1Kon Ikonium ki Paulus bo ki Barnabas nokorasa kon soaáḷ inta notongkai. Mosia minayak doman kom baḷoi pososambayangan in intau Yahudi bo nopoyaput im pirman i Allah kon tua, sahingga mobarong totok intau Yahudi bo intau inta de'eman Yahudi in nopirisaya ko'i Yesus.
2Ta'e intau mita Yahudi inta doií mopirisaya, totokdon mopongaruh kon intau mita inta de'eman Yahudi, sahingga nomukaídon ya'at ing gina i intau mita tatua kom bayongan intau inta mopirisaya ko'i Yesus.
3Manangka intua ki Paulus bo ki Barnabas nogutun nolin'onggot kon tua. Bo umuranbií nobarani imosia nongonguman kon soaáḷ ki Tuhan. Daí pinonyatadon i Tuhan kon habar inta pinota'au monia soaáḷ totabi-Nya tatua in totu'ubií; mosia inogoian-Nyadon ing kawasa mogaid kon soaáḷ mita inta mokoherang bo inta diaí komampuan intau aidan.
4Ta'e intau mita kong kotaí tatua diaí notobatuí kom pikiran; oyuíon dinumudui kon intau mita in Yahudi inta diaí nonota'au ko'i Allah bo oyuíon doman in dinumudui kon rasul mita tatua.
5Bo intau mita in Yahudi takin itoi mita monia noyotakin in intau mita de'eman Yahudi noyopakat moposikisa bo mogandur im batu kon rasul mita tatua
6Ta'e kinota'auan i Paulus bo i Barnabas in roncana monia tatua, daí minayak in taya dua bo sinimií kon Listra bo Derbe.
7Kon tua mosia umuranbií doman nopoyaput in Habar Mopia.
8Kon Listra oyuíon tobatuí ḷoḷaki inta si'oḷnya nolempeng nongkon no'ilahirpamai, sahingga sia diaí dodai onda nokobayak, sin totu'u molemeí in si'oḷnya.
9Intau tatua limituí makow kon tua mongindongogmai ko'i Paulus mosingog. Bo inontong i Paulus kom mopirisaya in intau tatua, daí tuamai mopiapabií. Daí ki Paulus inimindoi ko'inia,
10bo noguman noropot, "Sindogdon kotulid!" Intau tatua iḷumanduk sinimindog bo minayak.
11Naonda intau moaíntoí noko'ontong kon onu inta ain inaidan i Paulus, mosia nomaḷuí kom bonu im bahasa Likaonia, "Dewa mita noponagdon kon dunia na'a naíonda bo intau."
12Daí ki Barnabas sinangoian monia ki Zeus yo ki Paulus ing ki Hermes, sin sia in nosingog.
13Bo namangoi ing ki Imang Dewa Zeus, inta tampat pososambayangannya kon ḷuai ing kotaí, nodia kon sapi mita koḷakian bo nopoḷambaí im bungang kon ngara ing kotaí tatua. Bo noyotakin doman monia nobogoi in sosumbah kon rasul mita tatua.
14Naonda ing ki Paulus bo i Barnabas nokodongog kon onu inaidan intau mita tatua, nomera-merak mosia kon ḷambung monia bo sindaḷan noribatuk minayak irumuaík kon intau moaíntoí tatua, bo nomaḷuí,
15"Hei, nongonu sim mo'ikow mogaidbií kon nana'a? Kami na'a in intaubií doman naí mo'ikow! Kami ing kon na'a tongaíbií namangoi mopoyaput in Habar Mopia ko'i monimu simbaí taḷa'anmaidon monimu in soaáḷ mita inta diaí baraguna tanion bo mopirisayadon ko'i Allah inta aindon nobiag nongkon kinopatoian-Nya, ki Allah inta nomia kon ḷangit bo butaí, dagat bo bayongan inta kom bonunya.
16Kolipod im pomayakpabií makow i Allah intau mobiag podudui in ibognya tontanií.
17Ta'e umuran-Nyabií ponyata in totabi-Nya bo mobogoi kon onu inta mopia. Ogoian-Nya in uyan nongkon ḷangit bo hasil im butaí kom musimnya. Umuran-Nya inogoian ing ka'anon im mo'ikow bo pinosanang ing gina monimu."
18Ta'e umpakah naímaidon tua im pinogoguman in rasul mita tatua ko'i monia, ta'e diaíbií doman mosia nokoaímpag. Tantuíbií doman mosia nobogoi in sosumbah ko'i monia.
19Tongaí dodai intua namangoidon intau mita Yahudi kon Listra. Mosia nongkon Antiokhia kom Pisidia bo nongkon Ikonium bo mopongaruh kon intau moaíntoí tatua simbaí dumudui ko'i monia. Bo ki Paulus inarab monia im batu poḷat dinia pinoḷuai kong kotaí. Bo kai monia kamai aim bidon minatoi,
20ta'e naonda in ilipung intau mita inta mopirisaya, sia nobangon bo bui sinumu'ot ing kotaí. Nopo'ikoḷomai kon singgai sia minayakdon in Derbe takin i Barnabas.
21Kon Derbe, ki Paulus bo ki Barnabas nopoyaput doman in Habar Mopia bo nobayongdon intau in nobalií nopirisaya ko'i Yesus. Onda intua mosia nobuidon kon Listra, bo minayak kon Ikonium bo Antiokhia inta kom Pisidia.
22Kong kotaí mita tatua mosia minayak noginrigon kong gina in intau mita inta mopirisaya ko'i Yesus bo nononggina simbaí umuran mopirisaya ko'i Yesus. Nana'a in tonggina monia tua, "Munapabií moaíntoí in roriga mo'ulií naton, bain tua bo mokorasa kong kopia'an kon Dunia Mobagu i Allah."
23Pomuḷoi in jama'at pinotayakan i Paulus bo i Barnabas kon intau mita inta mobalií itoi kom bonu in jama'at intua. Sinambayangan monia poḷat pinopuasaan bo pinosarakan monia ko'i Tuhan inta pinirisaya monia tua.
24Onda intua ki Paulus bo ki Barnabas nogingguputdon kom bobayaían monia, mosia nongin lipuí im Pisidia bo nodapotdon kom Pampilia.
25Bo naonda in nopaḷutdon nopoyaput in Habar Mopia kom Perga, mosia minayak in Atalia, inta kom pintad.
26Bain nongkon tua mosia bo sinumakoi kon uangga minayak in Antiokhia. Kotaí tatuata inta muna-munamai pinotarima'an monia kon totabi i Allah, simbaí aidandon monia in oaíidan inta koyogot monia iḷapatan masai na'a.
27Naonda in no'iyaputdon kon Antiokhia, nodait monia sinipun bayongan jama'at, bo pinongongumanan kon onu inta aindon inaidan i Allah ko'i monia. Bo ino'uman doman monia in totuḷung i Allah nobukaí kon daḷan nodapot intau mita inta de'eman Yahudi nopirisaya ko'i Yesus.
28Kong kotaí tatua ki Paulus bo ki Barnabas nogutun no'onggot noyotakin in jama'at mita inta mopirisaya.
<< Kisah Para Rasul 14 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel