1No sabõlõ ami, me no ha sambua ami Keriso. Terara dõdõmi ba ngawalõ hadia ia, bõrõ me I'omasi'õ ami Keriso! No nifatõrõ Geheha Lowalangi ami, ba no gõi faoma mi'omasi'õ ba mihakhõsi tõdõ nawõmi.
2Na si manõ, ba mi'osindruhugõ wangomusoi'õ tõdõgu gõi ba ngawalõ da'e: Ya ha sara dõdõmi, si fao fa'omasi ba fangerangera ba ohitõ dõdõ si ha sambua.
3Bõi milau hadia ia bõrõ wangalui tana khõnia zamõsana, ma ba wanuno ya'ia. Ena'õ moroi ba wangidengide'õ ya'ebua dõdõ zamõsana khõ nawõnia moroi khõnia.
4Bõi ha soguna khõnia i'angeragõ zamõsana, soguna khõ nawõnia ya mu'angeragõ.
5Ya simane tõdõ Yesu Keriso, ya simanõ gõi dõdõmi:
6Sindruhunia no si fagõlõ Ia khõ Lowalangi, ba hiza, lõ Irasoi wa fa'alowalangi-Nia andrõ sinangea murorogõ.
7Hiza i, Iheta khõ-Nia da'õ fefu, ba tobali fagõlõ Ia si mane sawuyu, tobali si mane niha Ia, auri si mane niha gõi.
8I'ide'ide'õ Ia, ba molo'õ Ia khõ Lowalangi irugi wa'amate -- fa'amate ba rõfa.
9Da'õ mbõrõ wa no Ibali'õ salaw̃a sebua Ia Lowalangi, awõ wa no I'amualagõ khõ-Nia kuaso andrõ sebua moroi ba kuaso bõ'õ fefu.
10Ba ba wamosumange Yesu, fefu zi so ba zorugo, ba he si so ba gulidanõ awõ zi so barõ danõ, latuhi danõ ba wangalulu khõ-Nia.
11Ba fefu da'õ oi law̃a'õ bewera wa no So'aya Yesu Keriso; ba zi manõ no tefolakhõmi Lowalangi.
12Bõrõ da'õ, ya'ami ira talifusõ ni'omasi'õ, si mane folo'õmi ligu me luo so ndra'o khõmi, ena'õ si manõ gõi abõlõ mi'o'õ ligu iada'e me no fandrõndrõu nahiada. Bõi farõi ami wolo'õ khõgu. No I'orifi ami Lowalangi, andrõ mi'osindruhugõ ena'õ mo'ahonoa wa'ohahau dõdõmi. Ba milau da'õ si fao famosumange ba folo'õ khõ Lowalangi,
13bõrõ me Lowalangi samõsa zanga'asogõ ba dõdõmi he fa'edõna ba he famalua somasi dõdõ Lowalangi.
14Ba mi'ohalõw̃õgõigõ fefu hadia ia, ba bõi mikõkõkõkõ ba ma fasoso.
15Ba zi manõ no mi'oroma'õ wa ono Lowalangi ami si lõ sinegu, sohauhau ba satulõ ba gotalua niha sabila tõdõ andre si lõ sõkhi ba si so horõ. Ba ba ginõtõ mifa'ema khõra duria wangorifi andrõ, ya tobali ami haga khõra, sohagaini ulidanõ. Na auri ami si mane da'õ, ba so dania danedanegu ba wangomusoi'õ tõdõgu ba khõmi, na luo mangawuli Keriso. Da'õ dandrania, wa tenga zayazaya gõlõ wa'erege dõdõgu ba halõw̃õgu andrõ, so mbuania.
16(2:15)
17Hew̃a'ae labunu ndra'o, ba labe'e ndrogu tobali fasumangeta nifaduwa yaw̃a ba dete zumange nibe'emi khõ Lowalangi, tandra wa faduhu dõdõmi khõ-Nia. Na duhu lõ tola lõ zi manõ, ba u'andrõ saohagõlõ ba da'õ ba omuso dõdõgu awõmi.
18Ba ya simanõ gõi ami, mi'andrõ saohagõlõ ba mi'omusoi'õ dõdõmi awõgu.
19Ba faduhu dõdõgu, wa bõrõ wanolo Zo'aya Yesu, ba wa'alio ufatenge khõmi Dimoteo andrõ, ena'õ terara dõdõgu na urongo duriami.
20Ha Timoteo niha si so ba da'e si fagõlõgõlõ tõdõ khõgu, ba sindruhundruhu mangonorogõ tõdõ ya'ami.
21Fefu niha bõ'õ, ba ha soguna khõra samõsa la'onorogõ tõdõ, ba lõ la'onorogõ tõdõ zoguna khõ Keriso.
22Ya'ami samõsa zi no mangila tandra, wa moguna Timoteo andrõ. No i'odõdõgõ sibai wohalõw̃õ awõgu ba wanuriaigõ Turia Somuso Dõdõ andrõ soroi Lowalangi. Ya'aga si darua andrõ hulõ manõ nono ba ama.
23Andrõ bõrõ da'õ, me no aboto ba dõdõgu hewisa lualua farakarogu andre, i'anema'õ ufatenge ia dania khõmi.
24Faduhu dõdõgu, wa bõrõ wanolo Zo'aya, ba wa'alio gõi so ndra'o ba wangondrasi ya'ami.
25Ba sanandrõsa khõ dalifusõda Efaforodito, si no mifatenge ba wanolo ya'o, uw̃a'õ tõdõgu moguna ufatenge ia mangawuli khõmi. Talifusõda andrõ no awõgu ba halõw̃õ ba awõgu ba wasõndrata.
26No humulu sibai dõdõnia khõmi fefu, ba abu dõdõnia me no mirongo duria wa mofõkhõ ia.
27Ba duhu sa, wa no mofõkhõ ia, arakhagõ mate. Ba no Ihakhõsi tõdõ ia Lowalangi; ba tenga ha ya'ia, no ya'odo gõi õsa, ena'õ bõi itugu abõlõ wa'abu dõdõgu.
28Da'õ mbõrõ wa abõlõ sibai omasido gõi wamatenge ya'ia mangawuli khõmi, ena'õ ifuli omuso dõdõmi, na mi'ila ia, ba ahono gõi dõdõgu.
29Andrõ mitema'õ ia si fao fa'omasi dõdõ, me no talifusõ ba wamati. Mifosumange fefu niha si mane ya'ia.
30Ba wangai halõw̃õ Keriso, no irai arakhagõ mate ia; ibe'e nosonia salahimi ba wanolo ya'o.
Download Audio MP3 (Filipi 2):
Mobile (Low Quality) - CD (High Quality)
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel