Alkitab Mobile SABDA
[VER] : [NIAS]     [PL]  [PB] 
 <<  Kisah Para Rasul 2 >> 

1Me irugi inõtõ Wendrakose, owulo ba zi sambua nahia fefu zamati.

2I'anema'õ terongo li moroi ba mbanua hulõ na itõrõ angi sabõlõbõlõ. Terongo li andrõ ba zi sambua omo si dadao ya'ira.

3La'ila dalinga wandru si hulõ galitõ so'anõnõi fefu awõ wa mõi khõra dozi ira.

4Ifatõrõ ira Eheha Lowalangi, ba ibõrõtaigõ fahuhuo ira ba li bõ'õ. Fahuhuo ira molo'õ nibe'e Geheha khõra fanguma'õ.

5Me inõtõ da'õ ato niha Yahudi si otarai soi fefu ba gulidanõ, si torõi ba Yeruzalema. No sangata'ufi Lowalangi ira.

6Me larongo li andrõ, ato sibai zangondrasi. Tokea sibai ira me fahuhuo ndra nifahaõ andrõ ba lira zamõsana.

7Si fao fa'atobali dõdõ ba fa'ahõli dõdõ lasofu lamane, "Hadia tenga niha Galilea fefu niha si hedehede andre?

8Hewisa wa tola tarongo fahuhuo ira ba li ni'oguna'õ ba soida dozi ita?

9Ya'ita niha Waretia, niha Media, niha Gelama; moroi ba Mesofotamia, moroi ba Yudea ba Gafadokia; moroi ba Wondro ba Asia,

10moroi ba Werigia ba Wamefilia, moroi ba danõ Miserai ba moroi ba danõ Libia, ahatõ ba Girene; ba so moroi ba gotaluada zi otarai Roma,

11so gõi niha Yahudi awõ soi bõ'õ si no tobali fao ba agama niha Yahudi; so gõi zi otarai Gareta ba Arabi. Tarongo fahuhuo ira ba lida, sanandrõsa ba zahõlihõli dõdõ andrõ nilau Lowalangi!"

12Fao fa'atobali dõdõ ba fa'ahõli dõdõ lasofu lamane khõ nawõra, "Hadia geluaha da'e?"

13Ba so gõi zango'aya. Lamane, "Ae, si mabu wõ ira andrõ!"

14Muzizio Wetero awõ ndra sinenge tanõ bõ'õ, fahuhuo ia fõna niha sato andrõ. Ebua linia imane, "He ira talifusõ niha Yahudi awõ fefu niha si torõi ba Yeruzalema! Mihaogõ wamondrondrongo, bõrõ me moguna u'ombakha'õ khõ ndra talifusõ.

15Tenga si mabu niha andre, si mane niw̃a'õmi; bõrõ me awena bõzi siw̃a sahulõ wongi.

16Ba hiza no i'ombakha'õ Lowalangi da'e khõ Yo'eli sama'ele'õ.

17Imane Lowalangi, 'Ba luo safuria Ufaduwa Geheha-Gu ba niha fefu. La'ombakha'õ fefu ngawalõ ni'ombakha'õ-Gu khõ ndraonomi ono matua ba iraonomi ono alawe. La'ila ngawalõ ni'oroma'õ-Gu khõra iraono matua khõmi. Mangifi ndra satuami, fangifi nibe'e-Gu khõra.

18Ufaduwa gõi Geheha-Gu ba luo da'õ khõ ndra enoni-Gu ira matua ba enoni-Gu ira alawe. La'ombakha'õ fefu hadia ia ngawalõ ni'ombakha'õ-Gu khõra.

19Ufalua zagahõlihõli dõdõ ba mbanua si yaw̃a, awõ ngawalõ zi lõ ya'ia ba gulidanõ andre tou; so dania ndro ba alitõ, sau ba simbo.

20Tobali ogõmi dania luo, tobali oyo hulõ ndro mbaw̃a fatua lõ irugi nasa Luo Zo'aya, ngaluo sebua ba solakhõmi.

21Me inõtõ da'õ, te'orifi dania zi'ao khõ Zo'aya.'

22Ya'ami talifusõ niha Gizera'eli! Mifondrondrongo niw̃a'õgu andre: No Ibe'e Lowalangi khõ Yesu banua Nazareta andrõ halõw̃õ soguna khõmi. Oroma da'õ ba dandratandra si lõ harumani awõ zagahõlihõli dõdõ nilau Lowalangi ba gotaluami. Yesu zama'ema da'õ. Ba no aboto ba dõdõmi fefu.

23Ba gangetula awõ nifakhoi dõdõ Lowalangi samõsa, no te'a mbõli Yesu. No te'a mbõli-Nia, no mibunu Ia ba mifatenge niha si lõ sõkhi wamorõfa Ya'ia.

24Ba hiza I'orifi mangawuli Ia Lowalangi moroi ba gotalua niha si no mate. No igogohe Ia fa'amate, ba hiza I'efa'õ Ia Lowalangi, bõrõ me tebai manõ ikuasoi Ia fa'amate.

25Sanandrõsa khõ Yesu andre no imane Dawido, 'U'ila lõ mamalõ fõnagu Zo'aya; I'iagõ zingagu, ena'õ tebai ifangiwa ndra'o gofu hadia ia.

26Da'õ mbõrõ wa omuso dõdõgu, ilau manunõ bawagu; ba ibaloi dania botogu andre ba nahia wolombase si fao fa'ahono dõdõ.

27Bõrõ me lõ Õtehe torõi nosogu ba nahia si mate. Lõ Õtehe tekiko ndra'o andre si lõ farõi khõ-U.

28No Õtuturu lala khõgu saekhu ba wa'auri sindruhu. No fondrege wa'omuso dõdõgu bõrõ we'aso-Mõ awõgu.'

29Ya'ami ira talifusõ, mitehegõ khõgu wanguma'õ sindruhu sanandrõsa khõ Dawido, tuada andrõ. No mate ia ba no teko'o. So ba gotaluada lewatõnia irugi da'e.

30No Ifabu'u Lowalangi khõ Dawido faoma fahõlusa, wa Ibali'õ Razo samõsa ba gotalua nga'õtõnia dania. No i'ila Dawido wawu'usa li Lowalangi awõ wa sama'ele'õ gõi ia,

31andrõ wa i'ila gõi nifalua Lowalangi. No ifa'ele'õ Dawido wa ifuli auri mangawuli moroi ba wa'amate dania Razo Sangorifi nifabu'u Lowalangi andrõ. Imane Dawido, 'Lõ torõi Ia ba nahia niha si no mate; lõ tekiko ba lõ obou dania mboto-Nia.'

32Yesu andre ni'orifi Lowalangi mangawuli moroi ba wa'amate. No samaduhu'õ ndra'aga ba da'õ.

33Tefataro Ia ba nahia salaw̃a ba Ibe'e kuaso khõ-Nia Lowalangi, ba Itema Geheha Lowalangi si no Ifabu'u Ama. Ba nirongomi awõ ni'ilami iada'e no Eheha andrõ nifaduwa khõma.

34Lõ si mõi ba zorugo Dawido, ba hiza no imane, 'Imane So'aya khõ Zo'aya ya'o:

35Dadao ba gambõlõ-Gu, irege la'agoi gaheu udumõ Ube'e.'

36Da'õ wa lõ tola lõ'õ la'ila fefu niha Gizera'eli wa Yesu niforõfami andrõ no Yesu nifabu'u Lowalangi si tobali So'aya ba Razo Sangorifi!"

37Oi awakhõwakhõ dõdõ niha samondrongo da'õ. Lasofu khõ Wetero awõ khõ ndra sinenge bõ'õ, lamane, "Hadia nilauma, talifusõ?"

38Imane Fetero, "Mifalalini gera'erami ba mirõi horõmi. Mifabayagõ'õ ami idanõ ba dõi Yesu Keriso, ena'õ te'efa'õ khõmi horõmi. Ba mitema dania mbuala Geheha Lowalangi si otarai Lowalangi.

39Bõrõ me khõmi zi no ifabu'u Lowalangi andrõ ba ba khõ nga'õtõmi awõ ba niha si so ba nahia sarõu -- ya'ia fefu nikaoni Lowalangi So'aya ya'ita we'amõi khõ-Nia."

40Si manõ wamoboto Wetero ba dõdõra. Ba faoma fehede tanõ bõ'õ nasa ifarou ira ena'õ la'efa'õ ira moroi ba soi si lõ sõkhi andre nihuku Lowalangi dania.

41Ato zi faduhu tõdõ ba niw̃a'õ Wetero ba tebayagõ ira idanõ. Monõnõ zi faduhu tõdõ ba zi ma'õkhõ andrõ mato tõlu ribu niha.

42Lõ mamalõ ira nifahaõ ndra Sinenge Yesu ba owulowulo ira. Faofao ira wemanga awõ ba wangandrõ.

43Oya ngawalõ zahõlihõli dõdõ nilau ndra sinenge Yesu, irege oi ahõli dõdõ ba ata'u niha fefu.

44Ha sambua dõdõ zamati andrõ ba faoma la'oguna'õ zi so khõra ba wahasara dõdõ.

45Lafamawa gamagama si so khõra, ba labagibagi mbõlinia ba gotaluara molo'õ soguna khõ zamõsana.

46Owulo ira ba Nomo Zo'aya ero ma'õkhõ; faofao ira wemanga, si fao fa'omuso dõdõ ba fangidengide'õ fõna Lowalangi ba nomora misa,

47lõ mamalõmalõ lasuno Lowalangi ba la'omasi'õ ira fefu niha. Itugu tedou wa'atora ero ma'õkhõ bõrõ me Ibe'e khõra Lowalangi niha ni'orifi.



Download Audio MP3 (Kisah Para Rasul 2):
Mobile (Low Quality) - CD (High Quality)

 <<  Kisah Para Rasul 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel