1Iada'e omasido ufaehagõ zanandrõsa ba zi no miw̃a'õ bakha ba zurami khõgu. Na so ndra matua si lõ mangowalu, ba sõkhi da'õ.
2Ba hiza, ena'õ bõi gõna ia fanandraigõ ba wolau si lõ enahõi, abõlõ sõkhi dozi ira matua so ndrongania samõsa, ba dozi ira alawe so gõi wo'omonia samõsa.
3Lõ tola lõ ifõnui halõw̃õ wa'afo'omo ira matua khõ ndrongania ira alawe, ba ira alawe ifõnui gõmõnia fa'afo'omo khõ wo'omonia ira matua; dozi ira faoma lafõnui gõmõra faoma fatambai.
4Lõ kuaso ndra alawe ba mbotonia samõsa; no fo'omonia zi so kuaso ba mbotonia. Si manõ gõi ndra matua, lõ kuasonia ba mbotonia samõsa; no fo'omonia zi so kuaso ba mbotonia.
5Bõi ya lafandrõndrõu ira ya'ira si faronga. Tola sa ba zi lõ ara, asala si fatehe dõdõra darua ira. Ba zi manõ dozi ira tola ahono ba wangandrõ. Ba aefa da'õ i, lõ tola lõ mifuli mifahatõ'õ ami khõ naw̃õmi si mane si faronga. Na lõ si manõ, tola adõni dania dõdõmi ba wehede gafõkha, bõrõ me no ambõ fa'abõlõmi ba wanaha fangisõ.
6Tenga fareta wanguma'õgu da'e, ha menemene.
7Sindruhunia abõlõ omasido na hulõ si mane ya'o fefu niha. Ba hiza, dozi niha no manema howuhowu si faehufaehu moroi khõ Lowalangi. Fabõ'õ mbuala khõ da'a, ba fabõ'õ gõi khõ da'õ.
8Si mane menemenegu ba niha si lõ sangowalu awõ ba ndra alawe si no lakha mbanua: Abõlõ sõkhi na lõ mangowalu sa'ae ami si mane ya'odo.
9Ba hiza, na tebai mitaha wangisõ andrõ, abõlõ sõkhi na milau mangowalu. Abõlõ sõkhi na mangowalu ami, moroi na mo'alitõ wangisõ dõdõmi.
10Si mane gõi waretagu khõ ndra si no mangowalu: (Sindruhunia tenga ya'o zame'e fareta andre no So'aya.) Ira alawe si no mangowalu, bõi ya murõi wo'omonia.
11Ba hiza na no irõi ia fo'omonia ira matua andrõ, bõi ya mõi nihalõ ia sa'ae, sõkhi na mangawuli ia khõ wo'omonia. Ba ira matua, tebai ifabali wo'omonia.
12Ba danõ bõ'õ si mane menemenegu: -- menemenegu samõsa da'e, tenga moroi khõ Zo'aya -- na ira matua Niha Keriso i'owalu ndra alawe si lõ faduhu tõdõ khõ Keriso, ba fao dõdõ ndra alawe andrõ orudu ira ba wa'auri, tebai ifabali ira matua wo'omonia andrõ.
13Ba na so ndra alawe Niha Keriso sangowalu ba ndra matua si lõ faduhu tõdõ khõ Keriso, ba fao dõdõ ndra matua andrõ orudu ira ba wa'auri, tebai ifabali wo'omonia andrõ ira alawe Niha Keriso da'õ.
14Bõrõ me tetehegõ tobali ndrotondroto mbanua Lowalangi wo'omo ira matua andrõ bõrõ wangowalunia khõ ndra alawe si no tana khõ Lowalangi. Si manõ gõi wo'omo ira alawe si lõ faduhu tõdõ andrõ, tetehegõ tobali ndrotondroto mbanua Lowalangi bõrõ wangowalunia khõ wo'omonia ira matua si no tana khõ Lowalangi. Na lõ si manõ, hulõ nono niha baero dania nonora, hew̃a'ae taw̃a'õ tana khõ Lowalangi ira.
15Ba na irõi wo'omonia ira matua si no Niha Keriso ma fo'omonia ira alawe si no Niha Keriso niha si lõ faduhu tõdõ andrõ, ba bõi mutaha ia. Ba zi mane da'e ya'ami ira talifusõ ira matua ba talifusõ ira alawe, lõ tobõbõ ami, bõrõ me sabõlõ omasi Lowalangi na ha sara dõdõmi.
16Bõrõ me ya'ugõ fo'omo ira alawe -- si no faduhu tõdõ khõ Zo'aya -- hewisa wa õ'ila wa tebai õ'orifi wo'omou ira matua? Si manõ gõi ndra'ugõ talifusõ fo'omo ira matua Niha Keriso, hewisa wa õ'ila wa tebai õ'orifi wo'omou ira alawe?
17Akha lafakhoi wa'aurira zamõsana molo'õ famatõrõ Lowalangi, si mane si no Ihonogõi Lowalangi khõnia me inõtõ Ikaoni ia Lowalangi ena'õ faduhu dõdõ khõ-Nia. Da'õ gamakhoita nifahaõgu ba zi dozi banua Niha Keriso.
18Dumaduma, na no muboto niha me itema wogaoni Lowalangi ya'ia, ba bõi ya muheta dandratandra wamoto andrõ. Si manõ gõi niha si lõ muboto me itema wogaoni Lowalangi ya'ia, bõi ya mu'andrõ ena'õ laboto ia.
19Bõrõ he na mu'o'õ gamakhoita wamoto ba he na lõ'õ, fagõlõgõlõ lõ eluaha. Hadia zabõlõ moguna ya'ia da'õ folo'õ oroisa Lowalangi.
20Akha itema'õ manõ wa'aurinia niha si mane me awena itema wogaoni Lowalangi ya'ia.
21Na sawuyu ami me tekaoni, bõi mibusi dõdõmi wo'angeragõ da'õ. Ba hiza, na so ginõtõ dania õsõndra wangefa, oguna'õ ginõtõ andrõ.
22Bõrõ me sawuyu si faduhu tõdõ khõ Zo'aya, no niha Zo'aya si no mu'efa'õ. Ba niha ni'efa'õ si faduhu tõdõ khõ Zo'aya, no sawuyu Keriso.
23No I'õli ami Lowalangi, ba no abu'a mbõlimi Ibe'e. Bõrõ da'õ, bõi tehegõ tobali sawuyu niha ami.
24Tobali gofu hewisa ami me tekaoni ami khõ Lowalangi, akha lõ mamalõ: si manõ ami ba khõ Lowalangi.
25Iada'e sanandrõsa ba niha si lõ sangowalu. Sanandrõsa ba da'õ, ma'ifu lõ nitemagu fareta moroi khõ Zo'aya. Ba hiza, me niha nifaduhusi tõdõ bõrõ wa'ebua dõdõ Zo'aya, omasi ndra'o ube'e menemenegu.
26Ba wo'angeragõ fefu ngawalõ wa'abu dõdõ sameta'u niha iada'e, molo'õ ya'o, abõlõ sõkhi na lõ tebulõ niha wanõrõ lala wa'aurinia si mane si so ya'ia iada'e.
27Na so wo'omomi ira alawe, bõi mi'odõdõgõ wangefa'õ ya'ami khõnia. Ba na lõ sangowalu ami, akha bõi mi'alui ena'õ so wo'omomi ira alawe.
28Ba hiza na mangowalu sa ami, tenga horõ da'õ. Si manõ gõi na mangowalu nono alawe, tenga horõ da'õ. Awai i, oya latõrõ wamakao dania ya'ira si no mangowalu andrõ. Ba omasido na aefa ami moroi ba wamakao andrõ.
29Si mane gohitõ dõdõgu ira talifusõ: Lõ oya tõ ginõtõ khõda. I'otarai iada'e, niha si no so fo'omo ira alawe, akha hulõ zi lõ fo'omo ia;
30niha sege'ege, akha hulõ zi tenga sabu tõdõ ia; niha sa'iki'iki, akha hulõ zi lõ omuso dõdõ, niha si no mowõli, akha hulõ zi lõ mangokhõgõ hadia ia;
31ba niha samaogõ ya'ia ba wa'a'ulidanõ andre, akha hulõ zi lõ ifawukaisi dõdõnia da'õ fefu. Bõrõ me ba zi mane iada'e, lõ ara tõ taya gulidanõ andrõ!
32Omasi ndra'o na aefa ami fefu moroi ba wa'abu dõdõ. Ira matua si lõ fo'omo tola i'osambua'õ dõdõnia ba ngawalõ zanandrõsa khõ Zo'aya, me omasi ia i'omusoi'õ dõdõ Zo'aya.
33Ba hiza, ira matua si so fo'omo oi i'angeragõ gulidanõ andre, bõrõ me omasi ia i'omusoi'õ dõdõ wo'omonia;
34lualuania mangeraha dõdõnia. Ira alawe si lõ fo'omo ba ma ono alawe, tola abõlõ i'angeragõ ngawalõ zanandrõsa khõ Zo'aya, me omasi ia na tobali okhõta Lowalangi mboto ba nosonia. Ba hiza, ira alawe si so fo'omo, abõlõ i'angeragõ ngawalõ hadia ia ba gulidanõ andre, me omasi ia i'omusoi'õ dõdõ wo'omonia.
35Usura fefu da'e soguna khõmi samõsa, tenga ba wanenaw̃a da'e ba ma zui da'õ. Somasi ndra'o ena'õ milau zatulõ ba si faudu, ba ena'õ tola mi'osambua'õ dõdõmi khõ Zo'aya.
36Ba na iw̃a'õ tõdõnia niha lõ nilaunia si faudu khõ dunangania, na tebai itaha wangisõ dõdõnia, ba omasi ia mangowalu khõ nono alawe andrõ, akha ifalua zi sõkhi molo'õ ya'ia. Lõ mosala ia na mangowalu ira.
37Ba hiza na no ihalõ gangetula niha ba dõdõnia wa lõ mangowalu ia khõ nihania, ba tenga nifaso gangetula da'õ, no si sõkhi nilaunia, na so wa'abõlõnia wamalua si manõ.
38Tobali, niha sangowalu no sõkhi nilaunia, ba niha si lõ mangowalu abõlõ sõkhi nasa nilaunia.
39Ira alawe si no mangowalu, tefabõbõ ia khõ wo'omonia gasagasa auri wo'omonia na. Na mate wo'omonia, tola mangowalu ia mangawuli ba niha somasi ia, asala fangowalu ba wa'aniha Keriso.
40Ba abõlõ moharazaki ia na lõ ilau mangowalu sa'ae. Era'era dõdõgu samõsa da'õ, ba umane tõdõgu Eheha Lowalangi gõi zamatõrõ ya'o ba wanguma'õ da'õ.
Download Audio MP3 (1 Korintus 7):
Mobile (Low Quality) - CD (High Quality)
<< 1 Korintus 7 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel