1Ki Paulus inimindoipa magií makow kon anggota im Mahkamah Agama inta kon tua bodongka sia nosingog, "Utatku mita, uma'aibií in singgai na'a rasa'anku kon aku'oi in diaíbií kotaḷaí ko'i Allah. Ginaku im motulidbií totok kon tayowon i Allah."
2Ta'e Imang Moḷoben ki Ananias tua noguman kon intau mita inta kon diugmai Paulus kon tokap im bibignya tua.
3Daí ki Paulus noguman ko'i imang moḷoben tatua, "Tokaponbií i Allah in ikow, sin ikow intau inta momunapik inta ki ubo-uboḷmai mosuci! Ikow ilimituí kon nion sim mohakim ko'inakoí podudui in hukum i Musa, padahaḷ ikow tontanií im moḷawang kon hukum tatua. Sin ikow in nopotabaíbií kon intau monokap ko'inakoí!"
4Daí intau mita inta kon tua noguman nana'a ko'i Paulus, "Ikow im moningkulebií kon imang moḷoben i Allah!"
5Ki Paulus notubag, "Hei utat mita, diaíbií kinota'auanku kon sia tua in imangbií moḷoben. Totu'u kon nana'abií im pinais, 'Dona'aibií im ikow mosingog kon mora'at kon tobatuíintau inta nobalií itoi monimu.'"
6Kinota'auan i Paulus kom mosia inta kon tua nobayongbií in nongkon golongan Saduki bo Parisi. Tuamai in sia noguman kon Mahkamah Agama tatua, "Utat mita! aku'oi na'a intaubií im Parisi, katurunan intau im Parisi. Aku'oi in sidangon kon na'a sin aku'oi im mopirisaya kon intau minatoi im mobiagbií bui."
7Naonda in sia nosingog kon natua, nobaliídon im bobayowan kon sigad intau mita im Parisi bo Saduki daí noyosilaidon in intau moaíntoí tatua.
8Sin aka kon raian intau in Saduki, intau minatoi diaíbií mobiag bui bo malaekat in diaíbií, naí doman tua diaíbií in roho mita. Ta'e aka intau im Parisi nopirisayabií kon tua komintan in oyuíonbií.
9Daí nobobayowandon totok im mosia. Tongonumai intau inta mototunduí kon agama takin intau mita im Parisi, sinimindog kom muna bo nomayow totok. Mosia noguman nana'a, "Intau tana'a in topilikmai diaíbií kino'uliían nami kon taḷaí. Degaí totou'ubií kon oyuíon in roho andeka malaekat inta ain nosingog ko'inia!"
10Nodugangdon noḷoben im bobayowan monia tatua, daí no'ondokdon itoi in tontara tatua sin dikabo libutan monia ing ki Paulus bo patoion. Tuamai binayaknyadon pinoki gamaí ing ki Paulus nongkon yuaík monia tatua bo pinokidia bui kon tampat monia tua.
11Kon doḷom no'iduduimai ki Tuhan Yesus namangoi sinimindog kon diugeamai bo noguman ko'inia, "Koropotdon ing ginamu! Sin ikow aindon nobarani nongonguman kon onu inta inontong bo dinongogmu soaáḷ Aku'oi kon intau mita kon Yerusalem, daí naí doman tuata ikow mayak bo mongonguman kon intau mita in Rum kon onu inta ain inontong bo dinongogmu soaáḷ Aku'oi."
12Doḷo-doḷom nobangon monik, intau mita in Yahudi nomangkoidon nosipun kon intau. Bo mosia nongibot kon diaípabií moponga'a-nga'an andeka moponginu-nginum aka ki Paulus diaípa kolimodan monia.
13No'iliubií kon opat nopuḷuh in intau inta noyosipun tatua.
14Mosia minayak kon Imang mita itoi bo itoi mita intau Yahudi bo noguman, "Kami ain nongibot kon diaípabií moponga'a-nga'an bo monginu-nginum aka diaípa kolimodan nami ing ki Paulus.
15Tuamai mo'ikow komintan poyotakindon im Mahkamah Agama bo mayak moguman kon itoi in tontara tatua simbaí ki Paulus in diaannya bui kon tayowon monimu bo mo'ikow ing ki ubo-uboḷmai momirikisa. Sing kami im moramijidon molimod ko'i Paulus wakutu in sia kon daḷanpa, diaípa mo'iyaput in na'a."
16Ta'e ki adií i bobay Paulus nokodongog kon roncana monia tatua. Daí sia minayak in tampat monia tatua bo noguman kon soaáḷ tatua ko'i Paulus.
17Daí nogoinií ing ki Paulus kom porwira tobatuí bo noguman ko'inia nana'a, "Dia'pa in adií tana'a kon itoimu sin oyuíon in o'umanonnya ko'inia."
18Daí dinia im porwira tatua in adií tatua ko'i itoinya bo noguman, "Ki Paulus intau inta sinahang naton tua, nogoinií ko'inakoí bo nopo'igum simbaí aku'oi modia kon ede in tayamobiag tana'a mamangoi ko'i Tuang. Sin kainia oyuíon im paraḷunya poguman ko'i Tuang."
19Daí itoi in tontara tatua nokapit kon ede in tayamobiag tatua bo minayak sinumontanií kon toḷosimai bo noliboí, "Onu im paraḷumu poguman ko'inakoí?"
20Ede in tayamobiag tatua notubag, "Intau mita in Yahudi ain notobatuí kong gina, mamangoi mopo'igum ko'i Tuang simbaí ikoḷom ki Tuang modia ko'i Paulus potayow kom Mahkamah Agama, simbaí mosia ki ubo-uboḷmai momirikisa ko'i Paulus.
21Tongaí dona'aibií duduian i Tuang onu im po'igumon monia tua. Sin oyuíonbií in no'iliumai kon opat nopuḷuh intau nongkon imonia tua in nogadop kon daḷan sim moroncana modola ko'i Paulus kon yuaík in daḷan. Intau mita tatua ain nongibot poḷat nongutuk kom mosia in diaípabií moponga'a-nga'an bo moponginu-nginum aka diaípa kolimodan monia ing ki Paulus. Tana'a mosia aindon nobasadia, dongka bidon mogoḷat kon singog i Tuang."
22Bo itoi in tontara tatua nopotabaí kon ede in tayamobiag tatua nobui takin koyow, "Dona'aibií pogumanmu ko'i ineka kon soaáḷ tana'a aindon pinogumanmu ko'inakoí."
23Onda intua itoi in tontara tatua nogoinií kon tontara porwira doyowa bo noguman ko'i monia nana'a, "Sadiadon in tontara doyowa nogatut bo pitu nopuḷuh inta tumakoi kong kabaḷo takin doyowa nogatut in tontara inta mokadai kon totakuḷ sim mayak ing Kaisarea doḷom doman na'a jam sambilan."
24Sadiaai domandon in tongonumai keledai takoian i Paulus bo diadon in sia ko'i Gubernur Peliks. Mokopopia ing kon daḷan baí mo'iyaput takin saḷamat.
25Itoi in tontara tatua nomais kon surat inta nana'a in tombonunya,
26"Gubernur Peliks inta mopia. Salam nongkon i Klaudius Lisias!
27Intau tana'a in dinomok i intau mita Yahudi bo gogioí ilimod monia, aka aku'oi diaí namangoi takin tontara mita bo noposaḷamat ko'inia; sin dinongogku kon sia na'a intaubií in Rum.
28Bo lantaran aku'oi mo'ibog monota'au mongo onu in taḷaí inta pinonapud monia tua ko'inia daí diniaku in sia kom Mahkamah Agama monia.
29Tongaí no'uliíkumai sia na'a in diaíbií kotaḷaí inta patus pohukuman ko'inia dapot im matoi andeka bonuon kom ponjara. Onu im pinonapud monia tua tongaíbií soaáḷ hukum mita in agama monia tontanií.
30Natua doman aku'oi ain noko'ulií kon habar kon oyuíon in roncana moromuí nongkon intau mita in Yahudi ko'inia. Daí tuamai ḷagiku pinokidia mangoi ko'i Tuang Gubernur in sia. Bo intau inta moroncana kon diaí mopia ko'inia pinotabaíkudon mamangoi ko'i Tuang bo mopongadu in taḷa' intau tana'a."
31Daí tontara mita tatua nodiadon ko'i Paulus naí inta aim pinarentah ko'i monia. Doḷom doman tua mosia no'iyaput in Antipatris.
32Nopo'ikoḷomai kon singgai dongkadon tontara mita inta sinumakoi kon kabaḷo in nodia turus ko'i Paulus, bo tontara ibanea in nobuidon kon tampat monia.
33Naonda in tontara mita inta sinumakoi kong kabaḷo no'idapotdon ing Kaisarea, mosia nobogoidon in surat tatua ko'i Gubernur, bo poḷat doman pinosarahkan monia ing ki Paulus ko'inia.
34Bo nopaḷut makow nobaca kon surat tatua ki Gubernur noliboí ko'i Paulus mongo nongkon propinsi ta'onda in sia. Naonda in kinota'auannyadon kong ki Paulus nongkon Kilikia,
35sia noguman nana'a, "Tua in nopia! Pirikisa'anku in taḷaímu aka intau mita inta mopongadu ko'inimu kon na'adon." Bo pinarenta'annyadon kom baí tahangon kon istana i Herodes ing ki Paulus.
<< Kisah Para Rasul 23 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel