Alkitab Mobile SABDA
[VER] : [MONGONDOW]     [PL]  [PB] 
 <<  Yakobus 4 >> 

1Onu im pinomangkoian in ropatoi bo rogenggeng kon sigad monimu? Tua im pinangkoibií kon ibogmu mita inta umuran mobobayowan kom bonu ing ginamu lantaran mo'ibog moko'ulií kong kasanangan in dunia na'a!

2Mo'ibog im mo'ikow, ta'e diaí moko'ulií, daí mo'ibog im mo'ikow molimod! Totok moḷoben in ibog monimu, ta'e diaí kodapotan monimu onu inta sinayak monimu tua, daí mobobayowan bo moropatoi im mo'ikow. Mo'ikow diaíbií moko'ulií kon onu bo onu, sim mo'ikow diaí no'igum ko'i Allah.

3Bo umpakah ain no'igum im mo'ikow, ta'e diaíbií doman moko'ulií im mo'ikow, sin no'itaḷaí in tujuan pino'igumanmu; sin onu inta inigum monimu tua tongaíbií kasanangan monimu tontanií.

4Mo'ikow nion intau inta diaí mosatia! Diaí kinota'auan monimu degaí kon aka mo'ikow moyobayat in dunia na'a, yo mo'ikow mobalií saturu i Allah! Daí ki ine i mo'ibog mobalií yobayat in dunia na'a, yo mangalenya kon tua, baliíonnya in sia saturu i Allah.

5Dikabií anggapon monimmu kon diaí in dodoyonan Buk Mosuci moguman, "Kom bonu in awak naton na'a sinampatdon i Allah in Roho inta motogat in ibognya."

6Umpakah natua, totabi Allah inta inogoi ko'i naton lebe moropot nongkon ibog in roho naton tatua. Tuamai kom bonu im Buk mosuci pinais doman, "ḷawangonbií i Allah intau inta mokaḷakuang, ta'e Sia im motabibií kon intau inta mo'ompaí in dodia."

7Tuamai, kotoinduduidon ko'i Allah bo ḷawangdon in Ibilis, daí moḷaguidon in Ibilis nongkon i monimu.

8Diugaidon ing ki Allah, bo ki Allah in dimiugdon ko'i monimu. Daritaidon in limamu, mo'ikow inta binaradosa! Bo insilangaidon ing ginamu, mo'ikow inta nonanga ing gina!

9Musti im mo'ikow totu-totu'u momanyasaḷ bo mongombaḷ poḷat mogamui; kosingmu baliídon ombaḷ bo ḷungangamu baliídon ajar ing gina!

10Mo'ikow musti mokopo'ompaí kon dodia kon tayowon i Tuhan, daí poḷantudon i Tuhan im mo'ikow.

11Utatku mita, dona'ai im mo'ikow mosiponapudan ande mosipotaḷaían. Intau inta moponapud ande mopotaḷaí ko'i utatnya inta tumpaḷa Keresten, yo intau tatua moningkule bo mopotaḷaí in hukum i Allah. Bo aka mo'ikow mopotaḷaí kon hukum i Allah, mangalenya kon tua mo'ikow diaí dinumudui kon hukum mita tatua, ta'e mo'ikow mobaliídon hakimnya.

12Padahaḷ tongaíbií tobatuí kokawasa mobogoi in hukum kon intau bo mohakim kon intau. Sia tuata ing ki Allah inta kokawasa moposaḷamat bo momutuí. Daí, ki ine im mo'ikow nion, sahingga mo'ikow mo'ibog mopotaḷaí kon tumpaḷa intau?

13Utat mita inta nosingog: "Singgai na'a ande ikoḷom kami mayak ing kotaí i Kuon bo mogutun kon tua totaong ing ko'onggotea sim modagang bo motayak kon doit," -- indongogai in tongginaku tana'a.

14Onu im mobalií kong kobiaganmu ikoḷom, diaíbií doman kinota'auanmu tontanií! Mo'ikow nion tongaíbií naonda bo poyok inta ko'ontongan motoyong, onda intua diaídon.

15Mustibií nana'a in singogon monimu: "Aka ogoi i Tuhan mobiag ing kami daí mogaid ing kami kon na'a ande kon tua."

16Ta'e tana'a makow mo'ikow mokaḷakuang bo mongonguman kom mo'iliu inta diaí totu'u. Bayongan o'uman mosiḷantud natua no'itaḷaíbií.

17Tuamai, intau inta kinota'auannya im mopia, ta'e diaí aidannya, yo binaradosa intau tatua.



 <<  Yakobus 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran