Alkitab Mobile SABDA
[VER] : [NGAJU]     [PL]  [PB] 
 <<  Yohanes 2 >> 

1Due andau tinai limbah te aton pesta kawin intu lewu Kana hong Galilea, tuntang indu Yesus aton intu hete.

2Yesus tuntang kare murid Ayue irawei kea akan pesta te.

3Katika anggor jari lepah, indu Yesus hamauh dengan Yesus, "Ewen lepah anggor."

4Yesus tombah, "Ela manyoho Aku. Hindai sampai katikae Aku mamparahan arep-Ku."

5Tapi indu Yesus hamauh dengan kare anak oloh, "Lalus ih narai taloh je inyoho Awie keton."

6Hong hete aton jahawen balanai je inatap hapan bapenyau manumon hadat oloh Yehudi. Gagenep balanai te huange kurang labih aton saratus liter.

7Yesus hamauh dengan kare anak oloh te, "Suang kare balanai te hapan danum." Maka ewen manyuange sampai kontep.

8Palus Yesus hamauh dengan ewen, "Nah, imbit isut danum te akan pamimpin pesta." Ewen mimbit danum te akan pamimpin pesta,

9tuntang ie manyurop danum je jari hobah manjadi anggor. (Ie dia katawan bara kueh anggor te, baya kare anak oloh je manyuang danum te ih je katawae.) Maka pamimpin pesta te mantehau panganten hatue,

10palus hamauh dengae, "Bahut, oloh labih helo manyarongan anggor je paling bahalap tuntang amon kare tamu jari peda mihop, harun manyarongan anggor biasa. Tapi pahari sampai toh mingkes anggor je paling bahalap!"

11Maka jete taloh heran je solake ilalus Yesus. Ie malalus jete intu Kana hong Galilea. Mahapan tanda te Ie mamparahan kahain Ayue. Maka kare murid Ayue percaya Dengae.

12Limbah te tinai Yesus haguet akan Kapernaum haya-hayak dengan indu Ayue, kare paharin Ayue tuntang kare murid Ayue. Ewen melai hete pire-pire andau katahie.

13Metoh Andau Pesta Paska Yehudi jari tokep, Yesus haguet akan Yerusalem.

14Intu Human Tuhan hong Yerusalem Ie sondau kare oloh panjual sapi, tabiri, tuntang burong dara; tuntang kea kare oloh je manakiri duit, mondok intu hete.

15Yesus manampa ije cambuk bara tali palus maharak uras kare meto te, aloh tabiri atawa sapi, bara huang Human Tuhan. Kare meja ain oloh je manakiri duit inambalike sampai kare duit ewen kasaburan akan hete-hete.

16Palus Ie hamauh dengan oloh je bajual burong dara, "Gatang urase bara hetoh. Ela mawi Human Bapa-Ku manjadi eka badagang!"

17Maka kare murid taraingat dengan auh Surat Barasih kalotoh, "Sintang-Ku dengan Human Ayum, o Hatalla, mangalasot atei-Ku."

18Kare panguasa Yehudi manantang Yesus, koan ewen, "Coba mawi taloh heran akan ikei, je mansanan ikau aton hak mawi taloh kilau toh."

19Yesus tombah, "Nderep ih Huma toh, tuntang huang telo andau Aku kareh mamangun jete haluli."

20Palus ewen hamauh, "Epat puluh jahawen nyelo katahie oloh mamangun Human Hatalla toh. Tuntang ikau handak mamangue haluli huang telo andau?"

21Tapi Human Hatalla je koan Yesus iete bitin Ayue kabuat.

22Jadi limbah te tinai, sana Yesus impisik bara pampatei kare murid Ayue taraingat Yesus puji mansanan hal te akan ewen. Maka ewen balalu percaya dengan taloh je inyurat huang Surat Barasih tuntang dengan taloh je insanan awi Yesus.

23Pandehan Yesus aton hong Yerusalem, hong wayah Pesta Paska, are oloh percaya dengan Yesus tagal kare taloh heran je iawi Yesus.

24Tapi Yesus kabuat dia percaya dengan ewen, awi Ie mangasene oloh samandiai.

25Oloh dia usah manenga katarangan Akae tahiu eweh bewei, awi Ie katawan kabuat taloh je aton huang atei olon.



 <<  Yohanes 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel