1So õsa niha Yudea si mõi ba Gandriokhia ba lafahaõ zamati ba Gandriokhia andrõ wanguma'õ wa na lõ laboto ira molo'õ oroisa Lowalangi nifahaõ Moze, ba tebai te'orifi ira.
2Lalaw̃a sibai wangerangera niha andrõ ira Faulo ba Baranaba. Ba gafuriata lahonogõi ndra Faulo ba Baranaba awõ danõ bõ'õ moroi ba Gandriokhia we'amõi ba Yeruzalema ba wamatunõ da'õ khõ ndra sinenge, ba sondrõnia'õ ba da'õ.
3Lafasao ira banua Niha Keriso ba Gandriokhia irugi baero mbanua. Mofanõ ndra Faulo ba Baranaba latõrõ danõ Wenisia ba Samaria. Laturiaigõ ba da'õ hewisa niha si tenga niha Yahudi wanou'õ ya'ira ba danga Lowalangi. Omuso dõdõ zamati ba da'õ wamondrondrongo Turia andrõ.
4Ba me no larugi Yeruzalema, ba latema'õ ira faoma fa'omuso dõdõ banua Niha Keriso, ba ira sinenge awõ ndra satua. Latutunõ ba niha sato zanandrõsa ba nifalua Lowalangi fefu khõra.
5Ba so õsa zamati ba gotalua ndra Farizai'o, si zizio sanguma'õ, "Niha soi bõ'õ si no faduhu tõdõ andrõ lõ tola lõ'õ laboto ira ba la'o'õ goroisa Zo'aya nifa'ema Moze."
6Owulo ndra sinenge ba ira satua wamatunõ sanandrõsa ba da'õ.
7Ara ginõtõ gamatunõw̃ara andrõ. Muzizio Wetero ba imane, "He ya'ami ira talifusõ! No aboto ba dõdõmi wa lõ ara ba zi no numalõ Ifili ndra'o Lowalangi moroi ba gotaluami ba wanuriaigõ Turia Somuso Dõdõ ba soi bõ'õ si tenga niha Yahudi, ena'õ lafondrondrongo ba faduhu dõdõra.
8Ba Lowalangi sangila tõdõ niha zi no manuturu wa Itema ira; oroma da'õ ba wame'e khõra Eheha Lowalangi si mane fame'e-Nia khõda gõi.
9Lõ Ifabõ'õni ira khõda Lowalangi. I'amoni'õ dõdõra bõrõ me faduhu dõdõra.
10Iada'e, hana wa milaw̃a Lowalangi ba wame'e noro dõdõ sabua ba zamati andre, hew̃a'ae tebai talau ba he gõi ira tuada?
11Ba faduhu dõdõda wa te'orifi ita bõrõ wa'ahakhõ dõdõ Yesu So'aya; si manõ gõi ira."
12Lõ hedehede niha fefu sowulo ba da'õ. Lafuli lafondrondrongo me latutunõ mangawuli ira Faulo ba Baranaba fefu zahõlihõli dõdõ ba si lõ harumani andrõ nilau Lowalangi ba khõra ba gotalua soi bõ'õ si tenga niha Yahudi.
13Me no aefa fahuhuo ira, imane Yakobo, "He ira talifusõ! Mifondrondrongo niw̃a'õgu.
14No i'ombakha'õ Simoni mege hewisa ba wamõbõrõ wa no oroma dõdõ Lowalangi ba soi bõ'õ si tenga niha Yahudi. Ohitõ dõdõ-Nia ya'ia wamili ya'ira tobali banua-Nia dania.
15Faudu da'õ ba zi no lafa'ele'õ ira sama'ele'õ. Bõrõ me no tesura da'e,
16Imane So'aya, 'Aefa da'õ ifuli tohare zui Ndra'o dania,' 'Ufuli U'otomosi mangawuli nomo Dawido si no adudu, ba Uhaogõ gadudulania, ba Ufuli Ufasindro mangawuli;
17ena'õ la'alui Zo'aya niha si torõi andrõ, si fao soi tanõ bõ'õ si tenga niha Yahudi si no Ukaoni tobali tana khõ-Gu.' Si manõ niw̃a'õ Zo'aya,
18si no mangombakha da'õ i'otarai wamõbõrõ."
19Imane Yakobo, "Molo'õ era'eragu, bõi tabusi dõdõ niha moroi ba soi bõ'õ si tenga niha Yahudi sanou'õ ya'ira ba danga Lowalangi.
20Ba hiza tasura khõra zura ba ta'amenesi ira ena'õ bõi la'a gõ si ra'iõ si no labe'e sumange ba nadu, ba urifõ si mane nitõgi bagi, ba femanga ndro. Ba ena'õ la'arõu'õ ira ba gamuata wohorõhorõ.
21Bõrõ me no ifa'ema Moze goroisa Lowalangi, i'otarai mbõrõta ba no tebaso ba nomo'omo wangandrõ ero luo Sabato, ba teturiaigõ ba mbanua misa."
22Lahalõ gangetula ira sinenge ba satua wamili õsa ba gotaluara nifatenge ba Gandriokhia awõ ndra Faulo ba Yohane. Lafili Zila ba Yuda, nifotõi gõi Barasaba. No sondrõnia'õ zi darua andrõ ba gotalua zamati ba Yeruzalema.
23Lafa'ohe'õ sagõrõ zura si fao ba dengetenge andrõ, si mane nõsinia, "Ba dalifusõ fefu si otarai soi bõ'õ si tenga niha Yahudi, si torõi ba Gandriokhia, ba Ziria ba ba Gilikia. Fangowai si otarai ndra'aga, ira sinenge ba satua, talifusõmi.
24No marongo wa so õsa moroi ba gotaluama zi mõi khõmi ba lafawukaisi awõ wa la'afõkhõi hõgõmi faoma famahaõra. Ba hiza tenga nifatengema ira wolau da'õ.
25Bõrõ da'õ no mamagõlõ ndra'aga ba no fao dõdõma ba wamili õsa ba mafatenge ira khõmi. Mõi ira si fao talifusõda Faulo ba Baranaba ni'omasi'õ.
26Si darua andre no latehegõ nosora bõrõ Zo'aya ya'ita Yesu Keriso.
27Tobali, mafatenge Yuda ba Sila khõmi. Ya'ira samõsa zama'ema faoma fehede khõmi duria nisura ba zura andre gõi.
28No fao dõdõ Geheha Lowalangi -- ba fao dõdõma gõi -- ena'õ bõi mube'e noro dõdõmi zabõlõ abua moroi ba zoguna andre:
29Bõi mi'a gõ si no mube'e sumange ba nadu; bõi mi'a ndro, bõi mi'a gurifõ nitõgi bagi, ba mi'arõu'õ ami ba wohorõ. Na mi'arõu'õ ami ba da'e fefu, no mifalua zi sõkhi. Ha irugi da'õ, Ya'ahowu!"
30Ba me no mangona ira, tebua dengetenge andrõ ba Gandriokhia. Lakaoni ena'õ owulo fefu mbanua Niha Keriso ba da'õ ba lafa'ema zura andrõ.
31Ba me labaso zura andrõ banua Niha Keriso, omuso sibai dõdõra ba zura andrõ ba ba nõsinia, ba terara dõdõra.
32Yuda awõ Zila, si no sama'ele'õ gõi, ara fahuhuo ira khõ ndra talifusõ samati ba Gandriokhia ba wamarou tõdõra ena'õ so khõra wa'abarani.
33Me no ara ma'ifu torõi Yuda ba Sila, mangawuli ira ba Yeruzalema ba lafa'ema wangowaira banua zamati ba Gandriokhia andrõ khõ zamatenge Yuda ba Sila.
34[Ba hiza ihalõ gangetula Sila wa'atorõi ba Gandriokhia.]
35Torõi ndra Faulo ba Baranaba ba Gandriokhia. Mamahaõ ira ba laturiaigõ daroma li Zo'aya ba da'õ si fao niha bõ'õ sato.
36Lõ ara aefa da'õ muhede Waulo khõ Mbaranaba, "Tafuli ita wangondrasi ira talifusõ samati khõ Yesu ba mbanua fefu, si no irai mõi ita no ba wanuriaigõ Taroma Li Lowalangi; ena'õ ta'ila hewisa ira."
37Omasi Mbaranaba wolohe awõra Yohane Mareko,
38ba hiza molo'õ Faulo lõ gõna wolohe Mareko si lõ omasi falulu halõw̃õ khõra me irõi ira ba Wamefilia.
39Fakara sibai ndra Faulo faoma Baranaba irege fabali ira. Maoso Mbaranaba ihalõ Mareko ba i'ohe ia woloyo numalõ ba Zifirusi.
40I'ohe Zila awõnia Faulo ba mofanõ ira me no latou'õ ira ba wa'omasi Lowalangi, ya'ira, talifusõ ba Gandriokhia andrõ.
41Lafasui danõ Ziria ba tanõ Gilikia; la'abe'e'õ mbanua Niha Keriso ba da'õ.
Download Audio MP3 (Kisah Para Rasul 15):
Mobile (Low Quality) - CD (High Quality)
<< Kisah Para Rasul 15 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel