1Me no aefa fahuhuo Yesu ba niha sato, mõi Ia ba Gafana'uma.
2Ba da'õ so hõgõ zaradadu Roma sokhõ sawuyu ni'omasi'õnia. Mofõkhõ sibai zawuyu andrõ ba arakhagõ mate.
3Me irongo duria Yesu hõgõ zaradadu andrõ, ifatenge khõ Yesu ndra salaw̃a niha Yahudi wangandrõ ena'õ mõi Ia wamadõhõ fõkhõ zawuyunia andrõ.
4Me larugi Yesu, ba la'andrõ sibai khõ-Nia ena'õ Itolo hõgõ zaradadu andrõ. Lamane khõ Yesu, "Sõkhi na mutolo niha andrõ, Ama,
5bõrõ me i'omasi'õ soida ba no ifasindro gosali khõma."
6Fao Yesu khõra we'amõi. Me arakha irugi nomo andrõ Yesu, ifatenge ndra awõnia hõgõ zaradadu andrõ wanguma'õ, "He Ama, bõi fakao'Õ we'amõi ba nomogu. Tenga sinangea Õ'ondrasi nomogu we'amõi khõgu.
7Ya'odo samõsa lõ barani mamalukhaisi Ya'ugõ. Abõlõ sõkhi na Õw̃a'õ manõ wehede ba dõhõ dania zawuyugu andrõ.
8Ya'odo manõ u'o'õ wareta zi so yaw̃agu, ba saradadu si so tougu gõi ba si lõ tola lõ la'o'õ ligu. Na ufatenge samõsa zaradadu tougu andrõ wanguma'õ, 'Ae'e!' ba mofanõ ia; ba na uw̃a'õ ba zaradadu bõ'õ, 'Aine ba da'e!' ba mõi ia. Ba na uw̃a'õ ba zawuyugu, 'Fazõkhi da'e!' ba maoso ia ifazõkhi."
9Ahõlihõli dõdõ Yesu wamondrongo da'õ. Ifakhõlõ Ia ba Imane ba niha sato solo'õ Ya'ia, "Fondrege niha andre. Lõ nisõndra-Gu ba gotalua niha Gizera'eli sokhõ famati si mane famati niha andre!"
10Me mangawuli niha nifatenge andrõ ba nomo hõgõ zaradadu, ba no dõhõ wõkhõ zawuyu andrõ.
11Lõ ara aefa da'õ, mõi Yesu ba mbanua Na'i. Fao khõ-Nia ndra nifahaõ-Nia awõ niha sato.
12Me ahatõ Yesu ba zinga mbawa gõli mbanua, so niha samasao si mate baero mbanua. Si mate andrõ ono matua, ono lakha mbanua, ha ya'ia nono ninania. Ato zowanua si fao khõ lakha mbanua andrõ.
13Me I'ila ndra alawe andrõ Yesu, ahakhõ dõdõ-Nia ba Imane, "Bõi e'e, Ina!"
14Aefa da'õ Ihatõ'õ Ia Yesu ba Ibabaya hasi zi mate andrõ. Ba labatogõ ira samahea hasi. Imane Yesu, "He ono matua, Uw̃a'õ khõu faoso!"
15Ba maoso nono matua si mate andrõ ilau mudadao, ba ibõrõtaigõ muhede. Aefa da'õ ibe'e khõ ninania nono andrõ Yesu.
16Ba fefu niha oi ihawui fa'ata'u ba ibõrõtaigõ lasuno Lowalangi. Lamane, "No tohare ba gotaluada Zama'ele'õ sebua! No mõi Lowalangi ba wangorifi banua-Nia!"
17Ba tehõngõ duria Yesu ba zi sagõrõ Yudea awõ ba mbanua si fasui.
18La'ombakha'õ khõ Yohane fefu zalua andrõ ira nifahaõnia. Ba ikaoni Yohane darua ndra nifahaõnia.
19Ifatenge ira khõ Zo'aya Yesu ba wanofu, "Hadia Ya'ugõ Ama, zi tohare andrõ molo'õ amabu'ula li Lowalangi, ma zui mabaloi niha bõ'õ?"
20Ba mõi khõ Yesu nifahaõ Yohane si darua andrõ lamane khõ-Nia, "Nifatenge Yohane Samayagõ Idanõ ndra'aga ba wanofu khõ-U Ama, hadia Ya'ugõ niha si tohare andrõ molo'õ amabu'ula li Lowalangi, ma zui mabaloi niha bõ'õ?"
21Faudu ba ginõtõ da'õ ato niha sofõkhõ nifadõhõ Yesu moroi ba wõkhõra. Ifofanõ wa'abõlõ zi lõ sõkhi, ba ato niha sau'a zangila niha.
22Itema lira Yesu, Imane, "Mifuli ami khõ Yohane ba mi'ombakha'õ khõnia hadia ni'ila awõ nirongomi: ifuli la'ila niha sau'a, tola mowaõwaõ zombuyumbuyu, dõhõ zobou auri, larongo li niha safiso, te'orifi mangawuli zi no mate ba te'ombakha'õ Duria Somuso Dõdõ ba niha si numana.
23Ya'ahowu niha si lõ fatuwu Ndra'o."
24Me no mofanõ dengetenge Yohane andrõ, Ibõrõtaigõ fahuhuo Yesu ba niha sato sanandrõsa khõ Yohane, Imane, "Na mõi ami khõ Yohane ba danõ si mate, hadia nifaigimi ba da'õ? Hadia du'u nifaheu nangi?
25Hadia nifaigimi na mõi ami ba da'õ? Hadia niha samake nukha si sõkhi? Hiza, niha sonukha si manõ awõ niha si sõkhi fa'auri so ba nomo razo!
26Tobali, hadia nifaigimi na mõi ami baero? Hadia ba wamaigi sama'ele'õ? Atulõ, tõra na'i moroi ba zama'ele'õ.
27Yohane andrõ niw̃a'õ ba ayati Mbuku Ni'amoni'õ, me imane, 'Ya'e dengetenge-Gu,' Iw̃a'õ Lowalangi, 'Ufatenge ia ofõna moroi khõ-U ba wamokai lala khõ-U!'"
28Inõnõ wanguma'õ Yesu, "Mitõngõni da'e, samõsa lõ sabõlõ ebua moroi khõ Yohane Samayagõ Idanõ andrõ. Ba hiza niha fondrege zide'ide ba mbanua Lowalangi, ba no abõlõ ebua moroi khõ Yohane Samayagõ Idanõ."
29Fefu niha -- fao ndra sanema beo -- no oi larongo niw̃a'õ Yesu andrõ; ya'ira zi no molo'õ oroisa Lowalangi ba somasi na ibayagõ idanõ ira Yohane.
30Ba hiza ndra Farizai'o awõ ndra sangila amakhoita, lõ omasi latema nifakhoi dõdõ Lowalangi andrõ ba wa'aurira. Lõ omasi ira na ibayagõ idanõ ira Yohane.
31Ifuli fahuhuo Yesu. Imane, "Hadia Ube'e famaedo niha ba gõtõ andre? Si mane hadia ira?
32Hulõ ndraono si dadao ba fasa; so õsa ba gotaluara zi'ao ba nawõra tanõ bõ'õ, 'Malau zinunõ fa'omuso dõdõ khõmi, ba lõ manari ami! Malau zinunõ ba zi mate ba lõ omasi ami me'e!'
33Tohare Yohane Samayagõ Idanõ -- fuasõ ia ba lõ ibadu nagu -- ba mimane, 'Niha nira'u fa'abõlõ zi lõ sõkhi ia!'
34Ba tohare Nono Niha -- manga ba mamadu -- hadia ia ba mimane, 'Faigi atõ Niha andrõ! Solu'alu'a, simabu, awõ-Nia zanema beo ba niha sebua horõ!'
35Ba hew̃a'ae si manõ oroma wa'atuatua Lowalangi ba niha fefu sanema Ya'ia."
36So samõsa Warizai'o, Simoni dõinia. Ikaoni manga Yesu ba nomonia. Mõi Yesu ba nomonia ba manga Ia ba da'õ.
37Ba mbanua da'õ so samõsa ndra alawe sebua horõ. Me irongo manga Yesu ba nomo Warizai'o andrõ ba tohare ia, i'ohe sambua mbulibuli so'õsi fanikha samohua.
38Muzizio ia furi Yesu ba gahe-Nia ba me'e ia fao wa ibasõi gahe Yesu taw̃a hõrõnia. Aefa da'õ i'osi gahe Yesu faoma bunia, i'ago gahe ba ibayoini fanikha samohua.
39Me i'ila da'õ Farizai'o sogaoni Yesu wemanga, imane tõdõnia, "Na sindruhu sama'ele'õ niha andre, tatu I'ila haniha ndra alawe andrõ sombambaya Ya'ia, wa ira alawe sebua horõ!"
40Imane Yesu khõ Zimoni, "He Simoni, so sambalõ zomasi-Do Uw̃a'õ khõu." Itema li-Nia Simoni, "Hadia Guru, w̃a'õ manõ."
41Imane Yesu, "So darua zo'õmõ ba niha same'e nifalali kefe. Mo'õmõ zi samõsa lima ngaotu rufia firõ, ba si samõsa lima wulu rufia firõ.
42Darua manõ ira tebai labu'a gõmõra andrõ. Bõrõ da'õ maoso niha same'e nifalali kefe andrõ, ibe'e saohagõlõnia gõmõra. Bõrõ da'õ, haniha ba gotalua zi darua andrõ zabõlõ mangomasi'õ niha same'e nifalali kefe?"
43Itema linia Simoni, "Uw̃a'õ tõdõgu, niha sebua fo'õmõ andrõ!" Imane Yesu, "Atulõ zinõndrau."
44Ifaigi ndra alawe andrõ Yesu ba Imane khõ Zimoni, "Hadia, no õ'ila ndra alawe andrõ? Me tohare Ndra'o ba nomou, ba lõ idanõ nihõnagõu wanasai ahe-Gu; ba ira alawe andre no isasai gahe-Gu taw̃a hõrõnia, ba i'osi faoma bunia.
45Lõ õtema'õ Ndra'o faoma fa'agosa bawa, ba ira alawe andre lõ aetu'aetu i'ago gahe-Gu, i'otarai me so Ndra'o ba da'e.
46Lõ nibayoiniu fanikha hõgõ-Gu, ba ira alawe andre no ibayoini fanikha samohua gahe-Gu.
47Sindruhundruhu niw̃a'õ-Gu khõu: fa'omasinia sebua andrõ no tobali fangoroma wa no te'efa'õ khõnia horõ soya andrõ! Na mu'efa'õ horõ niha ha ma'ifu, ba ha gõi ma'ifu iforoma'õ dania wa'omasinia."
48Ba Imane Yesu khõ ndra alawe andrõ, "No te'efa'õ horõu."
49Faoma lamane khõ nawõra niha sowulo ba wemanga andrõ awõ Yesu, "Haniha niha andre wa tola gõi I'efa'õ horõ?"
50Ba Imane Yesu ba ndra alawe andrõ, "Famatimõ zangorifi ya'ugõ. Fuli'õ ya'ohahau dõdõu!"
Download Audio MP3 (Lukas 7):
Mobile (Low Quality) - CD (High Quality)
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel