Alkitab Mobile SABDA
[VER] : [NIAS]     [PL]  [PB] 
 <<  Kisah Para Rasul 24 >> 

1Lima ngaluo aefa da'õ, numalõ ba Kaizarea Gere Sebua Anania awõ ndra salaw̃a niha Yahudi ba fao zi fahuhuo sotõi Teretulo. Mõi ira khõ Gubernur Feliki, ba la'ombakha'õ wangadura sanandrõsa khõ Waulo.

2Me lakaoni fõna Deretulo, imane wangadugõ Faulo, "Tuha Gubernur nifosumange! Barõ wamatõrõmõ sohahau tõdõ ndra'aga ba nõrima. No oya zi sõkhi nilau ba soima ba wa'asõkhi dõdõu.

3Lõ mamalõ matema'õ da'õ ba ma'andrõ saohagõlõ awõ wa lõ ma'olifuagõ da'õ gofu heza soga.

4Ba hiza, ena'õ lõ ahori ginõtõu, Tuha, ma'andrõ fondrondrongo wangaduma si no adogodogo andre.

5No masõndra wa samawukaisi niha andre. Gofu heza misa alua waguaguasa ba gotalua niha Yahudi ibe'e ba tobali ia sondrõnia'õ ba niha Nazareta.

6No ita'unõi Nomo Zo'aya, ba hiza no mara'u ia. [Edõna ndra'aga wangetu'õ huku khõnia molo'õ agama khõma.]

7[Ba komandra Lisia zanga'i ya'ia ba dangama,]

8[ba ibe'e wareta ena'õ mõi fõnau Tuha zangadugõ ya'ia.] Na õfareso niha andre õrongo samõsa dania wa sindruhu wangadugõma khõnia."

9Fao gõi wangadugõ Faulo niha Yahudi si so ba da'õ ba lafaduhu'õ niw̃a'õ Deretulo andrõ.

10Ba ibe'e dandra faoma tangania gubernur andrõ khõ Waulo ena'õ fahuhuo ia. Imane Faulo, "No aboto ba dõdõgu wa no ara tobali sanguhuku ndra'ugõ ba nõri andre. Da'õ mbõrõ wa omuso dõdõgu ubelegõ ndra'o fõnau, Tuha.

11Tola õfareso samõsa, Tuha, wa felendrua ngaluo ba zi lalõ mõi ndra'o ba Yeruzalema wangandrõ.

12Ba lõ irai la'ila niha Yahudi fa'udu ndra'o ba niha ma zui u'owuloi niha ba wamalua famawukaisi, he ba Nomo Zo'aya, ba nomo wangandrõ ma zui gofu heza ba fasa.

13Tebai gõi la'a'aro'õ wangadugõra ya'o khõu.

14U'akui khõu Tuha wa samosumange Lowalangi ndra tuama ndra'o molo'õ famahaõ Yesu nibali'õra sala andrõ. Ba hiza, faduhu dõdõgu nasa fefu ba zi no musura ba Mbuku Moze awõ ba Mbuku ndra Sama'ele'õ.

15Si mane ya'ira, so gõi wanõtõnagu khõ Lowalangi wa ifuli auri mangawuli niha moroi ba wa'amate -- niha satulõ tõdõ, ba he gõi niha si lõ sõkhi!

16Da'õ mbõrõ wa uforege, ena'õ atulõ dõdõgu khõ Lowalangi ba sõkhi dõdõgu ba nawõgu niha.

17Me no ha'uga fakhe lõ torõi ndra'o ba Yeruzalema, mangawuli ndra'o ba da'õ wolohe kefe tolotolo ba soigu awõ wame'e sumange khõ Lowalangi.

18Me ufalua da'õ, lasõndra ndra'o ba Nomo Zo'aya, me no aefa halõw̃õ fangehao mboto. Lõ hadõi niha sato si fao khõgu, ba lõ hadõi gõi fawukasa me inõtõ da'õ.

19Ba so õsa ndra niha Yahudi ba da'õ moroi ba propinsi Asia. Ya'ira zindruhunia zi so ba da'e wo'angadugõ khõu Tuha na so wangadugõra ya'odo.

20Akha lahonogõi niha andre wangombakha hadia nisõndrara olalõw̃a si no ufalua me la'ohe ndra'o fõna Zanguhuku ba Agama.

21Nisõndrara khõgu lõ baero wehede me uw̃a'õ fõnara: La'ohedo ba wanguhuku ma'õkhõ andre, bõrõ me faduhu dõdõgu wa ifuli te'orifi niha si no mate dania."

22I'asiwai wa'owulo andrõ Feliki, si no oya mangila sanandrõsa ba wamahaõ Yesu, imane, "U'etu'õ warakaro andre dania na no tohare komandra Lisia."

23Aefa da'õ ibe'e wareta khõ ndra saradadu ena'õ lataha manõ Waulo, ba lahaogõ khõnia awõ wa tetehegõ khõ ndra awõnia wame'e hadia ia zoguna khõnia.

24Mato ha'uga ngaluo aefa da'õ, tohare Weliki. Fao khõnia wo'omonia sotõi Derusila; niha Yahudi ia. Ifatenge niha Feliki wanga'i Faulo, ba ifondrondrongo huhuo Waulo sanandrõsa ba wamati khõ Keriso Yesu.

25Ba me itohugõ huhuonia Faulo sanandrõsa ba wa'atulõ dõdõ, fanaha tõdõ awõ wanguhuku ba Luo Safuria, ata'u Weliki ba imane, "Ofanõ iada'e. Ufuli ukaoni zui ndra'ugõ na so ginõtõ."

26Itõtõna wa isõndra Feliki gefe moroi khõ Waulo. Da'õ mbõrõ wa i'asese'õ wamatenge niha sogaoni Faulo ba wahuhuosa khõnia.

27Me no irugi dua fakhe, tobali gubernur Werokia Feso fogati Weliki. Ba bõrõ me ihalõ dõdõ ndra niha Yahudi Feliki, andrõ wa itaha manõ Waulo bakha ba gurunga.



Download Audio MP3 (Kisah Para Rasul 24):
Mobile (Low Quality) - CD (High Quality)

 <<  Kisah Para Rasul 24 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel