1Bõrõ da'õ, da tabõhõi wama'ema famahaõ Niha Keriso si ha danedane manõ, ba sõkhi na tadou'õ ita ba wamahaõ sabõlõ abakha sanandrõsa ba wo'ahonoa wa'auri Niha Keriso. Bõi tafuli zui ita ba wamahaõ si ha danedane manõ, wa niha lõ tola lõ labõhõli wamalua ngawalõ zi lõ hadõi gunania, ba lõ tola lõ faduhu dõdõ khõ Lowalangi,
2ba ma famahaõ danedane sanandrõsa ba wamayagõ idanõ ba ma sanandrõsa ba wanufa tanga niha; ba ma sanandrõsa ba wa'auri mangawuli na no aefa mate ba fanguhuku si lõ aetu.
3Na si nehe Lowalangi, ba da tadou'õ ita ba wamahaõ sabõlõ moguna!
4Bõrõ, me dozi niha si no mondrõi lala wamati, tebai sa'ae mu'ohe mangawuli. Me ya'ira fõna no so bakha ba haga soroi Lowalangi, ba si no manema'õ fa'asõkhi howuhowu-Nia. No gõi fao ira nifatõrõ Geheha Lowalangi.
5No aboto ba dõdõra moroi ba zi no falukhalukha ira, wa taroma li Lowalangi andrõ sõkhi, ba no larasoi howuhowu si fahõna fa'abõlõ ba ginõtõ andrõ si so dania.
6Ba hiza, aefa da'õ ba larõi lala wamati! He wa tola mudõnia'õ ira mangawuli ba wamalalini era'era zui moroi ba horõra. Bõrõ me ya'ira no laforõfa zui Nono Lowalangi andrõ ba la'o'aya Ia fõna niha sato.
7Tanõ sanisiõ idanõ deu si lõ mamalõ aekhu yaw̃ania, ba ifatumbu'õ zinanõ soguna ba niha sangehaogõ ya'ia, ba Ifahowu'õ Lowalangi danõ andrõ.
8Ba na si tumbu ba danõ andrõ sinanõ sodoi ba o'o, ba lõ hadõi gunania, ba ni'elifi Lowalangi dania, ba amozuania sahori nitunu.
9Ba ya'ami ira talifusõ ni'omasi'õ, hew̃a'ae no maw̃a'õ zi manõ ba zanandrõsa ba khõmi, ba faduhu dõdõma wa no mi'okhõgõ ngawalõ zabõlõ sõkhi si fakhai ba wangorifi ya'ami.
10Lowalangi ba tenga Lowalangi si lõ atulõ. Lõ olifu Ia hadia zi no mi'ohalõw̃õgõi khõ-Nia. Lõ mamalõ Itõrõ tõdõ-Nia wa'omasi si no mifa'ele'õ khõ-Nia ba wanolo si no mibe'e ba dalifusõ bõ'õ andrõ si faoma ndrotondroto Niha Keriso. Irugi iada'e gõi lõ saetu mibe'ebe'e wanolo andrõ.
11Omasi sibai ndra'aga ena'õ zamõsana ami lõ mo'aetufa muhi'a dõdõ irugi tola mitema zi no midõnadõna andrõ.
12Lõ omasi ndra'aga na tobali areu ami. Somasi ndra'aga ya'ia ena'õ auri ami si mane niha sanema hadia nifabu'u Lowalangi, bõrõ wa'afaduhu dõdõmi khõ-Nia ba fa'ebolo dõdõ wombaloi.
13Me luo fawu'u li Lowalangi khõ Gaberahamo, fahõlu Ia wa Ifalua dania hadia zi no Ifabu'u li-Nia. Ba bõrõ me lõ hadõi niha sabõlõ ebua moroi khõ Lowalangi, wa fahõlu Lowalangi ba dõi-Nia samõsa.
14Iw̃a'õ Lowalangi, "Fawu'u li Ndra'o wa Ufahowu'õ dania ndra'ugõ ba Ubali'õ ato nga'õtõu."
15Ba bõrõ me ibaloi Aberahamo si fao fa'ebolo dõdõ, ba itema hadia zi no Ifabu'u li Lowalangi khõnia.
16Na fahõlu niha, ba fahõlu ia ba dõi niha bõ'õ sabõlõ ebua moroi khõnia, ba bõrõ hõlu andrõ wa ya'ia tebai muda'aw̃aisi sa'ae.
17Omasi Lowalangi ena'õ niha sanema dania hadia zi no Ifabu'u li-Nia andrõ, sindruhundruhu faduhu dõdõ, wa lõ Iwu'ai dania nikhoi dõdõ-Nia andrõ. Da'õ mbõrõ wa Inõnõ hõlu ba wawu'usa li-Nia andrõ.
18Si dombua ngawalõ andrõ lõ tola tewu'a: Lõ falimo Lowalangi ba wawu'usa li ba fahõlusa-Nia. Bõrõ da'õ, ya'ita si no nilumõ'õ Lowalangi, so we'ewe'e dõdõ saro ba wa lõ mamalõ manõtõna hadia zi no Ihõnagõ khõda ba ginõtõ si so fõna.
19Fanõtõnada andrõ zi tobali lohelohe sabe'e ba saro ba wa'aurida, bõrõ me abakha sibai tetanõ. Bõrõnia so ba Naha Fondrege Ni'amoni'õ ba Nomo Zo'aya, ya'ia zorugo.
20Yesu zi no mamatõrõ lala ba nahia da'õ khõda, ba no mõi Ia bakha ba da'õ tobali Ere Sebua khõda sagõtõ fa'ara, si mane Ere Melekhisede.
Download Audio MP3 (Ibrani 6):
Mobile (Low Quality) - CD (High Quality)
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel