1Nopaḷut makow kon tua ki Yesus minayak in ḷoḷan Danow Galilea inta sinangoian Danow Tiberias.
2No'iyaputmai kon tua, mobayong intau dinumudui ko'i-Nia sin noko'ontongdon im mosia kon inta mokoherang inta pinomia i Yesus kon intau mita nongotakit bo nongopia domandon.
3Ki Yesus notakod kom buḷud, bo ilimituí kon tua takin murií-Nya mita.
4Wakutu intua diaídon mo'onggot Singgai Moḷoben Paskah intau Yahudi.
5Dodai ing ki Yesus nobobui magií-makow, inontong-Nya intau mokapu-kapung mamangoi ko'i-Nia. Daí Sia noliboí ko'i Pilipus, "Kon onda i mota'au naton potaḷuian kong ka'anon, simbaí bayongan intau tanion mota'au monga'an?"
6(Kinota'auan bidon i Yesus onu i musti aidan-Nya, ta'e Sia noguman natua sim monungkuḷ ko'i Pilipus.)
7Ki Pilipus notubag, "Aka roti bo tongaí boli in doyowa nogatut doit perak yo diaíbií tugat poka'an kon intau mita tanion, umpakahbií tongaí poyopilikon makow."
8Murií i Yesus tobatuí inta ki Andreas ki utat i Simon Petrus noguman ko'i Yesus,
9"Kon na'a oyuíon adi ḷoḷaki inta nodia kon roti lima nobatuí bo toyak doyowa nobungaí. Ta'e diaíbií pongonu aka kon intau moaíntoí tanion!"
10Ki Yesus noguman, "Pokilituíaidon intau mita tanion!" Kon tampat tatua nobayong im bonok, daí intau mita tatua ilimituí kom bonok. Mosia komintan tua oyuíonbií in lima noribu intau ḷoḷaki.
11Onda intua ki Yesus nogamaí kon roti bo nopoyaput in sukur ko'i Allah. Nopaḷut makow kon tua sinila-siali-Nya mokow in roti tatua kon intau moaíntoí tatua. No'iduduimai kon tua sinila-silai-Nya domandon in toyak tatua, bo mosia komintan nonga'an kino'o-ibogbií monia.
12Naonda in komintandon nonga'an nobotug, ki Yesus noguman kom muriíNya mita, "Sipundon agat mita in roti inta diaí kina'an monia simbaí diaí mogoguya'at."
13Bo sinipun monia. Nosipun magií mopuḷuh bo doyowaí nokompeí agat ing ka'anon inta tongaí nongkon roti lima nobatuí bo pinoka'an kon intau mobayong tatua.
14Naonda intau moaíntoí tatua noko'ontong kon inta mokoherang pinomia i Yesus, mosia noguman, "Totu'u, na'abií in nabi inta i harap makow mamangoi in dunia!"
15Kinota'auan i Yesus kom mosia mamangoi sim momakisa ko'i-Nia mobalií Raja monia. Tuamai Sia minayakdon kon daerah inta kom buḷud, Sia-sia mita.
16Naonda mulaidon mo'ungkoḷom, murií mita i Yesus nosiligdon bo minayak in danow.
17Bo mosia sinumakoi kon uangga bo minayak ing Kapernaum. Nodoḷomdon, ta'e ki Yesus diaípa doman namangoi ko'i monia.
18Dodai intua momangkoidon mobokoḷ in danow tatua sin tompot mogirup moropot.
19Naonda in noyayukdon pinobotoian monia, degaí lima ande onomdon nokilo im binaya'an monia, mosia noko'ontong ko'i Yesus nopoaíngoi in uangga takin minaya-mayak kon tudu in tubig. Mosia totokdon no'ondok.
20Ta'e ki Yesus noguman, "Dika mo'ondok sin Aku'oibií in na'a!"
21Bo takin pia ing gina mosia nonongganutdon ko'i-Nia sinumakoi kon uangga, bo dodaipa doman tua uangga monia no'itubuhdon kon tampat bayaían monia.
22Nopo'ikoḷomai kon singgai, intau moaíntoí inta umuranpa kon ḷoḷan danow, bo kinota'auanbi' monia kon tonga'bi' tobatu' in uangga. Kinota'auandon doman monia kom murií-Nya mita sinumakoidon kon uangga bo inumuna minayak. Ki Yesus in diaípabií sinumakin.
23No'iduduimai kon tua tongonumai uangga nongkon kotaí in Tiberias namangoi bo sinumubuh kon diug in tampat pinoka'anan intau moaíntoí kon roti naonda ing ki Tuhan nopoyaput in sukur.
24Naonda intau moaíntoí tatua diaídon noko'ontong ko'i Yesus bo murií-Nya mita kon tampat tatua, mosia sinumakoi kon uangga tatua bo minayak ing Kapernaum motayak ko'i Yesus.
25Naonda intau mita tatua noyodungkuḷdon i Yesus kon ḷoḷan danow, mosia noliboí ko'i-Nia, "Pak Guru, Dodai onda ki Pak Guru nodapot in na'a?"
26Tubag i Yesus, "Totu'ubií kom mo'ikow motayak ko'i-Nakoí de'emanbií lantaran kinomangaleandon monimu makusud in soaáḷ mita mokoherang inta pinomia-Ku, ta'e lantaranbií mo'ikow nonga'andon nodapot in nobotug.
27Dona'aibií mogaid simbaí moko'ulií kong ka'anon inta modai-daitpa bo inta mobobongkog. Ta'e pogaidbií simbaí moko'ulií kong ka'anon inta diaí mobobongkog bo inta mobogoi ing kobiagan mononoi. Ka'anon tatua in ogoibií i Adií Intau ko'i monimu, sin Sia ain ilantik i Allah inta ki Amaí."
28Daí mosia noliboí ko'i-Nia, "Onu im musti pomia'an nami, simbaí kami mogaid kon oaíidan inta kino'ibog i Allah?"
29Ki Yesus notubag, "Tana'abií ing kino'ibog i Allah nongkon i monimu: Popirisayadon ko'i-Nia inta pinotabaí mangoi i Allah."
30Daí kai monia doman, "Aka natua, onu in tanda po'ontong i Pak Guru ko'inami, simbaí kami moko'ontong bo mopirisaya ko'i Pak Guru? Onu in aidan i Pak Guru?
31Mogoguyang nami noka'an kom manna kom padang gurun, naí inta pinais kom bonu im Buk Mosuci, 'Sia nobogoi in roti nongkon soroga.'"
32Bo Ki Yesus noguman ko'i monia, "Pirisayabií: De'emanbií ki Musa, ta'e ki Amaí-Kubií in nobogoi ko'inimu in roti inta totu'u nongkon soroga.
33Sin roti inta inogoi i Allah in Siabií inta noponag nongkon soroga bo nobogoi ing kobiagan kon intau kon dunia."
34Daí mosia noguman, "Pak Guru, tantuídon ogoiai in roti tatua ing kami."
35Daí kai Yesus doman, "Aku'oibií na'a in roti inta mobogoi ing kobiagan, intau mita inta mamangoi ko'i-Nakoí diaí bidon angoian bui ing gogoy. Bo intau inta mopirisaya ko'i-Nakoí diaí bidon moyoga-yogang bui.
36Ta'e naí kai'n singog-Ku ko'i monimu, umpakahbií ain inontong monimu in Aku'oi, ta'e diaíbií mopirisaya im mo'ikow.
37Bayongan intau inta inogoi i Amaí-Ku ko'i-Nakoí im mamangoibií ko'i-Nakoí. Ki inekabií im mamangoi ko'i-Nakoí diaíbií in diaí tarima'an-Ku.
38Sin Aku'oi namangoi nongkon soroga de'emanbií mamangoi mogaid kon onu inta ko'ibog-Ku tontanií, ta'e mogaidbi' kon inta kino ibog-Nya inta nopotabaí ko'i-Nakoí.
39Bo na'abií ing kino'ibog i-Nia inta nopotabaí ko'i-Nakoí: simbaí bayongan intau inta inogoi ko'i-Nakoí, diaí tobatuímai i mobuli; ta'e baí bangonon-Ku im mosia kon singgai ponantuían.
40Totu'u na'abií ing kino'ibog i Amaí-Ku: Baí bayongan intau inta noko'ontong kon Adií bo nopirisaya ko'i-Nia moko'ulií kong kobiagan mopia bo mononoi, bo mobiag bui kon singgai ponantuían."
41Intau mita Yahudi mulaidon mongunsingog ko'i Yesus, sing ki Yesus noguman: "Aku'oi in roti inta noponag nongkon soroga."
42Mosia noguman, "Sia na'a ing ki Yesus, ki adií i Yusup to? Kinota'auanbií nami ing ki inaí bo ki amaí-Nya! Yo nongonu sin Sia in mogumanbií, kon Sia in noponag nongkon soroga?"
43Daí ki Yesus noguman ko'i monia, "Dona'ai mongunsingog.
44Diaíbií tobatuímai intau mota'au mamangoi ko'i-Nakoí, aka diaí diaan mangoi i Amaí inta nopotabaí mangoi ko'i-Nakoí. Ki ine i mamangoi ko'i-Nakoí, yo biagon-Kubií in sia kon singgai ponantuían.
45Kom bonu im Buk nabi mita pinais nana'a: 'Komintan intau tunduíonbií i Allah.' Daí bayongan intau inta ain nokodongog kon totunduí bo nobalajar nongkon i Amaí, mamangoibií ko'i-Nakoí.
46Tongaí tua in de'emanbií mangalenya kon oyuíondon intau ain noko'ontong ko'i Amaí. Tongaíbií Sia inta namangoi nongkon i Allah in noko'ontongdon ko'i Amaí.
47Pokota'audon! Intau inta mopirisaya, oyuíonbií ing kobiagan mopia bo monoi.
48Aku'oibií na'a in roti inta mobogoi ing kobiagan.
49Mogoguyang monimu noka'andon kom manna kom padang gurun bo mosia aim minatoi.
50Ta'e diaíbií natua in roti inta noponag nongkon soroga: 'Intau inta moka'an kon roti tatua diaíbií matoi.'
51Aku'oibií in roti inta noponag nongkon soroga, roti inta mobogoi ing kobiagan. Intau inta moka'an kon roti tana'a umuranbií mobiag. Roti inta ogoi-Ku kong kobiagan intau kon dunia na'a in awak-Kubií."
52Nokodongogmai kon tua, intau mita in Yahudi nobobayowan. Mosia nosingog: "Umpakah intau tanion mokobalií mobogoi in awak-Nya sing ka'anon naton?"
53Bo ki Yesus noguman ko'i monia, "Poguman-Kudon ko'imonimu, Aka mo'ikow bo diaí moka'an kon awak i Adií Intau bo monginum kon duguí-Nya, yo diaíbií i mo'ikow mobiag.
54Intau inta moka'an kon awak-Ku bo monginum kon duguí-Ku sia i moko'ulií kong kobiagan mopia bo mononoi bo biagon-Kubií in sia kon singgai ponantuían.
55Sin awak-Ku in totu-totu'ubií ka'anon bo duguí-Ku in totu'ubií o'inumon.
56Intau inta moka'an kon awak-Ku bo monginum kon duguí-Ku, umuranbií in Sia motobatuí takin-Ku, bo Aku'oi i motobatuínya doman.
57Ki Amaí inta nobiag tua, nopotabaí ko'i-Nakoí bo Aku'oi tontanií nobiagbií doman nongkon i Amaí. Natua doman intau inta moka'an kon awak-Ku, sia im mobiagbií doman nongkon i-Nakoí.
58Na'abií in roti inta noponag nongkon soroga: de'emanbií naí roti inta kina'an im mogoguyang monimu. Sin naonda in noka'an makow kon roti tatua, mosia minatoi doman. Ta'e intau inta moka'an kon roti tana'a in umuranbií mobiag."
59Tua komintan pinoguman i Yesus dodai in Sia notunduí kom baḷoi pososambayangan kong Kapernaum.
60Naonda in nokodongog kon singog mita i Yesus tatua, nobayong kon sigad im murií-Nya mita noguman, "Totunduí tana'a totu'u mobogat. Ki inebií im mokomampu motarima kon tua!"
61Kinota'auanbií i Yesus kom murií-Nya mita mongunsingogbií doman kon soaáḷ tatua. Daí tuamai Sia noguman, "Degaí mokotersinggung ko'i monimu in singog-Ku mita tatua?
62Yo onu degaí im mobalií aka mo'ikow moko'ontongdon ko'i Adií Intau mamonik bui kon tampat-Nya inta muna?
63Rohobií i Allah in nobogoi ing kobiagan kon intau. Ropot in intau na'a diaí baragunanya. Singog mita inta pinosingog-Ku ko'i monimu na'a in singogbií mita in Roho i Allah bo singogbií inta mobogoi ing kobiagan.
64Tongaí oyuíon doman kon sigad monimu in diaí mopirisaya." (Kinota'auan bidon muna i Yesus in intau mita inta doií mopirisaya, bo ki ine mobaḷui im pirisaya ko'i-Nia.)
65Bo ki Yesus bui noguman, "Tuamai Aku'oi noguman ko'inimu, 'diaíbií tobatuímai intau mota'au mamangoi ko'i-Nakoí, aka diaí ko'ibog i Amaí."
66Nongkon dodaidon in tuata bo nobayong in dumodudui-Nya nonaḷaímaidon ko'i-Nia, bo doiídon dinumudui ko'i-Nia bui.
67Bo ki Yesus noliboí kom murií-Nya inta mopuḷuh bodoyowaí tatua, "Degaí mo'ikow monaḷaí domanmai ko'i-Nakoí?"
68Daí ki Simon noliboí, "Tuhan, ko'i inepa im bayaían nami? Tosingogon i Tuhan mobogoi ing kobiagan mopia bo mononoi.
69Kami na'a in nopirisaya bo noyakin bidon kong ki Tuhanbií in totabaí inta mosuci nongkon i Allah."
70Ki Yesus notubag: "Kinota'auan bidon monimu kon Aku'oibií in nomilií ko'i monimu mopuḷuh bodoyowaí na'a! Tongaí tobatuí kon sigad monimu nion ing kinawasaan in Ibilis!"
71Ki Yudas ki adií i Simon Iskariot i makusud i Yesus tatua. Sin ki Yudasbií tuata im moposarakan ko'i Yesus, umpakah sia murií doman i Yesus inta kon sigad im murií-Nya mopuḷuh bodoyowaí.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel