1Ya'ami ira talifusõ banua Niha Keriso ba Desalonika, si no tobali banua Lowalangi Ama ba So'aya ya'ita Yesu Keriso! Ya'aga si datõlu ya'ia da'õ Faulo, Sila ba Timoteo,
2matõtõna wa Lowalangi Amada ba So'aya ya'ita Yesu Keriso zangomasi'õ ya'ami ba same'e khõmi fa'ohahau dõdõ.
3Ya'ami ira talifusõ, lõ mamalõmalõ ma'andrõ saohagõlõ khõ Lowalangi, bõrõ ami. Ba no gõi sinangea malau zi manõ, bõrõ me tedou wamatimi khõ Keriso, ba tedoudou gõi wa'omasimi nawõmi.
4Da'õ mbõrõ wa masuno ami ba gotalua mbanua Lowalangi fefu. Fao fa'omuso dõdõ madunõdunõ misa, hewisa wa'anau gõlõmi ba fa'aro dõdõmi ba wamati khõ Keriso ba gotalua wolohi ba famakao andrõ si no falukha ya'ami.
5Ba da'e oroma ha wa'atulõ wanguhuku Lowalangi: No mitaha wamakao bõrõ wamatõrõ Lowalangi andrõ, da'õ wa tola dania mirasoi ngawalõ zi sõkhi ba wamatõrõ Lowalangi andrõ.
6Lowalangi dania zamalua hadia zatulõ. Ya'ia dania zanulõni famakao ba niha samakao ya'ami.
7Ba ba khõmi ira talifusõ nifakao iada'e -- si manõ gõi Ibe'e khõma dania -- Lowalangi wangokafu dõdõ -- ba ginõtõ mõi tou Yesu So'aya moroi ba zorugo, ba wangoroma'õ-Nia Ya'ia awõ mala'ika-Nia andrõ sagabõlõ,
8si fao holahola galitõ. Mõi Ia mitou ba wanguhuku fefu niha si lõ aboto ba dõdõ Lowalangi, ba si lõ molo'õ ba Duria Somuso Dõdõ andrõ sanandrõsa khõ Yesu, So'aya ya'ita.
9Latema'õ hukuma fa'atekiko irugi gamozua niha solau da'õ, nitibo'õ moroi ba nahia ba moroi ba kuaso Lowalangi sebua andrõ,
10fefu da'õ oi alua dania ba ginõtõ wangawuli-Nia mifolakhõmi mbanua-Nia, ba nifosumange Ia dozi niha samati fefu. So gõi ami dania ba gotalua mbanua Lowalangi andrõ, bõrõ me no faduhu dõdõmi ba duria si no ma'ombakha'õ khõmi.
11Andrõ gõi lõ mafamalõ wangandrõ salahimi. Mangandrõ ndra'aga khõ Lowalangi, ena'õ sinangea auri ami ba zomasi Lowalangi; ba da'õ no Ikaoni ami. Ya Lowalangi, si fao fa'abõlõ-Nia andrõ, zamaulogõ fa'edõnami ba wamalua ngawalõ zi sõkhi, ba samo'ahonoa halõw̃õ si no mifalua bõrõ me mamati ami khõ Keriso.
12Bõrõ zi manõ tefolakhõmi Zo'aya ya'ita Yesu bõrõ ami, ba Ifolakhõmi gõi ami Yesu, bõrõ wa'asõkhi dõdõ Lowalangida ba So'aya ya'ita Yesu Keriso.
Download Audio MP3 (2 Tesalonika 1):
Mobile (Low Quality) - CD (High Quality)
<< 2 Tesalonika 1 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel