Alkitab Mobile SABDA
[VER] : [MONGONDOW]     [PL]  [PB] 
 <<  Yakobus 2 >> 

1Utatku mita! Saḷaku intau inta mopirisaya ko'i Tuhan Yesus Kristus, Tuhan naton inta Totok Momulia, daí dona'aibií mo'ikow mopoyo-poyoposi kon intau podudui ing ka'ada'an kobobiag monia.

2Sin aka oyuíon intau inta no'oyuíon inta nogisising buḷawan bo nogiḷambung mogagah namangoi kon undanganmu, bo dodai intua namangoi doman intau nobogaí inta nomakeí in ḷambung diaídon notampuimai,

3daí lebebií hormaton monimu in intau inta nogiḷambung mogagah ko'ina. Mo'ikow moguman ko'inia, "Tuang lituídon kong kadera inta totok mopia na'a." Ta'e aka kon intau inta nobiag nobogaí, mo'ikow moguman ko'inia, "Sindogdon kon tua," ande "lituídon kon taḷog kon na'a."

4Aka natua in aidan monimu, yo mo'ikow nopoyoposidon kon tumpaḷa intau bo monilai kon intau podudui im pikiran inta mora'at.

5Toropdon, Utatku mita inta kinotabiku! Intau inta nobiag nobogaí kon dunia na'a, pinilií i Allah mobalií intau inta mo'oyuíon kom bonu im pirisaya. Intau mita tatua mobaliíbií anggota umat i Allah naí inta pinodandi i Allah kon intau mita inta kinotabi-Nya.

6Ta'e mo'ikow ain noningkule kon intau mita inta nobiag nobogaí, padahaḷ intaubií mita inta no'oyuíon im mondorot bo mogugut ko'i monimu pobayak im pongadilan!

7Mosiabií tuata inta nohina kon tangoi mopia inta sinarima monimu nongkon i Allah!

8Mo'ikow mogaid kon inta mo'itutui, aka aidan monimu in hukum inta totok moponting inta pinais kom bonu in ayat Buk Mosuci nana'a: "Kotabibií in tumpaḷa intau naí kotabimu kon awakmu tontanií."

9Ta'e aka mo'ikow bo mopoyo-poyoposi intau podudui ing ka'ada'an kobobiag in intau, yo nogaidon kon dosa im mo'ikow, bo hukum i Allah moponyatadon kom mo'ikow nion moḷoḷawang kon hukum.

10Intau inta noḷawang kon tobatuí nongkon hukum mita i Allah, mangalenya kon tua nodaitnyadon iḷawang in hukum tatua.

11Sing ki inta noguman, "Dika monualing," siadon doman tua inta noguman "Dika molimod." Daí aka mo'ikow diaí nonualing, ta'e nolimod, daí mo'ikow im moḷoḷawangbií doman kon hukum.

12Posingog bo pogaid saḷaku intau inta bain adilon podudui kon hukum i Allah inta nopobebas kon intau.

13Sin diaíbií po'ontong i Allah in tabi-Nya kon intau inta diaí nonota'au in totabian. Ta'e tabibií im moḷobe-ḷoben nongkon hukuman!

14Utatku mita! Onubií im mangalenya intau moguman, "Aku'oi intau mopirisaya", aka diaí intua ponyatanya kon oaíid? Mokosaḷamat ko'inia degaí im pirisaya natua?

15Aka kuma tobatuí utat ḷoḷaki ande bobay diaí ko pakeang bo diaí koka'anon inta tugat ka'anon pomuḷoi in singgai.

16Onubií im mangalenya mo'ikow moguman, "Pakeídon im pakeang tana'a inta moko'inggamaí kon tumping bo ponga'andon!" -- aka diaí ogoian monimu in sia im pakeíonnya kong kobiagan?

17Natuata doman im pirisaya, aka diaí poponyata kon oaíid, daí pirisaya tatua diaíbií im mangalenya.

18Degaí oyuíon intau im moguman, "Oyuíon intau in umandoḷ kom pirisayanya bo oyuíon doman in umandoḷ kon oaíidnya." Daí akuoi moguman, "Po'ontongkah ko'inakoí im pirisaya takin diaí in oaíid bo po'ontongku ko'inimu in oaíidku saḷaku bungai kon aku'oi mopirisaya."

19Tantuí mo'ikow im mopirisayabií kong ki Allah in tongaíbií tobatuí toh? Baí kota'auan monimu kon dimukud mita mora'at mopirisayabií doman kon tua bo uyotbií doman makow im mosia sim mo'ondok!

20Mobodok totok im mo'ikow! Degaí paraḷupa po'ontong ko'i monimu kon diaíbií im mangalenya aka pirisaya diaí poyotakinon in oaíid?

21Indoiakah ing ki Abraham mogoguyang naton. Sia sinarima nopia i Allah lantaran oaíidnya, wakutu in sia noposumbah ko'i adiínya ki Ishak. Pinosumbahnya ko'i Allah kon tudu im mezbah.

22Nosilangdon kon na'a kom pirisaya musti ponyata kon oaíid simbaí mosompurna.

23Tua noyoka'an in ayat kom Buk Mosuci inta noguman nana'a: "Ki Abraham nopirisaya ko'i Allah, bo lantaran pirisayanya tatua daí sinarima i Allah in sia saḷaku intau inta nogaid kon onu ing kino ibog i Allah." Tuamai ki Abraham sinangoi, "Yobayat i Allah".

24Nosilangdon tana'a, kon intau tarima'an mopia i Allah lantaran onu inta inaidan in intau tatua, bo de'emanbií tongaí lantaran pirisayanya tatua.

25Natua doman ing ki Rahab, bobay sundaḷ tua. Sia sinarima nopia i Allah lantaran oaíidnya, wakutu in sinarimanya kom baḷoinya in totabaí mita intau Israel bo sinuḷungannya pinoḷagui im mosia nongin daḷan ibanea.

26Daí, naí awak inta diaí ko roho, awak tatua im minatoibií, natua doman im pirisaya inta diaí takinan in oaíid, tua im pirisayabií inta minatoi.



 <<  Yakobus 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran