Alkitab Mobile SABDA
[VER] : [NIAS]     [PL]  [PB] 
 <<  2 Korintus 7 >> 

1He ya'ami ira talifusõ ni'omasi'õ! Khõda ibe'e mbu'u li da'õ. Andrõ bõrõ da'õ da tahaogõ ita moroi ba ngawalõ zana'unõi boto awõ nosoda. Da ta'ata'ufi Lowalangi, ena'õ mo'ahonoa ita ba wa'auri khõ-Nia.

2Mitema'õ nasa ndra'aga bakha ba dõdõmi. Lõ salama ba niha, ba lõ gõi irai ma'alani niha. Lõ manõ omasi ndra'aga mangai hare ba niha.

3Uw̃a'õ zi mane, tenga ba wanguhuku ya'ami. Bõrõ si mane si no uw̃a'õ fõna, ma'omasi'õ sibai ami, ba no awõ fao ba wa'auri ba ba wa'amate ita.

4Faduhu sibai dõdõgu khõmi. Ma na'i usuno ndra'o ba khõmi andrõ! Hew̃a'ae oya zagafõkhõ si falukha ya'aga, ba terara sa'atõ dõdõgu bõrõ ami. Oi so wa'omuso dõdõgu.

5Me no marugi Makedonia, lõ mo'aetufa wa'erege dõdõma. Gofu heza ba fa'abasaki zi falukha ya'aga: fasosota moroi ba niha bõ'õ, ba fa'ata'u si otarai dõdõma samõsa.

6Ba ta'andrõ saohagõlõ! Lowalangi zondrara tõdõ niha saetu fanõtõna; i'omusoi'õ dõdõma fa'atohare Dito.

7Terara dõdõma, tenga si'ai bõrõ me no so Dito, no gõi bõrõ me i'ombakha'õ khõma hewisa wa'aterara dõdõnia bõrõ ami. I'ombakha'õ khõma, wa no humulu sibai dõdõmi falukha khõgu; i'ombakha'õ wa maniasa sibai ami ba gamuatami fõna, ba iada'e moroi ba wa'ohauhau dõdõ omasi ami mitolodo. Da'õ fefu no tobali fondrou'õ wa'omuso dõdõgu.

8Ba hew̃a'ae no ubusi dõdõmi ba zuragu, ba lõ maniasa ndra'o wanura sura andrõ. Sindruhunia, me inõtõ u'ila wa suragu andrõ tobali fombusi dõdõmi -- hew̃a'ae lõ arara wa'abu dõdõmi andrõ -- ba maniasa zui sa'atõ ndra'o.

9Ba omuso dõdõgu iada'e -- tenga bõrõ wa no abu dõdõmi, no bõrõ wa fa'abu dõdõmi andrõ no tobali famalalini gera'erami. Omasi gõi Lowalangi na mirasoi wa'abu dõdõ si manõ. Bõrõ da'õ, lõ ma'alani ami.

10Bõrõ me fa'abu dõdõ na dali Lowalangi ba i'a'sogõ wamalalini era'era ba wangorifi. Ba lõ maniasa dõdõ niha ba da'õ. Ba zi tambai da'õ, fa'abu dõdõ dali gulidanõ andre ba fa'amate.

11Mitandraigõ mifaigi hadia mbuania khõmi wa'abu dõdõ soroi Lowalangi! Buania ya'ia wa sindruhundruhu mi'oigõ dõdõmi ba wangohauhau'õ si no olotu! Anuzu sa'ae dõdõmi wamalua horõ, ata'u ami, humulu sibai dõdõmi, so wehi'a dõdõ, mitehegõ nihuku zi fasala! Bakha ba gamatunõw̃a da'e fefu, no mi'oroma'õ wa lõ si fasala ami.

12Bõrõ da'õ, hew̃a'ae no usura zura andrõ, ba sura da'õ musura ia tenga bõrõ wa so niha si no fasala. Tenga gõi bõrõ wa so niha si no manaõgõ fa'afõkhõ, bõrõ zala! Usura zura andrõ ena'õ tanõ fõna Lowalangi, oroma khõmi samõsa ha wa'ebua dõdõmi khõma.

13Da'õ mbõrõ wa terara dõdõma. Ba tenga ha terara manõ dõdõma, no abõlõbõlõ nasa omuso dõdõma, ba wamaigi fa'omuso dõdõ Dito; me ya'ami fefu no mirara dõdõnia.

14Sindruhunia no usunosuno ndra'o khõnia ba khõmi andrõ. Ba ta'andrõ saohagõlõ, lõ ni'ailasimi ya'o. Fefu zi no irai maw̃a'õ khõmi ba no duhu. Si manõ gõi hadia zi no masunosunoga ba khõmi andrõ khõ Dito, no si duhu.

15Iada'e ba itugu i'omasi'õ ami, bõrõ me i'angeragõ tõdõnia hewisa wolo'õmi fondrõnia'õnia ba hewisa wanemami ya'ia si fao famosumange ba folo'õ.

16Omuso si'ai dõdõgu, me no abe'e dõdõgu ami fefu, gofu heza.



Download Audio MP3 (2 Korintus 7):
Mobile (Low Quality) - CD (High Quality)

 <<  2 Korintus 7 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel