Alkitab Mobile SABDA
[VER] : [NIAS]     [PL]  [PB] 
 <<  2 Korintus 6 >> 

1Me no fao khõma Lowalangi ba wohalõw̃õ andrõ, ba ma'andrõ sibai ena'õ bõi mibe'e aekhu wa'ebua dõdõ Lowalangi andrõ.

2Ba Mbuku Ni'amoni'õ, Iw̃a'õ Lowalangi, "No Ufondrondrongo we'aomõ, me baw̃a si sõkhi, ba no Utolo'õ, me luo wangorifi." Mihaogõ wanõngõni! Iada'e mbaw̃a si sõkhi andrõ, iada'e luo wangorifi andrõ.

3Lõ omasiga lasalaikõ wohalõw̃õma! Bõrõ da'õ lõ moguna mafatunõ ba niha hadia mbõrõ wa mahalõ halõw̃õ andrõ.

4Ba ngawalõ nilauma i, ma'oroma'õ wa enoni Lowalangi ndra'aga. No oya ngawalõ wamakao si no mataõgõ si fao fanaha tõdõ:

5lafakao ndra'aga, lafakuru'õ, ba labõbõzi; ma'oigõ dõdõma ba halõw̃õma, asese lõ mõrõ ba asese gõi lõ manga.

6Ba ba wa'ohauhau, ba wa'aboto ba dõdõ, ba wa'ebolo dõdõ ba ba wa'asõkhi dõdõ, ma'oroma'õ wa enoni Lowalangi ndra'aga. Si fao fangodaligõ fanolo Geheha Lowalangi, ba fa'omasi si lõ famini tõdõ,

7fao fanuriaigõ turia soroi Lowalangi, ba si fao fa'abõlõ Lowalangi, ma'oroma'õ wa ya'aga andre enoni Lowalangi. Lõ mabulõ'õga ba gohitõ dõdõ Lowalangi si no tobali fakakema ba wolaw̃a ba ma ba wanolo ya'aga.

8Lafosumange ndra'aga, ba la'o'aya gõi; lasuno ba la'o'aya gõi. Hew̃a'ae adõlõ dõdõma, ba law̃a'õ sa'atõ niha si falimolimo ndra'aga.

9Law̃a'õ si lõ la'ila niha ndra'aga, ba noa sa la'ila ndra'aga niha fefu. Law̃a'õ no mate ndra'aga, ba sindruhunia auri nasa ndra'aga. Hew̃a'ae labõbõzi ndra'aga, ba lõ sa'atõ mate ndra'aga.

10Hew̃a'ae labusi dõdõma, ba lõ mamalõmalõ wa'omuso dõdõma. Hulõ zi numana ndra'aga, ba no ato niha mabali'õ kayo. Hulõ niha si lõ hadia ia ndra'aga, ba sindruhunia no a'oi so khõma.

11He ya'ami ira talifusõ ni'omasi'õ ba Gorindro! Maw̃a'õ fefu hadia ia khõmi. Fefu nõsi dõdõma ba no a'oi ma'ombakha'õ khõmi.

12Tõdõma mabokai sindruhundruhu khõmi, ha ya'ami zondruhõ tõdõmi khõma.

13Iada'e, akha fahuhuo ndra'o khõmi hulõ na ba ndraonogu samõsa. Andrõ mibokai dõdõmi khõma.

14Bõi omasi ami fao awõ niha si lõ mamati khõ Yesu; lõ faudu zi manõ. He wa tola niha samalua somasi Lowalangi orudu ba niha solaw̃a khõ Lowalangi! Lõ tola orudu haga ba zogõmigõmi.

15Lõ tola fao Keriso khõ Gafõkha. Hadia zi fagõlõnia Niha Keriso ba si tenga Niha Keriso?

16Hadia faoma ira Nomo Zo'aya ba omo nadu? Ya'ita andre ba no Omo Zo'aya sauri. Lowalangi samõsa zanguma'õ, "Ba khõra torõi Ndra'o ba fao Ndra'o awõra ba wa'auri. Lowalangira Ndra'o, ba banua-Gu ira.

17Bõrõ da'õ, miheta ami ba niha si lõ aboto ba dõdõ Lowalangi andrõ, ba mifabali ami khõra. Bõi mibabaya zira'ira'iõ, ba Utema ami dania.

18Amami Ndra'o, ba ono-Gu ami, Iw̃a'õ So'aya andrõ si lõ ambõ fa'abõlõ."



Download Audio MP3 (2 Korintus 6):
Mobile (Low Quality) - CD (High Quality)

 <<  2 Korintus 6 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran