butaí im Mesir tatua.
18Opat nopuḷuh notaong pinosabaran-Nya kon oaíid mita monia kom padang gurun.
19Bo pitu nobangusa im pinutuían-Nya kom butaí ing Kanaan tatua sim mosila-silai makow kom butaí tatua kom bayongan intau Israel simbaí mobalií kapunya'an monia.
20Tua komintan nobalií solama opat nogatut bo lima nopuḷuh notaong ko'onggotea. Naonda in sinilai im butaí Kanaan tatua, inogoian i Allah in hakim mosia. Hakim pangabisan ing ki Nabi Samuel.
21No'idudui kon tua mosia no'igum kon raja, daí inogoi i Allah ing ki Saul, ki adií i Kish inta nongkon suku Benyamin. Opat nopuḷuh notaong sia nobalií raja.
22Naonda ing kinodoiídon i Allah in sia, ki Allah nomiliídon ko'i Daud nobalií raja monia. Bo tana'a inta pinoguman i Allah soaáḷ ki Daud, 'No'ulií-Kudon ing ki Daud inta ki adií i Isai tobatuí intau inta totok im mokosanang kong gina-Ku. Sia tua inta motoindudui kon onu ing kino'ibog-Ku.'
23Nongkon turunan i Daud tuata, podudui in dandi-Nya, Sia moposadia in tobatuí Raja Mopoposaḷamat kom bayongan intau Israel, daí Sia tuata ing ki Yesus.
24Wakutu ing ki Yesus diaípa nomangkoi kon oaíidan-Nya, pinobaḷuídon muna i Yohanes kom bayongan intau Israel kom musti mogogaidon mogaid kon dosa mita monia bo baptisondon.
25Naonda im motoyongdon mopaḷut in oaíidannya, ki Yohanes noguman ko'i monia nana'a, 'Degaí kai monimu kamai yo ki inebií in aku'oi na'a? Aku'oi na'a in de'emanbií Sia inta oḷaton makow monimu. Ta'e mo'iangoibií in Sia inta oḷaton makow monimu nion, mo'itoḷuan mangoi ko'inakoí; umpakah tongaí mobuka kon togot in sapatu-Nya yo diaí mokobalií aku'oi.'
26Utatku mita inta katurunan i Abraham bo utat mita ibanea inta motogu'ondok ko'i Allah! Habar inta mokosaḷamat aindon pinoyaput ko'inaton;
27sim bayongan intau inta nogutun kon Yerusalem bo itoinya mita diaíbií nonota'au kon Siabií tua inta mopoposaḷamat, sahingga ihukumbií monia in Sia nodapot minatoi. Ta'e hukuman tatua im mogintompodbií kon onu inta aim pinoguman muna in nabi mita inta tantuí baca'an monia aka kon singgai in Sabat.
28Umpakah diaí kino'uliían monia kon taḷaí inta mota'au baliíon monia dodoyonan pohukuman ko'i-Nia modapot matoi, ta'e pinakisabií doman monia pinokilimod ko'i Pilatus in Sia.
29Bo naonda in nopaḷutdon inaidan monia bayongan inta ain no'ipais kom bonu im Buk Mosuci soaáḷ Sia, pinopoponagdon monia im mayat-Nya nongkon kayu pinoyotalempang bodongka iḷobong.
30Ta'e biniag bui i Allah in Sia kon sigad in intau minatoi.
31Onda intua tongonumai nosinggai Sia umuran namangoi nokipogontong kon dumodudui-Nya mita inta namangoi noyotakin-Nya nongkon Galilea mayak in Yerusalem. Mosia tuata inta nobalií saksi-Nya kon umat masai na'a.
32Tuamai tana'a makow kami mopoyaput in Habar Mopia ko'i monimu: Kon onu inta aindon pinodandi i Allah kom mogoguyang naton,
33aindon sinotu'u-Nya ko'i naton takin daḷan nomiag bui ko'i Yesus nongkon kinopatoian-Nya, naí inta aim pinais kom buk Mazmur induanya, nana'a, 'Ikowbií nion ing ki Adií-Ku, singgaipa doman na'a Aku'oi mobalií ki Amaí-Mu.'
34Aindon biniag i Allah in Sia nongkon sigad intau minatoi. Ta'e tana'a makow diaí bidon mokorasa kom popatoi natua in Sia. Sing ki Allah nogumandon nana'a, 'Aku'oi mobogoi in dandi mosuci ko'ini-Mu bo pototu'u-Kubií dandi inta aindon doman pinodandi-Ku ko'i Daud.'
35Naí doman tua ing kon ayat mita ibanea pinoguman nana'a, 'Diaíbií pomayak-Mu makow in Simpaḷ-Mu inta motoindudui tatua moyoyang kom bonu im pinoḷobongan.'
36Naonda nogaid makow kon onu inta kino'ibog i Allah ing ki Daud kon wakutu in nobiagpa, sia minatoi domandon bo iḷobong kon diug i mogoguyangnya. Daí noyoyangbií domandon komintan in awaknya.
37Ta'e ki Yesus inta biniag i Allah nongkon kinopatoian-Nya, diaíbií noyoyang in awak-Nya.
38Tuamai utatku mita, mustidon kota'auan monimu kom pinongin i Yesusbií tuata habar soaáḷ pongampungan kon dosa pinota'au ko'i monimu; musti kota'auan monimu kom pomuḷoi in intau inta mopirisaya ko'i-Nia, pinilatandon nongkon dosa mita inta diaíbií mota'au tongaí popatan pongin bayongan parentah mita i Allah inta pinoyaput i Musa.
39(13:38)
40Manangka intua tarukira totok kopira, dika modapot mobalií ko'i monimu onu im pinoguman in nabi mita nana'a,
41'Tarukira totok kopira, hei mo'ikow intau mita inta mosingkule! Moherangbií im mo'ikow, bodongka matoi! Sing kom masa in tana'a Akuoi mogaid kon oaíidan inta diaíbií pirisayaan monimu, umpakahbií oyuíon intau im mopomangale ko'inimu.'"
42Wakutu ing ki Paulus bo ki Barnabas nonaḷaímaidon kom baḷoi pososambayangan tatua, bayongan intau kom baḷoi pososambayangan tatua nongoyow ko'i nayadua simbaí umuranpa mamangoi kon singgai in Sabat ibanea makow, bo mogingguput kon onu inta aindon muna pinoyaput nayadua ko'i monia.
43Naonda iḷumuaidon bayongan intau nongkon baḷoi pososambayangan tatua, ki Paulus bo ki Barnabas dinuduian im moaíntoí intau Yahudi bo intau doman mita ibanea inta sinumuotdon kon agama Yahudi. Daí umuran sinongginaan in rasul mita tatua im mosia simbaí umuran mobiag kom bonu in totabi Allah.
44Kon singgai in Sabat no'iduduimai, gogioí komintan intau kong kotaí tatua namangoi mokidongog kon singog mita i Allah.
45Wakutu inontong intau mita Yahudi in intau moaíntoí tatua, mosia totok no'intoi. Totok monia singkuleon ing ki Paulus bo toko bayowan monia onu im pinogumannya.
46Ta'e taran-tarangan taya dua nosingog nana'a: "Kolipodpabií singog i Allah na'a im pinoyaput ko'i monimu. Ta'e diaí sinarima monimu, sin mo'ikow ain noguman tontanií kom mo'ikow in diaíbií patus motarima kong kobiagan mononoi. Tuamai tana'a makow taḷaan nami im mo'ikow bo mayak kon intau ibanea.
47Sin tana'adon im parentah i Tuhan ko'inami, 'Aindon sinantuí-Ku im mo'ikow mobalií bayag kom bayongan intau ibanea inta de'eman intau in Yahudi, simbaí nongkon i monimu, bayongan intau kon dunia na'a mosaḷamat.'"
48Wakutu in dinongog im bayongan intau inta de'eman Yahudi in singog tatua, nopia totok ing gina monia bo totok im modayow ko'i Tuhan. Bo bayongan intau inta aindon pinilií i Allah simbaí moko'ulií kong kobiagan mononoi, komintandon nopirisaya.
49Singog i Tuhan no'iwayadon kom bayongan lipuí kon tua.
50Ta'e intau mita moḷoben kong kotaí tatua bo bobay mita inta nongkon kalangan intau moḷantud inta motogu'ondok ko'i Allah, totok pongaruon intau mita in Yahudi. Mosia nogaid kon soaáḷ inta nokopomuka kon saturu monia ko'i Paulus bo ko'i Barnabas, bo inuntundon monia in taya dua nongkon daerah tatua.
51Daí sinopiran in rasul mita tatua kon tayowon intau moaíntoí tatua in ḷobud inta nongo'ikompit kon si'oḷ monia saḷaku poringatan ko'i monia, bodongka minayak in Ikonium.
52Dumodudui mita monia kon Antiokhia nongosanang ing gina bo kinawasaan in Roho i Allah.
<< Kisah Para Rasul 13 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel