Alkitab Mobile SABDA
[VER] : [NGAJU]     [PL]  [PB] 
 <<  Kisah Para Rasul 13 >> 

1Intu huang ungkup Antiokhia aton kare nabi tuntang kare guru, iete Barnabas, Simon je inggare Bilem, Lukius bara Kirene, Menahem je belom bara korik sampai hai hinje raja Herodes, tuntang Saulus.

2Katika ewen metoh sombayang manyembah Tuhan tuntang puasa, Roh Hatalla hamauh dengan ewen, "Intih akangku Barnabas tuntang Saulus uka ewen malalus gawi je jari inatap akan ewen."

3Limbah puasa tuntang balakudoa ewen mina lengen ewen hunjun Barnabas tuntang Saulus palus manyoho ewen haguet.

4Basa inyoho awi Roh Hatalla, Barnabas tuntang Saulus haguet akan Seleukia. Bara hete ewen balayar akan pulau Siprus.

5Katika sampai hong Salamis, ewen mambarita auh Hatalla hong kare huma sombayang Yehudi. Yohanes Markus mandohop ewen huang jalanan ewen.

6Hapus pulau te ingumbang ewen sampai Papos. Intu hete ewen hasondau dengan oloh Yehudi bagare Bar Yesus. Ie te tukang sihir je mangaku arepe nabi.

7Sergius Paulus, gubernur pulau te hasobat toto dengan tukang sihir te. Gubernur te ije biti oloh pintar harati. Ie mantehau Barnabas tuntang Saulus basa ie mipen handak mahining auh Hatalla.

8Tapi Barnabas tuntang Saulus inantang awi Elimas tukang sihir te, awi Elimas (Jete arae huang basa Yunani) manggau jalan uka gubernur te ela sampai percaya dengan Yesus.

9Tapi Saulus -- je inyewut kea Paulus -- inguasa awi Roh Hatalla, sampai ie manampayah tukang sihir te,

10palus hamauh, "O kapala tanjaro, anak kapapa! Ikau musoh kare taloh bahalap. Mbuhen ikau dia maku terai marusak rencana Hatalla uka manyalamat olon?

11Ite toh, Tuhan kareh mahukum ikau! Ikau kareh manjadi babute, sampai ikau dia tau mite kalawan matanandau tinai katahin ije katika." Hemben te kea Elimas mangkeme aton ambun je babilem manutup matae sampai ie mananjong gaya-gayap manggau oloh uka mangagalan ie.

12Katika gubernur te mite taloh je jari manjadi, ie percaya dengan Yesus; awi ie jungun toto tagal auh ajar tahiu Tuhan.

13Bara Papos, Paulus tuntang kare kawale balayar akan Perga hong Pampilia. Intu hete Yohanes Markus malihi ewen, palus haluli akan Yerusalem.

14Bara Perga ewen marajur jalanae akan Antiokhia hong Pisidia, limbah te hong andau Sabat ewen haguet tuntang mondok huang huma sombayang.

15Limbah Surat Moses tuntang Surat Kare Nabi imbasa, kare pamimpin huma sombayang te manyoho oloh misek dengan Paulus tuntang kare kawale, "Pahari handiai, amon ain pahari aton ije auh nasehat akan kare oloh toh, takan ih manyampai auh nasehat te."

16Maka Paulus mendeng palus manenga tanda hapan lengee, limbah te ie hamauh, "Paharingku handiai bangsa Israel tuntang kare pahari handiai je beken kea hetoh je mamenda Hatalla! Keleh hining auhku:

17Hatalla ain bangsa Israel jari mintih tato hiang itah, tuntang manjadian bangsa toh bangsa je hai metoh ewen manamuei hong tanah Misir. Limbah te, hapan kuasae je hai, Hatalla mimbit ewen balua bara Misir.

18Ie sabar atei Aie manaharep ampin kare tingkah ewen hong padang pasir epat puluh nyelo katahie.

19Uju bangsa oloh impalomose hong daerah Kanaan uka mambagi-bagi daerah te akan bangsa Israel mangat daerah te manjadi daerah ain ewen.

20Taloh samandiai te manjadi epat ratus lime puluh nyelo katahie. Limbah ewen mambagi daerah Kanaan te, Hatalla manenga akan ewen kare hakim. Hakim je pangkarahiae iete nabi Samuel.

21Rahian tinai ewen balaku ije biti raja. Hatalla manenga akan ewen Saul anak Kis bara suku Benyamin uka manjadi rajan ewen epat puluh nyelo katahie.

22Limbah Hatalla manindar ie bara kadudukae, Hatalla mangkat tinai Dawid manjadi rajan ewen. Tuntang toh ie taloh je insanan Hatalla tahiu Dawid, 'Aku jari mandino Dawid anak Isai te ije biti oloh je manyanang atei-Ku. Ie te oloh je malalus kahandak-Ku.'

23Bara turonan Dawid te Hatalla manatap akan bangsa Israel ije Raja Panyalamat, kilau je jari injanjie. Tuntang Yesus te Ie Raja Panyalamat te.

24Helo bara Yesus nampara malalus gawie, Yohanes jari mantehau kare oloh Israel uka hobah bara dosan ewen tuntang impandoi.

25Tuntang katika gawie tokep hapus Yohanes hamauh dengan kare oloh, 'Eweh kea aku toh manumon koan keton? Aku toh dia ie oloh je ientai keton. Ingat oloh te kareh dumah limbah aku; aku toh, aloh mengkak talin sapatun Ayue mahin jaton patut Akae.'

26Pahari handiai turonan Abraham, tuntang kare pahari handiai je beken intu hetoh je mamenda Hatalla! Hatalla jari mangirim akan itah barita salamat te;

27basa kare oloh je melai hong Yerusalem tuntang kare pamimpin ewen dia mangatawan Ie te je bagare panyalamat te. Ewen dia harati auh ajar kare nabi je imbasa genep andau Sabat, sampai ewen mahukum Yesus. Tapi tagal ewen mawi taloh je macam te, maka tagal ewen te kea taloh je inujum awi kare nabi manjadi tulus.

28Aloh ewen dia olih sondau taloh en-en je tau mawi Ie ihukum hapan pampatei, mahin kea ewen balaku dengan Pilatus uka Ie impatei.

29Tuntang limbah ewen jari mahapus kare taloh gawin ewen mawi Ie kilau je jari inyurat huang Surat Barasih, ewen mampamohon hantue bara kayu sampalaki, palus mingkes Ie huang kubur.

30Tapi Hatalla mambelom Ie haluli bara pampatei.

31Limbah te pire-pire andau katahie Ie mamparahan arepe akan kare oloh je jari dumah hayak dengae bara Galilea akan Yerusalem. Ewen te je wayah toh manjadi saksi tahiu Ie akan bangsa Israel.

32Jadi toh, ikei manyampai Barita Bahalap te akan keton: Taloh je jari injanji Hatalla akan tato-hiang itah,

33jete jari ilalus intu itah awie mambelom Yesus haluli bara pampatei. Basa huang Mazmur je kadue aton tarasurat, 'Ikau toh anak-Ku, hong andau toh Aku manjadi Bapa Ayum.'

34Hatalla jari mambelom Ie haluli bara pampatei. Toh Ie dia mangkeme pampatei tinai intu huang kubur, tahiu hal te Hatalla hamauh, 'Aku kareh manenga Akam janji je barasih, je pasti kareh inggenep, je jari injanji-Ku akan Dawid.'

35Kalote kea hong ayat beken inyewut, 'Ikau kareh dia manalua rewar Aim je baketep te maram huang kubur.'

36Dawid jari matei tuntang ingubur kea hinje dengan tato-hiange, limbah Ie malalus kare taloh je inyoho Hatalla Ie mawie. Hantun Dawid mahin jari hancor lepah urase.

37Tapi Yesus, je imbelom haluli awi Hatalla bara pampatei, Yesus te dia hancor lepah.

38Tagal te pahari handiai, keton musti katawan iete mahalau Yesus toh barita ampun dosa insanan akan keton; keton musti katawan iete gagenep oloh je percaya dengae, iliwus bara kare dosae je dia olih impuas mahalau kare parentah Hatalla je inyampai awi Moses.

39(13:38)

40Jete sababe keton musti manantuani bua-buah ela sampai buah keton taloh je insanan awi kare nabi,

41'Nantuani bua-buah, o kare keton je rajin mahina! Keton kareh hengan, palus matei! Basa hong jaman jetoh Aku kanjerangku malalus taloh je dia keton handak percayae, aloh aton oloh manarange akan keton.'"

42Katika Paulus tuntang Barnabas malihi huma sombayang te, kare oloh intu huma sombayang te balaku ewen haluli tinai huang andau Sabat je rahian, uka manarang labih are tahiu kare hal te.

43Limbah kare oloh balua bara huma sombayang te, Paulus tuntang Barnabas inuntut awi are oloh Yehudi tuntang oloh bangsa beken je jari tame agama Yehudi. Maka kare rasul te manasehat ewen harajur harap dengan asin Hatalla.

44Hong andau Sabat je rahian tinai, bilak uras oloh hong lewu te dumah mahining auh Tuhan.

45Katika kare oloh Yehudi mite kare oloh are te, ewen bahiri toto ateie. Ewen mahina Paulus tuntang malawan taloh handiai je insanae.

46Tapi Paulus tuntang Barnabas sasar bahanyi haream hakotak tarus-tarang. Ewen hamauh, "Auh Hatalla puna musti inyampai helo akan keton. Tapi awi keton dia maku manarimae, keton jari manukas kabuat keton dia patut manarima pambelom je bujur tuntang katatahie. Tuntang toh ikei malihi keton tuntang manalih bangsa beken.

47Basa jetoh parentah Tuhan akan ikei; Tuhan hamauh, 'Aku jari manukas keton manjadi kalawa akan kare bangsa beken je dia Yehudi, mangat keton mimbit salamat akan hapus kalunen.'"

48Katika kare bangsa beken je dia Yehudi mahining jete, ewen hanjak toto, palus manara auh Tuhan. Tuntang kare oloh je jari inukas awi Hatalla uka mandino pambelom je bujur tuntang katatahie, maka kare oloh te palus percaya.

49Maka auh Tuhan tayap akan hete-hete hong hapus daerah te.

50Tapi kare oloh hai hong lewu te tuntang kare oloh bawi bara utus gantong je mikeh dengan Hatalla, buah pangaruh awi kare oloh Yehudi. Ewen mampalembut kamusoh dengan Paulus tuntang Barnabas, tuntang maharak ewen due bara daerah te.

51Maka kare rasul te mangibas kawo bara pain ewen intu taharep kare oloh te kilau pampingat, palus haguet akan Ikonium.

52Kare murid hong Antiokhia paham hanjak tuntang inguasa awi Roh Hatalla.



 <<  Kisah Para Rasul 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel