Alkitab Mobile SABDA
[VER] : [NGAJU]     [PL]  [PB] 
 <<  Wahyu 16 >> 

1Palus aku mahining auh hai bara Human Hatalla hamauh dengan uju malekat te, "Lius tuntang tusoh uju sarangan kalait Hatalla te akan hunjun petak!"

2Malekat je solake palus haguet tuntang manusoh taloh huang sarangan te akan petak. Maka lembut kare baloyong paham tuntang manungut toto mawi oloh handiai je aton tanda ain meto te, tuntang mawi kare oloh je manyembah hampatonge.

3Limbah te malekat je kaduee manusoh taloh huang sarangan te akan tasik. Maka danum tasik palus manjadi sama kilau dahan oloh matei, tuntang kare taloh je belom hong tasik palus matei.

4Limbah te malekat je kateloe manusoh taloh huang sarangan te akan sungei tuntang akan kare batang danum, maka danume lepah uras manjadi daha.

5Aku mahining malekat je kuasa hunjun danum hamauh, "Hukuman je iawim te puna bujur, o Je Barasih, Hatalla je aton, tuntang je jari aton!

6Ewen jari manusoh dahan ungkup ain Hatalla tuntang dahan kare nabi; toh ikau mawi ewen mangat mihop daha. Jete puna patut akan ewen!"

7Palus aku mahining auh bara mesbeh hamauh, "Tuhan, Hatalla Pangkahain Kuasae, buah tuntang bujur kare hukuman je iawim!"

8Limbah te malekat je kaepat manusoh taloh huang sarangan te akan matanandau, maka matanandau kea inyoho uka mangehu oloh kalunen hapan kalasote je paham te.

9Oloh kalunen ingehu awi kakaras lasote, tuntang ewen manyapa aran Hatalla, je kuasa mahunjun kare calaka te. Aloh kalote, ewen dia maku hobah bara dosan ewen tuntang dia maku manara kahain Hatalla.

10Palus malekat je kalimee manusoh taloh huang sarangan te akan padadusan meto te. Maka hapus karajaan meto te manjadi kaput tuntang oloh kalunen mamangkit jelae awi kapehee.

11Palus ewen manyapa Hatalla hong sorga awi ewen paham kapehe tuntang awi kare luyong ewen. Tapi dia kea ewen hobah bara kare gawin ewen je papa.

12Limbah te malekat je kajahawee manusoh taloh huang sarangan te akan huang Sungei Euprat je hai te. Maka sungei hai te teah sampai kare raja bara hila timor tau mananjong mahoroi hete.

13Palus aku mite telo roh papa je ampie sama kilau bakatak. Gagenep bakatak te balua mije-mije bara nyaman naga, nyaman meto, tuntang bara nyaman nabi pananjaro.

14Jete ie kare roh papa je mawi kare taloh heran. Katatelo roh te haguet manalih kakare raja hong hapus kalunen tuntang mamumpong ewen uka haguet parang hong andau je hai, iete andau ain Hatalla je Pangkahain Kuasae.

15"Hining toh! Aku dumah sama kilau maling! Salamat oloh je tetep bajaga tuntang mahaga pakaiae, maka ie kareh dia mananjong halowai tuntang mahamen intu taharep oloh are!"

16Limbah te kare roh te mamumpong kare raja te huang ije eka je hong bahasa Ibrani inyewut Harmagedon.

17Limbah te malekat je kaujue manusoh taloh huang sarangan te akan udara. Palus tarahining auh je hai toto bara padadusan hong Human Hatalla, hamauh, "Jari hapus!"

18Te palus kilat sir-sar manyambar tuntang auh nyaho mangaruntong tuntang manggalagar, hayak petak hagerek paham toto. Dia puji petak hagerek kilau te bara tamparan kalunen injapa. Jetoh ie petak hagerek je pangkapahame!

19Lewu hai te bapusit manjadi telo bagian, tuntang kare lewu hong hapus kalunen manjadi hancor. Palus Hatalla taraingat tahiu Babel je hai te. Maka Hatalla mampihop ie hapan danum anggor bara sarangan anggor ain Hatalla -- iete anggor kalait je paham mangambuar.

20Uras kare pulau lilap, tuntang kare bukit nihau kea.

21Ujan es hai, ehate lime puluh kilogram ije kabawak, manjato bara langit manempak kare oloh. Maka ewen manyapa Hatalla tagal calaka ujan es je paham te.



 <<  Wahyu 16 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel