Alkitab Mobile SABDA
[VER] : [NIAS]     [PL]  [PB] 
 <<  Lukas 3 >> 

1Me no felelima fakhe wamatõrõ Kaizaro Tiberio andrõ, ba gubernur ba Yudea ya'ia Wondrio Filato, ba samatõrõ ba Galilea ya'ia Herode. Mamatõrõ gõi Wilifo talifusõ Herode ba Gituraia ba ba Darakhoniti, ba mamatõrõ gõi Lisania ba Gabilene.

2Si tobali ere sebua ya'ia Hanasi ba Kayafa. Me inõtõ da'õ humede Lowalangi khõ Yohane, ono Zakharia andrõ ba danõ si mate.

3Andrõ mõi Yohane ba wanõrõi fefu banua ba zinga Nungo Nidanõ Yoridano ba wama'ema Turia Lowalangi. Imane Yohane, "Mifalalini gera'erami ba mirõi horõ, awõ wa mifabayagõ'õ ami idanõ, ena'õ I'efa'õ horõmi Lowalangi."

4No musura ba zura Yesaya sama'ele'õ si mane, "So niha si'ao ba danõ si mate, 'Mihaogõ lala Zo'aya, mifadaya lala-Nia.

5Mitimbu fefu mbawa danõ mifadaya fefu hilihili. Mi'adõlõ'õ lala sabila, ba mi'alõsõi'õ lala si redeõ.

6Ba la'ila dania fefu niha ba gulidanõ I'orifi niha Lowalangi!'"

7Ba ato niha si mõi khõ Yohane ba wamayagõ'õ idanõ ya'ira. Imane khõra Yohane, "He ya'ami niha si lõ sõkhi! Haniha zanguma'õ khõmi wa aefa ami ba wõnu Lowalangi andrõ dania?

8Miforoma'õ ba gamuatami wa no mirõi horõmi ba wamalalini era'era! Bõi miw̃a'õ tõdõmi, 'Tuama Gaberahamo.' Mitõngõni: Tola Ifazõkhi Lowalangi nga'õtõ Gaberahamo moroi ba gara andre!

9Ba no tehõnagõ wato ba wolobõ eu fabaya w̃a'ania. Me fefu dõla geu si lõ sõkhi fowua, la'obõ ba latibo'õ ba galitõ."

10Lasofu ira niha andrõ khõ Yohane, "Tobali, hadia nilauma?"

11Itema li Yohane, "Niha si so baru dua nga'õrõ akha ibe'e sagõrõ ba niha si lõ baru; ba si so balazo, akha ibagi ba niha si lõ balazo."

12Tohare gõi zanema beo ba wamayagõ'õ ya'ira idanõ khõ Yohane. Lasofu khõ Yohane, Lamane, "He Guru, hadia nilauma?"

13Imane Yohane khõra, "Bõi misugi zi tõra moroi ba zi no muhonogõi."

14Ba lasofu gõi khõnia ira saradadu, lamane, "Hewisa gõi ndra'aga? Hadia nilauma?" Imane Yohane khõra, "Bõi mifaso niha wame'e kefe khõmi gofu haniha ia, ba bõi mihalõ gefe ba wangadu si lõ duhu, ya'abõnõ khõmi gazimi!"

15Ba me luo da'õ ibõrõtaigõ manofunofu dõdõ niha sato, wanguma'õ, hadia Yohane Razo Sangorifi andrõ nibalobaloira.

16Da'õ mbõrõ wa imane khõra fefu Yohane, "Ubayagõ ami faoma idanõ, ba abõlõ ebua moroi khõgu dania Ia zi tohare andrõ, tenga na'i sinangea ndra'o ba wamokai bõbõ mbadagahe-Nia. Ibayagõ ami dania faoma Eheha Lowalangi ba alitõ.

17So ba danga-Nia niru ba wanafi'õ fefu fakhe-Nia irege sõkhi. Fakhe I'owuloi ba halasa, ba fefu gadaya Itunu ba galitõ si lõ matemate!"

18Si manõ menemene Yohane ba niha, na i'ombakha'õ khõra duria soroi Lowalangi.

19Itegu Yohane gomandra Galilea, ya'ia Herode, bõrõ wangowalunia khõ Herodia, fo'omo dalifusõnia, awõ fefu zi lõ sõkhi tanõ bõ'õ nilau Herode.

20Ba itugu tedou wa lõ sõkhi Herode awõ wa ibe'e ba gurunga Yohane.

21Me no tebayagõ idanõ fefu niha sato, mubayagõ gõi idanõ Yesu. Me mangandrõ Ia, ba teboka mbanua si yaw̃a.

22Ba mõi mitou Geheha Lowalangi khõ-Nia hulõ marafadi. Terongo li moroi ba zorugo sanguma'õ, "Ono-Gu omasiõ Ndra'ugõ. Wa'omasi-Gu."

23Me Ibõrõtaigõ wamahaõ-Nia Yesu, no tõlu ngafulu fakhe wa'ebua-Nia. Law̃a'õ niha, ono Yosefo Ia, Yosefo ono Eli,

24Eli ono Mata, Mata ono Lewi, Lewi ono Melekhi, Melekhi ono Yana'i, Yana'i ono Yosefo,

25Yosefo ono Matatia, Matatia ono Gamosi, Amosi ono Na'uma, Na'uma ono Heseli, Heseli ono Naga'i,

26Naga'i ono Ma'ata, Ma'ata ono Matatia, Matatia ono Zema'i, Sema'i ono Yosekho, Yosekho ono Yoda,

27Yoda ono Yohanano, Yohanano ono Resa, Resa ono Zerubabeli, Serubabeli ono Zelatieli, Selatieli ono Neri,

28Neri ono Malekhi, Malekhi ono Nadi, Nadi ono Gosa, Gosa ono Gelimada, Elimada ono Gero,

29Ero ono Yesua, Yesua ono Geliezeri, Eliezeri ono Yori, Yori ono Mata, Mata ono Lewi,

30Lewi ono Zimeoni, Simeoni ono Yuda, Yuda ono Yosefo, Yosefo ono Yona, Yona ono Geliaki,

31Eliaki ono Melea, Melea ono Mena, Mena ono Matata, Matata ono Natano, Natano ono Dawido,

32Dawido ono Giza'i, Iza'i ono Gobedi, Obedi ono Mboasi, Boasi ono Zalomono, Salomono ono Nahaso,

33Nahaso ono Gaminadabi, Aminadabi ono Gadami, Gadami ono Gareni, Areni ono Heserono, Heserono ono Weresi, Feresi ono Yuda,

34Yuda ono Yakobo, Yakobo ono Giza'i, Iza'i ono Gaberahamo, Aberahamo ono Dera, Tera ono Nakhori,

35Nakhori ono Zerukhi, Serukhi ono Rehu, Rehu ono Waleki, Faleki ono Geberi, Eberi ono Zalomono,

36Salomono ono Genana, Kenana ono Garafasa, Arafasa ono Zemi, Semi ono Noakhi, Noakhi ono Lameki,

37Lameki ono Metusala, Metusala ono Henokhi, Henokhi ono Yaredi, Yaredi ono Mahalaleli, Mahalaleli ono Genana,

38Kenana ono Genosi, Enosi ono Seti, Seti ono Gadamo, Adamo ono khõ Lowalangi.



Download Audio MP3 (Lukas 3):
Mobile (Low Quality) - CD (High Quality)

 <<  Lukas 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel