Alkitab Mobile SABDA
[VER] : [NIAS]     [PL]  [PB] 
 <<  Ibrani 5 >> 

1Ere sebua andrõ no nituyu moroi ba gotalua niha, ba nifataro ba wohalõw̃õ si tobali sanalahini niha fõna Lowalangi. Halõw̃õnia ya'ia ba wame'e sumange khõ Lowalangi fefu game'ela ba sumange fangefa horõ.

2Ere sebua andrõ no ambõ fa'abõlõ ba zoya ngawalõ hadia ia, andrõ tola ihaogõ ba niha si lõ mangila wetahõgõ ba si no elungu lala.

3Ba me ya'ia samõsa ambõ fa'abõlõ, andrõ wa lõ tola lõ ibe'e zumange, tenga si'ai bõrõ horõ mbanua Niha Keriso, no gõi bõrõ horõnia samõsa.

4Samõsa lõ hadõi gõi samatarõ ya'ia tobali ere sebua. Awena tobali ere sebua niha, na Lowalangi zogaoni ya'ia ba da'õ -- hulõ si mane A'aroni.

5Si manõ gõi Keriso. Lõ Ifataro Ia samõsa tobali Ere Salaw̃a Sebua, Lowalangi samõsa zamataro Ya'ia. Lowalangi zanguma'õ khõ-Nia, "Onogu Ndra'ugõ; ma'õkhõ andre Ya'odo tobali Ama-U."

6Ba naha bõ'õ Iw̃a'õ gõi Lowalangi, "Ya'ugõ tobali ere dania irugi zi lõ aetu, molo'õ ngasi gere Melekhisede andrõ."

7Ba ginõtõ so Yesu ba gulidanõ andre, mu'ao Ia si fao fe'e, me inõtõ mangandrõ Ia, awõ wa Ifa'ema fefu gangandrõw̃a-Nia khõ Lowalangi, si tola mangorifi Ya'ia ba wa'amate. Ba me lõ molaw̃a Ia khõ Lowalangi fao wa Ifosumange, ba no Ifondrondrongo Lowalangi gangandrõw̃a-Nia.

8Yesu ba no Ono Lowalangi, ba hew̃a'ae si manõ, Ifahaõ Ia ba wolo'õ moroi ba ngawalõ wamakao si no Itaõgõ.

9Ba me no aefa mufo'ahonoa Ia ba no tobali Ia umbu wangorifi si lõ aetu ba niha solo'õ khõ-Nia fefu,

10ba Lowalangi gõi zama'ele'õ Ya'ia tobali Ere Sebua, si mane Ere Melekhisede!

11Sanandrõsa ba wetaro Yesu tobali Ere Sebua andrõ, oya zoguna ni'ombakha'õma khõmi, ba afõkhõ wamotokhi ya'ia bõrõ me ya'ami ahou sibai wa'aboto ba dõdõ.

12Sindruhunia no inõtõ khõmi tobali samahaõ, ba soromania ya'ami nasa moguna faguru ba niha bõ'õ sanandrõsa ba danedane wamahaõ khõ Lowalangi. Ya'ami nasa tebai manema õ sabe'e; ya'ami nasa ha samadu susu manõ.

13Niha samadu susu nasa, eluahania iraono sawuyu nasa, lõ nasa i'okhõgõ wa'atuatua ba ngawalõ hadia zatulõ ba hadia zi sala.

14Õ sabe'e andrõ ya'ia ba niha si no mo'ahonoa, bõrõ wa'atuatua, no tola mamaehusi hezo zi sõkhi ba hezo zi lõ sõkhi.



Download Audio MP3 (Ibrani 5):
Mobile (Low Quality) - CD (High Quality)

 <<  Ibrani 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel