Alkitab Mobile SABDA
[VER] : [NIAS]     [PL]  [PB] 
 <<  Efesus 4 >> 

1Andrõ bõrõ da'õ -- ya'o nikuru andre, nikuru bõrõ halõw̃õ Zo'aya -- u'andrõ sibai khõmi: mitõrõ zinangea lala molo'õ fetaromi, si mane niha si no Ikaoni Lowalangi.

2Ya'a'oi so khõmi wa lõ fayaw̃a, awõ wa'asõkhi dõdõ ba fa'ebolo dõdõ. Miforoma'õ wa'omasimi ba wanolo awõmi.

3Mi'oigõ dõdõmi, ena'õ lõ mamalõ ami ba wa'atulõ, ba ena'õ terorogõ wa ha sara dõdõmi si no Ifatumbu'õ Eheha Lowalangi.

4Ha sambua mboto, ba ha sambua Geheha. Ba zi ha sambua fanõtõna gõi tekaoni ami.

5Ha samõsa Zo'aya, ba ha sambua wamati, ha sambua wamayagõ idanõ,

6ba ha sambua Lowalangi si tobali Ama ba niha fefu. Ya'ia Zo'aya gulidanõ, sohalõw̃õ ba ngawalõ hadia ia fefu, ba samatõrõ fefu hadia ia.

7Ba dozi ita, no mube'e wa'ebua dõdõ dali ndrohundrohu mbuala Keriso andrõ.

8Bakha ba Mbuku Ni'amoni'õ no musura, "Me numalõ Ia miyaw̃a ba nahia salaw̃a, ato I'ohe nikuru; ba no Ibe'e mbuala ba niha."

9Na law̃a'õ numalõ "Ia miyaw̃a" eluahania ba mbõrõta no numalõ Ia mitou irugi nahia wondrege tanõ si tou gulidanõ andre.

10Ba Ya'ia si no numalõ mitou andrõ, Ya'ia gõi zi numalõ miyaw̃a irugi nahia wondrege zalaw̃a moroi ba mbanua si yaw̃a, irege mo'õsi gõlia ma'afefu ba we'aso-Nia.

11Ba Ya'ia "zame'e buala ba niha"; so nibali'õ-Nia sinenge õsa, sama'ele'õ õsa; sangombakha Turia Somuso Dõdõ õsa, samahaõ õsa, ba sondrorogõ banua Niha Keriso.

12Ifalua da'e fefu ba wama'anõ banua Lowalangi fefu, ena'õ tobali sohalõw̃õ khõ Lowalangi, ba ba wangotomosi boto Keriso andrõ.

13Ba zi manõ, ha sambua ita fefu bõrõ wamati si fagõlõ andrõ, ba fa'aboto ba dõdõda Nono Lowalangi. Ba tobali ita niha so'ahonoa fa'ebua, i'tugu ara ba itugu mo'ahonoa si mane Keriso.

14Ba tenga sa'ae iraono ita nifaheuheu ba nifangõrõngõrõ nangi wamahaõ andrõ soya ngawalõ moroi ba niha sobou tõdõ. Lafaelungu niha ba walimosara.

15Lõ'õ! Lõ tola lõ ta'oroma'õ zindruhu si fao fa'omasi, ena'õ ba ngawalõ hadia ia fefu itugu mo'ahonoa ita si mane Keriso, si no hõgõ khõda.

16Barõ wamatõrõ-Nia, tefa'anõ sõkhi fefu ndrotondroto mboto andrõ, ba dozi oi tefakhaikhai zamõsana. Ba na dozi ndrotondroto oi mohalõw̃õ dali zinangeania, ba fefu ndrotondroto mboto andrõ manõi tobali mo'ahonoa, ba abõlõ ba wa'omasi.

17Bõrõ da'õ ba dõi Zo'aya, da'e niw̃a'õgu ba nihõndrõgõgu fanguma'õ: bõi sa'ae si mane amuata niha si lõ aboto ba dõdõ Lowalangi gamuatami, so'angeragõ fayafaya.

18Fangerangerara no ogõmigõmi. Lõ saboto ba dõdõra wa'auri andrõ si no Ibe'e Lowalangi, bõrõ me ma'ifu lõ fa'atuatuara ba wangila hadia ia khõ Lowalangi. No si manõ ira bõrõ wa'abe'e hõgõra.

19No lõ fa'ailara sa'ae, irege saila ita gamuatara, ba somasi dõdõra wamalua horõ.

20Ba niha si no aboto ba dõdõ Keriso, tenga si manõ!

21No mirongo zanandrõsa khõ-Nia! Ba si mane ira nifahaõ-Nia, no mufahaõ gõi ami sanandrõsa ba mbuabua Lowalangi si so khõ Yesu!

22Bõrõ da'õ miheta niha si tohõna andrõ khõmi, sanõrõ lala fõna, nifakiko wangisõ andrõ samaelungu.

23Ya tebohouni dõdõmi ba era'erami ma'afefu.

24Ena'õ amuata niha si bohou gamuatami, niwõwõi molo'õ khilikhili Lowalangi; ya'ia wa'atulõ dõdõ, fa lõ sinegu, ba fa'aduhu.

25Andrõ bõrõ da'õ, ya'ami fefu, faoma sindruhu miw̃a'õ khõ nawõmi. Bõi sa'ae milau waya khõ nawõmi, bõrõ me no faoma ndrotondroto mboto Keriso ita.

26Na mofõnu ami, bõi tobali umbu wa mifazõkhi horõ. Bõi mi'oma'õkhõi'õ wofõnu,

27ena'õ lõ monaha Gafõkha.

28Niha sasese managõnagõ, lõ tola lõ ibato wanagõnagõ sa'ae. Abõlõ sõkhi na mohalõw̃õ ia si fao fa'atulõ, ena'õ isõndra gõnia, ba ena'õ tola ibe'e wanolo ba zi numana.

29Ba na fahuohuo ami, ba bõi mi'oguna'õ wehede sogoro ita. Mifake wehede si sõkhi, soguna ba wanga'azõkhi ba ba wanolo niha bõ'õ. Fehede si manõ da'õ i'a'asogõ zi sõkhi ba dõdõ niha samondrongo.

30Bõi mibusi dõdõ Geheha Lowalangi. No mufotandra ami Eheha, tandra wa tana khõ Lowalangi ami. Eheha da'õ gõi we'ewe'e dõdõ khõmi wa i'ondrasi dania ami Luo Wangefa andrõ.

31Miheta ba dõdõmi wa'afõkhõ dõdõ, fa'abao dõdõ ba fõnu. Bõi sa'ae fasosososo ami ba falelelele. Bõi so sa'ae wa'afatuwu khõmi nawõmi, awõ danõ bõ'õnia.

32Ba zi tambai da'õ, ya faoma sõkhi dõdõmi ba mihaogõhaogõ li khõ nawõmi, ba faoma mi'efa'õ zala nawõmi, si mane fangefa'õ Lowalangi olalõw̃a khõmi ba khõ Keriso.



Download Audio MP3 (Efesus 4):
Mobile (Low Quality) - CD (High Quality)

 <<  Efesus 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel