1Me irugi fasa Yerikho Yesu, Itohugõ manõ wofanõ.
2So ba mbanua andrõ samõsa zangozara beo sotõi Sakai'o.
3Omasi ia i'ila Yesu. Ba hiza no adogodogo ia, lõ ikhamõ hõrõnia Yesu bõrõ me ato sibai niha.
4Andrõ ilau fagohi wohulõ niha sato, i'anõisi dõla geu, ena'õ tola i'ila Yesu sanõrõ da'õ.
5Me irugi nahia andrõ Yesu, Ifaigi si yaw̃a ba Imane khõ Zakai'o, "He Sakai'o, alio'õ ae'e tou! Omasi Ndra'o molombase ba nomou ma'õkhõ andre."
6Numalõ tou Zakai'o ba itema Yesu si fao fa'omuso dõdõ.
7Oi mukõkõkõkõ fefu niha sangila da'õ. Lamane, "E, mõi Ia fatome ba niha si lõ sõkhi!"
8Muzizio Zakai'o ba imane khõ Zo'aya, "He So'aya, ube'e zi matonga haratogu ba niha si numana; ba ubu'a õfa kali fabali ba niha si no irai ulimo!"
9Imane khõnia Yesu, "Ma'õkhõ andre no Itema Lowalangi ndra'ugõ awõ fefu zoroiyomou. No nga'õtõ Gaberahamo gõi ndra'ugõ.
10Fe'aso Nono Niha ba gulidanõ, ya'ia ba wangalui awõ ba wangorifi niha selungu."
11Fatua lafondrondrongo huhuo Yesu niha sato, Itutunõ Yesu sambua gamaedola. Me inõtõ da'õ no arakha Irugi Yeruzalema, ba lawalinga Ifatõrõ gulidanõ Lowalangi.
12Andrõ wa Imane Yesu khõra, "So samõsa mbalugu si mõi ba mbanua sarõu bõrõ me labali'õ ia Razo ba da'õ. Na no aefa da'õ awena mangawuli ia.
13Fatua lõ mofanõ ia, ikaoni zi dafulu sawuyunia, ba wame'e khõra sambua rigi ana'a. Imane khõra, 'Milau ba waniaga gana'a andre fatua lõ ya'o ba da'e.'
14Fatiu dõdõ mbanuania khõnia. Andrõ me no mofanõ ia lafatenge niha sanguma'õ, 'Lõ omasiga Razoma niha andre.'
15Me no aefa labali'õ Razo ia ba mbanua sarõu andrõ, mangawuli ia ba mbanuania. Ikaoni ndra sawuyu si no manema ana'a moroi ba dangania, ena'õ la'ondrasi ia. Omasi ia i'ila ha wa'oya hare si no lasõndra ero samõsa.
16Tohare zawuyu si fõfõna imane, 'He Tuha, no usõndra hare fulu rigi ana'a ba gefe andrõ nibe'eu.'
17Imane sokhõ ya'ia, 'Sõkhi da'õ, sawuyu si sõkhi ndra'ugõ! Bõrõ me tola nifaduhusi tõdõ ndra'ugõ ba zide'ide, akha tobali amatõrõw̃au zi fulu ngawua banua.'
18Tohare zawuyu ganete da'õ imane, 'He Tuha. Ba zi sambua rigi ana'a andrõ nibe'eu, no usõndra hare lima rigi ana'a.'
19Imane ba zawuyu andrõ, 'Tobali ndra'ugõ samatõrõ ba zi lima banua.'
20Tohare samõsa tõ zawuyu sanguma'õ, 'He Tuha, rigi ana'a andrõ khõu no ubukusi ba zaembutanga.
21Ata'u sibai ndra'odo khõu, bõrõ me u'ila sabe'e huku ndra'ugõ. Õhalõ zi tenga khõu ba õbasi zi tenga nitarumõ.'
22Imane Razo khõnia, 'Sawuyu si lõ sõkhi ndra'ugõ! Faudu ba wehedeu, ufatõrõ huku. Õ'ila wa sabe'e huku ndra'odo: Uhalõ zi tenga khõgu ba ubasi nowi si tenga nitanõgu.
23Na si manõ hana wa lõ õbe'e mohare gefegu andrõ, ena'õ utema mangawuli si fao hare!'
24Aefa da'õ imane Razo ba niha si so ba da'õ, 'Mihalõ gana'a andrõ khõnia, mibe'e ba zawuyu sokhõ fulu rigi ana'a.'
25Lamane ira niha andrõ khõ Razo, 'He Tuha, no so khõnia fulu rigi ana'a.'
26Itema li Razo andrõ, 'Mitõngõni: Niha sangoigõ dõdõnia wangalui hadia ia, tebe'e nasa khõnia zoya. Ba ba niha si lõ ba dõdõ wangalui hadia ia tehalõ zi so khõnia he ha ma'ifu.
27Iada'e mi'ohe ba da'e nudugu andrõ si lõ omasi na tobali ndra'o Razora. Mibunu ira fõna hõrõgu!'"
28Me no aefa Iw̃a'õ da'õ fefu Yesu, Idaridari fõnara numalõ ba Yeruzalema.
29Me no arakha Irugi Mbetifage ba ba Mbetania ba Hili Zaitu, Ifadaridari'õ darua nifahaõ-Nia.
30Imane khõra, "Mi'ae'e ba mbanua andrõ fõnami. Na mirugi da'õ misõndra sara nono galide ni'amohõgõ si lõ irai la'okudo niha. Mi'efasi mbõbõ galide andrõ ba mi'ohe ba da'e.
31Na lasofu khõmi niha, 'Hana wa mi'efasi galide andrõ?' Mimane ba niha andrõ, 'Moguna khõ Zokhõ.'"
32Mofanõ ndra nifatenge Yesu andrõ. Ba lasõndra faudu sibai si mane si no Iw̃a'õ Yesu.
33Fatua la'efa'õ zinali galide andrõ, isofu sokhõ kalide khõra, "Hana wa mi'efasi galide andrõ?"
34Latema li lamane, "Moguna khõ Zo'aya?"
35Ba la'ohe nono galide andrõ khõ Yesu. Aefa da'õ labe'e nukhara yaw̃a ba hulu galide ba latolo Yesu we'amõi yaw̃a.
36Me Itõrõ Yesu galide andrõ, labologõ nukhara niha sato ba lala nitõrõ Yesu.
37Me arakha irugi Yeruzalema Yesu, ba lala numalõ ba Hili Zaitu, ibõrõgõ lalau mu'ao ndra solo'õ Yesu fefu wanuno Lowalangi awõ wangandrõ saohagõlõ khõ-Nia bõrõ fefu zahõlihõli dõdõ si no la'ila hõrõra samõsa.
38Mu'ao ira lamane, "Ya'ahowu Razo si so ba dõi Zo'aya! Fa'ohahau dõdõ ba zorugo, ba lakhõmi khõ Lowalangi!"
39So õsa ndra Farizai'o ba gotalua niha sato andrõ sanguma'õ khõ Yesu, "He amagu Guru, fahono ndra solo'õ Ya'ugõ andrõ."
40Itema li Yesu, "Ya faduhu dõdõmi, na lahonogõ ira, oi zara mu'ao dania gara."
41Me itugu ahatõ Yesu ba Yeruzalema, ifaigi mbanua sebua andrõ ba me'e Ia.
42Imane, "Alimagõ, ha wa'asõkhi na ma'õkhõ andre mi'ila hadia zinangea moguna ba wanga'asogõ fa'ohahau dõdõ! Ba hiza tebai mi'ila iada'e.
43So ginõtõ dania labe'e zomba'agõ ba zi fasuimõ; lakõlini ndra'ugõ udumõ ba laforege wodegeni ya'ugõ gofu heza.
44Lafakiko ndra'ugõ awõ niha fefu si so bakha ba gõli mbanuau; ba sambua lõ kara si te'anõ ba nahiania, bõrõ me lõ ba dõdõu ha wa'ara tohare Lowalangi ba wangorifi ya'ugõ!"
45Mõi Yesu ba Nomo Zo'aya ba Ibõrõtaigõ wamofanõ ira sogale ba da'õ.
46Imane khõra, "No tesura ba Mbuku Ni'amoni'õ wa no Imane Lowalangi, 'Lõ tola lõ'õ tobali nahia wangandrõ Nomo-Gu.' Ba no mibali'õ nahia zanagõnagõ!"
47Ero ma'õkhõ mamahaõ Yesu ba Nomo Zo'aya. La'alui lala ira ere sebua ba guruguru agama niha Yahudi awõ zalaw̃a niha Yahudi ba wamunu Yesu.
48Ba hiza lõ la'ila lafalua da'õ, bõrõ me lõ aetu'aetu niha sato wamondrongo famahaõ-Nia ba adõni dõdõra khõ-Nia.
Download Audio MP3 (Lukas 19):
Mobile (Low Quality) - CD (High Quality)
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel