1Nongkon tampat tatua, ki Yesus bo murií-Nya mita minayakdon in lipuí-Nya.
2Kon singgai in Sabat Sia nomangkoidon nobogoi in totunduí kom bonu im baḷoi pososambayangan. Mobayong intau kon tua. Wakutu i mosia nokodongog kon totunduí-Nya tua, noherang totok i mosia. Mosia noguman, "Kon onda ing kino'uliían intau tana'a kom bayongan tua? Kabijaksana'an naíonda ing ko'i-Nia nion? Naíondabií sim mota'aubií in Sia mogaid ko inta mokoherang?
3De'emanbií Sia na'a inta ki Adií i bas bo i Maria, bo ki utat ne Yakobus, i Yoses, i Yudas bo i Simon? O'o, sedang bo ki utat-Nya mita bobay nogutun doman kon na'a." Tuamai diaí sinarima monia in Sia.
4Daí ki Yesus noguman ko'i monia nana'a, "Tobatuí nabi hormatonbií kon ondakabií, kolikudbií ing kolipuínya tontanií, bo kon yuaí-yuaík ing ginaḷum bo koluarganya."
5Kon tua diaí tobatuímai inaidan-Nya im mokoherang, kolikud in nomarakat ko'i monia inta nongotakit bo mosia inta notakit nongopia.
6Ki Yesus noherang sim mosia diaí mopirisaya. Onda intua ki Yesus nopobayak in lipu-lipuíannya inta nodiug kon tua, bo notunduí.
7Inoinií-Nya im murií mopuḷuh bodoyowaí bo pinotabaí todo-doyowa, bo mosia inogoian-Nya ing kawasa moguntun kon dimukud mita mora'at.
8Na'a ing koyownya ko'i monia, "Dona'ai modia kon onu bo onu ing kom bonu im bobaya'anmu, kulikud in tungkud. Dona'ai modia kom baḷun andeka botutu in sumbangan ande doit.
9Pogisapatubií ta'e dona'ai modia kon ḷambung doyowa no par."
10Ki Yesus noguman doman, "Aka mo'ikow tarima'an kon tobatuí baḷoi, yo pogutun kon tua modapot i mo'ikow mobuatdon nongkon kotaí tatua.
11Ta'e aka mo'ikow bo mo'ibayak in tobatuí tampat, bo intau mita kon tua doií motarima bo doií mokidongog ko'i monimu, yo taḷa'aidon in tampat tatua. Bo topiraidon ḷobud nongkon si'oḷmu saḷaku poringatan ko'i monia!"
12Daí minayakdon im murií-Nya mopuḷuh bodoyowaí tatua. Mosia minayak nopota'a-ta'au makow in habar, kon intau musti mogogaidon mogaid kon dosa mita.
13Murií mita i Yesus tatua noguntun kom mobayong in dimukud mora'at, mosia nopolepo in ḷana Zaitun kon intau motakit bo nopia intau mototakit tua.
14Habar mita soaáḷ bayongan inta nobalií tua no'iyaput domandon ko'i raja Herodes, sin tangoi i Yesus kinota'auandon totok in intau kon ondakadon. Oyuíon in noguman, "Ki Yohanes Mobobaptis nobiagdon bui! Tuamai oyuíon ing kawasa-Nya mogaid kon inta mokoherang."
15Ta'e oyuíon doman intau ibanea in noguman, "Sia nion ki Elia." Oyuíon in noguman, "Sia tua in tobatuí nabi naíonda bo tobatuí nabi mita tungkuḷ intua."
16Wakutu ing kinodongogan i Herodes soaáḷ tatua, sia noguman, "Pasti Sia na'a ing ki Yohanes Mobobaptis inta ain pinoki ingguḷuku. Buidon in sia nobiag!"
17Sing kowakutu in diaípa intua, ki Herodes ain nopotabaí kon intau modomok ko'i Yohanes bo bonuon kom ponjara. Pinonjara i Herodes ing ki Yohanes, sin nonogur ko'inia soaáḷ mononibuḷoi ko'i Herodias inta ki buḷoi i Pilipus ki utatnya tontanií.
18Ki Yohanes nopobui-buimai moguman ko'i Herodes nana'a, "Diaíbií mota'au ikow mononibuḷoi ko'i buḷoi i utatmu tua!"
19Manangka intua ki Herodias umuran notaguí kon roginya ko'i Yohanes, dapot ibogonnya ki Yohanes limodon, ta'e diaínya kinoaíidan sin umuran ḷamboian i Herodes.
20Sing kinota'auan i Herodes kong ki Yohanes tua in totabaí mopia i Allah daí mobangkaḷ in sia. Manangka intua pinokiḷukadnya ante ing ki Yohanes kom bonu im ponjara. Bo memang aka mosingog ing ki Yohanes yo mo'ibogbií ing ki Herodes mokidongog kon singognya, umpakahbií moaíjar totok ing ginanya mokodongog.
21Pangabisannya ki Herodias noko'ulií kong kasampatan ko wakutu ing kinotompodan umur i Herodes. Dodai intua ki Herodes nogaid kon rame ko'i monia inta nokadai kon jabatan mongoḷantud kong karaja'an, mosia inta porwira bo itoi mita in lipuí ing Galilea.
22Kon rame tatua ki adií bobay i Herodias nomanari bo manariannya tatua nokosanang totok kong gina i Herodes bo kon tamunya mita. Daí ki Herodes noliboí kon adií bobay tatua, "Onu ing ko'ibogmu, yo igumdon. Ogoikubií ko'inimu!"
23Bo ki Herodes nodandi kon adií tatua poḷat nongibot, kainia, "Onukabií igumonmu ogoikubií, modapotkabií in tobotak karaja'anku tana'a!"
24Daí adií bobay tatua iḷumuai bo noliboí ko'i inaínya, "Inaí, onu degaí im mopia po'igumonku?" Guman i inaínya, "Igumdon uḷu i Yohanes Mobobaptis."
25Adií bobay tatua baḷuí sinumu'ot bo minayak kon tayowon i Herodes bo noguman, "Igumonku uḷu i Yohanes Mobobaptis tuduon kom baki, tana'adon makow bo ogoi ko'inakoí!"
26Nokodongogmai kon o'igum tatua, noaíjar ing gina i Herodes. Ta'e musti tarima'annya intua sin nongibotdon in sia kon tayowon in tamunya.
27Daí ḷaginyadon pinotabaí in tobatuí pongawalnya minayak nogamaí kon uḷu i Yohanes Mobobaptis. Pongawalnya tatua minayak im ponjara bo nongingguḷu ko'i Yohanes.
28Uḷu i Yohanes tatua sinudunya kom baki bo dinia inogoi kon adií bobay tatua, onda intua inogoi i adiínya bobay tatua ko'i inaínya.
29Naonda in dinongog in murií mita i Yohanes in soaáḷ tatua, binayak ginamaí monia in awak i Yohanes bo iḷobong.
30Rasul mita inta pinotabaí i Yesus nobuidon mangoi, mosia noyotakindon bui i Yesus. Bo ino'uman monia ko'i Yesus im bayongan inta inaidan bo sinunduí monia.
31Mobayong totok intau inta mamangoi, inta mobui, sahingga in diaídon mokoponga'an ing ki Yesus bo murií-Nya mita. Daí ki Yesus noguman ko murií-Nya mita, "Koligai kita mayak in tampat inta mo'ingongow, tampat inta mota'au tontaniían naton bo pogogaian monimu motoyong."
32Daí sinumakoi kon uangga im mosia bo minayak in tampat inta no'ingongow.
33Ta'e nobayong intau noko'ontong kom binaya'an monia bo kinota'auan doman monia im baya'an. Daí bayongan intau kong kotaí ilimikat minayak nongin toba bo inumuna kone Yesus bo murií-Nya mita tua.
34Naonda in tubu monia, nobayong totok intau inontong i Yesus kon tua. Daí totok inangoian tabi in Sia ko'i monia, sim mosia tua na'onda bo domba inta diaí ko gombala. Bo nomangkoidon Sia notunduí ko'i monia kom mobayong in soaáḷ.
35Naonda in ḷoḷabungeadon, murií-Nya mita noguman, "Pak Guru, motoyongdon modoḷom na'a bo tampat tana'a no'itontanií.
36Daí mopia-piabií kom potabaídon intau mita tanion mayak simbaí mota'aupa i mosia motaḷui kong ka'anon kon lipuí mita inta nodiugmai kon na'a."
37Ta'e ki Yesus noguman, "Mustibií mo'ikow im mopoka'an ko'i monia." Daí murií-Nya mita noguman ko'i Yesus, "Musti degaí ing kami mayak motaḷui kon roti boli in doyowa nogatut nodinar sim poka'an kon intau mita tana'a?"
38Daí iliboí i Yesus ko'i monia, "Tongonu roti in nion ko'i monimu? Bayaíkah indoiai." Naonda inindoian monia, kai monia, "limapa in roti bo toyak doyowa doman nobungaí."
39Bo pinokilituían i Yesus im bayongan intau tatua kom butaí inta oyuíon bonok. Mosia kinolo-kolompok.
40Daí mosia ilimituí doman sinumompia kong kolompoknya. Oyuíon mogatut in tokolompok, bo oyuíon doman lima nopuḷuh.
41Onda intua ki Yesus nogamaí kon roti lima tatua takin toyak doyowa bo iḷumangag kon ḷangit nopoyaput in sukur ko'i Allah. Nopaḷut makow kon tua, binosi-bonsig-Nya in roti tatua bo pinokisilai kon intau mita tatua. Naí doman tua in toyak doyowa tatua sinila-silai doman makow ko'i monia komintan.
42Komintan nonga'an nobotug im mosia.
43Onda intua sinipun im murií mita i Yesus ing kalebean ka'anon tatua, nosipun magií mopuḷuhpa bodoyowaí noḷoto in nopuling.
44ḷoḷaki inta no'itakin nonga'an kon roti tatua degaí limamai noribu ing kobayongea.
45Nopaḷut makow kon tua ḷagidon pinotabaí i Yesus im murií-Nya mita sinumakoi kon uangga bo umunadon ko'i-Nia. Mosia pinotabaí minayak im Betsaida inta kon ḷoḷan makow in danow, onda intua pinokipobuian-Nyadon intau moaíntoí tatua.
46Naonda im mosia minayakdon, ki Yesus notakod kom buḷud bo nosambayang.
47Wakutu in nodoḷomdon, uangga inta sinakoian i murií mita i Yesus kon yuaí-yuaíkdon in danow, ta'e ki Yesus ing kon tobapabií.
48Indoian-Nya makow moyoyigadon totok monia im mobotoi sim mosia noyogintontomu in tompot. Tuamai degaí kon sigadmai in jam tiga bo jam anam modiug mobayag namangoi in Sia ko'i monia, ta'e minaya-mayakbií in Sia kon tudu in tubig. Bo Sia kinumudung minayak naíonda bo talibannya i mosia.
49Wakutu inontong monia Sia minayak kon tudu in tubig, sinangka monia in dimbuḷoíbií,
50sahingga nomaḷuí i mosia sin no'ondok. Mosia komintan noko'ontong ko'i-Nia bo totok in no'italikokog. Ta'e baḷuí ing ki Yesus noguman ko'i monia, "Poko'onow! Ki Yesusbií in Aku'oi. Dona'ai mo'ondok!"
51Bo noponikdon ki Yesus kon uangga bo tompot nodoḷaídon. Noherang totok murií-Nya mita tatua.
52Soaáḷ mokoherang inta nobali soaáḷ roti lima tatua diaípa doman kinomangalean monia. Moyoyiga totok monia pikiron.
53Naonda in no'iyaput kon ḷoḷan danow, mosia sinumubu kom pintad ing Genesaret.
54Naonda i mosia noponag kon uangga, inontong intau mita kon tua, kon ki Yesusbií intua.
55Daí bayongan intau kon wilayah tatua noriba-ribatukan tumakin magií-makow, bo modia kon intau mita motakit poaíngoi ko'i Yesus takin boḷad pososiugannya. Aka dongogon monia ki Yesus kon tobatuí tampat, daí diaan doman monia pobayak intua intau motakit.
56Kon ondakabií im baya'an i Yesus, kon lipuí, kong kotaí, ande kon desa, intau mita tatap mopododon kon intau mita nongotakit ko'i Yesus. Intau mita motakit tatua ulidon monia kon tampat moluas. Bo totok im po'igumon monia kombaí intau mita motakit tatua ogoi moliai kon jubah i Yesus, umpakahbií tongaí ubungea. Komintan intau inta noliai nongopia.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel