1Timoteo, onogu ni'omasi'õ! Ya'o Faulo, zanura sura andre khõu fao fanõtõna, ya Lowalangi Ama ba So'aya ya'ita Yesu Keriso zangahakhõsi tõdõ ba same'e khõu fa'ebua dõdõ ba fa'ohahau dõdõ. No nilau dõdõ Lowalangi, tefataro ndra'o tobali sinenge Keriso Yesu ba wangombakha fa'auri nifabu'u Lowalangi. Tatema wa'auri andrõ bõrõ me ha sambua ita Keriso Yesu.
2(1:1)
3Ululu wa'aurigu khõ Lowalangi si fao tõdõ si lõ sinegu si mane si no lafalua ira tuagu fõna. Ba lõ aetu u'andrõ saohagõlõ khõ Lowalangi ero na itõrõ tõdõgu ndra'ugõ ba ginõtõ wangandrõgu, he na ma'õkhõ ba he na ba zi bongi.
4Itõrõ tõdõgu wa'abu dõdõmõ andrõ. Da'õ mbõrõ wa omasi sibai ndra'o falukha khõu, ena'õ tola sindruhundruhu omuso dõdõgu.
5Itõrõ tõdõgu wamatimõ sindruhundruhu khõ Keriso, hulõ wamati gaweu Lo'ise ba inau Oinike. Ba manõtõna dõdõgu wa mamati gõi ndra'ugõ si mane da'õ.
6Bõrõ da'õ, ufasugi ba dõdõu wehi'a dõdõ ba wamalua halõw̃õ si no õtema moroi khõ Lowalangi me luo utufa tangagu hõgõu.
7Eheha, nibe'e Lowalangi khõda, tenga Eheha sombali'õ ya'ita ata'u. Ba hiza i, Eheha Lowalangi andrõ zombali'õ ya'ita abõlõ, safõnu fa'omasi ba si tola manaha tõdõ.
8Bõrõ da'õ bõi aila ndra'ugõ wame'e famaduhu'õ sanandrõsa khõ Zo'aya ya'ita, ba bõi gõi aila ba zanandrõsa khõgu, nikuru bõrõ Ia. Ba zi tambai da'õ ena'õ ba wa'abõlõ soroi Lowalangi, fao ndra'ugõ ba wanaha famakao ba Duria Somuso Dõdõ andrõ.
9Lowalangi zangorifi ya'ita ba sogaoni ya'ita, me omasi Ia Ibali'õ ita banua sauri ni'oniagõ khõ-Nia. Ifalua da'õ tenga dali hadia zi no ta'ohalõw̃õgõi. No dali nikhoi dõdõ-Nia samõsa ba fa'asõkhi dõdõ-Nia. Fõna wamõbõrõ ulidanõ, no si sõkhi tõdõ Ia khõda ba khõ Yesu Keriso.
10Iada'e Ifa'ele'õ wa'asõkhi dõdõ-Nia andrõ khõda ba we'aso Razo Sangorifi ya'ita Yesu Keriso. Yesu zangalani fa'abõlõ wa'amate ba same'e fa'auri si lõ aetu ba gulidanõ, ba Duria Somuso Dõdõ andrõ.
11Ba wangombakha Turia Somuso Dõdõ andrõ Ifataro ndra'o Lowalangi tobali sinenge ba samahaõ.
12Da'õ mbõrõ wa utaõgõ fefu da'e ba lõ urasoi wa'aila, bõrõ me sindruhundruhu u'ila ha'õkhõ mamati ndra'o. Ba faduhu dõdõgu wa hadia zi no ifaduhusi tõdõ khõgu, tola gõi irorogõ irugi ba Luo Safuria.
13O'õ sindruhundruhu wamahaõ andrõ si no ufahaõ ya'ugõ. Ba ya ahono ndra'ugõ ba wamati ba fangomasi'õ, bõrõ me ya'ugõ no ha sambua ba khõ Yesu Keriso.
14Si fao fanolo soroi Geheha Lowalangi, sauri bakha ba dõdõda, ya õhaogõ wondrorogõ ngawalõ zi sõkhi si no mufaduhusi tõdõ khõu.
15No õ'ila wa fefu niha ba danõ Asia no la'erogõ ndra'o, farahu gõi ndra Figelo ba Hemogene.
16Ba soroiyomo Gonesiforo no auli la'omusoi'õ dõdõgu. Ya muhakhõsi tõdõ ira So'aya. Hew̃a'ae ya'o bakha ba gurunga so, ba lõ aila Gonesiforo ba khõgu andre.
17Me irugi Roma, i'odõdõgõ sibai wangalui ya'o irege falukha ndra'aga.
18Ba Nefeso no oya itolo ndra'o. Sanandrõsa ba da'õ no õ'ila. Ya So'aya si sõkhi tõdõ zangahakhõsi tõdõ ya'ia ba ginõtõ Ihuku ma'afefu soi niha dania.
Download Audio MP3 (2 Timotius 1):
Mobile (Low Quality) - CD (High Quality)
<< 2 Timotius 1 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel