1Bo malaekat tatua nopo'ontong doman ko'inakoí in ongkag inta mobogoi ing kobiagan. Ongkag tatua nosilang totok naonda bo kristal inta mo'ilig nongkon tampat pomomarenta'an i Allah bo i Adií in Domba tatua,
2inta kon yuaí-yuaík ing kotaí tatua. Kom bingkií posiḷosi in ongkag tatua oyuíon im pangkoi mita ing kobiagan inta nomungai kopuḷuh bodoyowaí in totaong, tabuḷan komintan. Daunnya pinakeí nongundam kom bangusa mita.
3Kom bonu ing kotaí tatua diaí bidon ing kotugatan kutuk i Allah. Tampat pomomarenta'an i Allah bo i Adií in Domba tatua ing kom bonudon kotaí tatua. Bobantung-Nya mita mo'ibadah ko'i-Nia.
4Mosia moko'ontong kom pogot-Nya, bo tangoi-Nya paisondon kom pogot monia.
5Mosia in diaí bidon moparaḷu kon togaí andeka bayag mata in singgai, sin diaí bidon modoḷo-doḷom ing kon tua, bo ki Tuhan Allahbií tontanií im monimbayag ko'i monia. Bo mosia im momarentabií saḷaku raja modapot ing kopaḷutannya.
6Nopaḷut makow malaekat tatua noguman ko'inakoí nana'a, "Singog mita tana'a in totu'ubií bo mota'aubií pirisaya'an. Ki Tuhan Allah inta nobogoi in Roho-Nya kon nabi mita, aindon nopotabaí im malaekat sim mopo'ontong kom bobantung-Nya mita kon onu inta ḷagidon mobalií."
7"Tarukiradon in na'a!" Guman i Yesus, "Aku'oi in ḷagi bidon mamangoi. Koḷungangadon totok intau inta umuran dinumudui kon singog mita inta pinota'au kom bonu im buk tana'a!"
8Bo aku'oi, ki Yohanes, ain nokodongog bo noko'ontong kom bayongan tana'a. Naonda in aku'oi nokodongog bo noko'ontong ko'inia, aku'oi sinumungkud kon tayowon malaekat inta ain nopo'ontong im bayongan tua ko'inakoí, makusudku in mosumbah ko'inia,
9ta'e sia noguman ko'inakoí "Dona'ai momia naniíon, ta'e sumbahdon ing ki Allah! Sin aku'oi na'a in atabií doman naonda bo ikow, bo naí doman tai utatmu mita inta nabi bo bayongan intau inta dinumudui kong koyow mita inta kom bonu im buk tana'a!"
10Bo malaekat tatua noguman bui ko'inakoí, "Dika mobuni kon tosingogon mita inta kom bonu im buk tana'a, sin diaídon mo'onggot kobaliían intua komintan.
11Intau inta mora'at, pomayakdon makow in umuran mogaid kom mora'at; intau inta monajis, pomayakdon makow mokoponajis kon awaknya tontanií; intau inta dinumudui kon ibog i Allah, bo intau inta kobiagannya tongaídon mogaid kong kopontingan i Allah, yo pomayakdon makow sia tongaí mogaid kon natua ko'i Allah."
12"Tarukira in na'a!", guman i Yesus, "Diaídon mo'onggot bo Aku'oi mamangoi modia kom boli im pinogaidan in intau podudui kon onu inta ain inaidannya.
13Aku'oibií na'a inta muna bo inta pangabisan, Aku'oibií ing ki Tuhan nongkon pinomangkoian nodapot kom pangabisan."
14Mosanangdon totok intau inta nomataí kon jubahnya kinodarit totok. Mosia im mota'au moka'an kom bungai im pangkoi ing kayu kobiagan bo tumu'ot kom bonu ing kotaí mongin ngaranya.
15Ta'e intau mita inta nogaid kon soaáḷ mita inta moromuí, inta mo'ibog monggaing, bo intau mita inta mogaid kon soaáḷ mita inta mokotor, inta molimod, mosumbah kom berhala, bo intau mita inta mo'uboḷ, pinomayak tosingogon ande oaíid, komintan intau natua, kon ḷuai ing kotaí in tampatnya.
16"Aku'oi, ki Yesus, ain nopotabaí mangoi im malaekat-Ku ko'i monimu, simbaí sia mopota'au in soaáḷ mita inta pakeíon kong kopontingan in jama'at mita. Aku'oi na'a ing katurunan i Daud; Aku'oibií na'a in tundi dotaí im pomuka'an inta motarang totok tua."
17Roho i Allah bo Nonika'an Bobay noguman, "Koligai!" Ki ine in nokodongog kon na'a musti moguman doman, "Koligaidon!" Ki ine im moyogang, pogamaídon in sia kon tubig inta mobogoi ing kobiagan tatua, bo diaíbií ubolian.
18Ko'i monia inta nokodongog kon onu inta pinoguman kom bonu im buk tana'a, aku'oi, ki Yohanes, mobogoi im poringatan tana'a; Aka intau modugang kon tosingogon inta pinota'au tana'a, daí dugangan doman i Allah in roriga mita ko'inia naí inta aim pinais kom bonu im buk tana'a.
19Bo aka oyuíon intau mongga'at kon tobatumai in tosingogon inta pinoyaput tana'a, daí ga'atan doman i Allah in tonsilainya inta naí aim pinais kom bonu im buk tana'a, silainya inta nongkon pangkoi ing kayu inta mobogoi ing kobiagan bo nongkon kotaí mosuci tatua.
20Sia inta nopoyaput ing koyow mita tana'a noguman, "Totu'u, Aku'oi in ḷagi bidon mamangoi!" Amin! Angoidon o..Tuhan Yesus!
21Po'igumon makow barakat bo totabi Tuhan Yesus umuran kotaki-takin monimu komintan! Amin.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel