1Bo malaekat ilimanya nogirup kon terompetnya, bo aku'oi noko'ontong kon tobatuí tundi noḷabuí nongkon ḷangit. Tundi tatua inogoian kokunsi in tampat pohohukuman.
2Daí tundi tatua nomukatdon kon ḷolingkop bubuí in irang popatoi tatua, daí iḷumuaidon poyok nongkon bonunya naonda bo poyok kon tungku moḷoben. Mata in singgai bo baḷangon sinimindip lantaran poyok inta nongkon bubuí tatua.
3Bo nongkon poyok tatua iḷumuaidon im pangkoḷaí mita bo namangoi im butaí. Pangkoḷaí mita tatua inogoian kawasa inta naí inta inogoi kom bamba'u.
4Mosia tua diaíbií inogoi momoguya'at kom bonok, ande kayu mita, ande pinomuḷa ibanea makow. Ta'e ogoibií im mosia mogaḷow kon intau mita inta diaí imeteraian i Allah kom pogotnya.
5Ta'e diaíbií inogoi im mosia molimod kon intau mita tatua, tongaíbií mopororiga ko'i monia solama lima nobuḷan. Roriga inta no'ulií monia nongkon pangkoḷaí mita tatua naonda doman bo roriga kaḷuton im bamba'u.
6Solama lima nobuḷan tua mosia moramiji baí matoidon, ta'e diaípabií matoi im mosia; mosia mo'ibogdon matoi, ta'e noyayukpabií im popatoi ko'i monia.
7Batangan im pangkoḷaí mita tatua naonda bo kabaḷo inta nobasadiadon moparang. Kon uḷu monia tua oyuíon in naonda bo mahkota buḷawan, pogot monia naonda bo pogot in intau.
8Bu'ok monia naonda bo bu'ok im bobay. Ingipon monia naonda bo ingipon in singa.
9Dodob monia inolingoian in naonda bo ḷambung uatoi. Singog ing kolikip monia naonda bo singog ing kereta mita inta inugut ing kabaḷo mayak moparang.
10Mosia o'iputan bo totogodan naonda bo bamba'u. Kon iput monia tua ing kawasa inta mopororiga kon intau solama lima nobuḷan.
11Oyuíon raja nomarentah ko'i monia, raja tatua ing ki malaekat inta noḷukad kon irang im popatoi tangoinya aka kom bahasa Ibrani "Ki Abadon" bo aka kom bahasa Yunani "Ki Apolion", (mangalenya: momoguya'at).
12Bodito inta muna, no'italibdon. Mo'iduduimai kon tua doyowapa im bodito mo'i angoi.
13Onda intua, malaekat inta inggonomnya nogirup kon teropetnya. Daí dinongogkudon in singog iḷumuai nongkon siku mita im meja pogogukatan kon sosumbah inta pinomia nongkon buḷawan, inta inukat kon tayowon i Allah.
14Singog tatua noguman kom malaekat inggonomnya tua, kain singog tatua: "Buliaidon im malaekat taya opat inta no'itogot kon diug in Ongkag Eprata tatua!"
15Daí binuliandon im malaekat opat tatua. Mosia tua sinila-silaiandon in tugas, oyuíon kon jam, kon singgai, kom buḷan bo kon taong sim molimod kon sepertiga nongkon bayongan intau inta kon dunia na'a.
16Pinota'audon ko'inakoí kon doyowa nogatut nojuta kobayong in tontara inta sinumakoi kong kabaḷo.
17Bo inontongku doman kom bonu in o'ontongon tatua ing kabaḷo mita takin intau mita inta sinumakoi. Intau mita inta sinumakoi kong kabaḷo tatua nogiḷambung in ḷambung uatoi inta naí kopura in tuḷu im batangannya, nobiru naí batu nilam bo nodarag naí balerang. Uḷu ing kabaḷo mita tatua naonda bo uḷu in singa, bo nongkon bibignya ḷumuai in tuḷu, poyok bo balerang.
18Sepertiga intau kon dunia na'a kino limodan in roriga toḷu inta no'iantug tatua. Toḷu in roriga tua in tuḷu, poyok bo balerang inta iḷumuai kom bibig ing kabaḷo mita tatua.
19Sin ropot ing kabaḷo mita tatua in tuabií kom bibig bo kon iputea. Sin iputea naonda bo uḷag inta ko'uḷu. Bo iputea tatua inta pomogutuínya kon intau.
20Ta'e intau mita ki agatnya inta diaí minatoi in roriga tatua doiípa doman mogogai mogaid kon inta diaí nopia inta biasamai aidan monia. Mosia umuran mosumbah kon dimukud mita mora'at bo berhala mita inta pinomia nongkon buḷawan, perak, tambaga, batu bo kayu inta diaí moko'ontong, diaí mokodongog bo diaí doman mokobayaí.
21Mosia diaípa doman mogogai im molimod, monggaing, mogaid kon inta diaí patus aidan bo monakow.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel