1Me samuza luo Sabato, Itõrõ Yesu zinga kabu nagu. Me inõtõ da'õ, no olofo sibai ndra nifahaõ-Nia. Andrõ wa maoso ira lahalõ ngalai gandru ba la'a.
2Me la'ila ira Farizai'o da'õ, lasofu khõ Yesu, "Faigi! No lasawõ huku agama ira nifahaõ-Mõ. Lalau zi tebai mulau ba luo Sabato."
3Itema li Yesu, "Hadia lõ irai mibaso hadia nilau Dawido me olofo ia?
4Mõi ia bakha ba Nomo Lowalangi, ba i'a roti si no mube'e sumange khõ Lowalangi. Ba molo'õ huku agama niha Yehuda tebai la'a roti andrõ niha sato -- baero gere.
5Hadia, lõ irai gõi mibaso ba huku agama nibe'e Moze, wa ero'ero luo Sabato ira Ere sohalõw̃õ ba Nomo Zo'aya, lasawõ gamakhoita luo Sabato, ba lõ sa'atõ mube'e salara?
6Mitõngõni hadia niw̃a'õ andre: no so ba da'e zi tõra moroi ba Nomo Zo'aya.
7No musura ba Mbuku Ni'amoni'õ: fa'ahakhõ dõdõ zomasi Ndra'o, tenga sumange urifõ. Na aboto ba dõdõmi niw̃a'õ andrõ, tatu lõ mibe'e mosala zi lõ sala.
8Bõrõ me Ono Niha andrõ ba no So'aya sokhõ luo Sabato."
9Irõi niha andrõ Yesu mõi Ia ba gosali.
10Ba da'õ so niha si mate dambai tanga. So zomasi mangalani Yesu, lasofu khõ-Nia, "Hadia tola mamadõhõ fõkhõ ba luo Sabato?"
11Itema li Yesu, "Na so ba gotaluami zokhõ biribiri, ba na aekhu mbiribiri andrõ ba dõgi ba luo Sabato, hadia lõ idõni yaw̃a mbiribiri andrõ moroi ba dõgi?
12Tatu abõlõ ebua mbõli niha moroi ba mbiribiri! Eluahania, tola mutolo niha ba luo Sabato."
13Aefa da'õ Imane Yesu ba niha si mate dambai tanga andrõ, "Oro'õ dangau." I'oro'õ dangania niha andrõ.
14Ba hiza, larõi gosali ira Farizai'o, mamagõlõ ira ba wamunu Yesu.
15Aboto ba dõdõ Yesu wa omasi ndra Farizai'o andrõ wolau khõ-Nia si lõ sõkhi. Bõrõ da'õ mofanõ Yesu ba ato niha solo'õ Ya'ia. Ba Ifadõhõ fefu zofõkhõ.
16Awõ wa Iw̃a'õ khõra bõi la'ombakha'õ da'õ ba niha bõ'õ.
17Ba zi manõ alua niw̃a'õ Lowalangi nifa'ema Yesaya sama'ele'õ,
18"Da'e dengetenge-Gu si no Utuyu, ni'omasi'õ-Gu ba si faudu ba dõdõ-Gu. Ube'e khõ-Nia Geheha-Gu, ba Ya'ia dania zanuriaigõ fa'atulõ-Gu ba soi fefu.
19Lõ mu'ao Ia ba lõ gõi fasoso, lõ I'ebua'õ li-Nia ba lala sebua.
20Lõ Ifatõ lewuõ si no aleu, lõ Ibunu wandru sanimbonimbo. Fasõndra Ia irugi alua wa'atulõ,
21ba fefu soi manõtõna khõ-Nia."
22Aefa da'õ so zolohe khõ Yesu niha sau'a ba si lõ hede. No i'u'uni ia fa'abõlõ zi lõ sõkhi. Ifadõhõ ia Yesu irege tola fahuhuo ba tola i'ila niha.
23Oi ahõli dõdõ niha sato ba lamane, "Te Ya'ia Nono Dawido andrõ si no mufabu'u?"
24Me larongo da'õ ira Farizai'o, ba latema li wanguma'õ, "Ifofanõ wa'abõlõ zi lõ sõkhi niha da'e, bõrõ me no ibe'e khõ-Nia wa'abõlõ Belesebu."
25I'ila Yesu gera'era dõdõ ndra Farizai'o andrõ. Andrõ wa Imane khõra, "Na no mango'ongo'oto niha ba zi sambua soi, ba lõ fa'anau gõlõ soi da'õ. Sambua mbanua ba ma fongambatõ sadudu si fa'emali khõ nawõra, lõ ara tekiko.
26Si manõ gõi ba gamatõrõw̃a Gafõkha na ifofanõ zi sambawa awõnia si sambawa, ba no fabali ira, ba lõ ara tõ adudu.
27Mimane, tola Ufofanõ wa'abõlõ zi lõ sõkhi bõrõ me no ibe'e khõ-Gu wa'abõlõ Belesebu. Na si manõ, heza moroi latema wa'abõlõ solo'õ khõmi ba wamofanõ fa'abõlõ zi lõ sõkhi? Solo'õ ya'ami andrõ zangoroma wa lõ duhu niw̃a'õmi!
28Eheha Lowalangi andrõ zame'e khõ-Gu fa'abõlõ ba wamofanõ fa'abõlõ zi lõ sõkhi. Eluahania, no Ibõrõtaigõ wamatõrõ-Nia Lowalangi ba gotaluami.
29Hewisa wa tola mõi niha ba nomo zabõlõ ba wo'anagõi ya'ia, na lõ ua mubõbõ zabõlõ andrõ? Awena dania tola irabu fefu harato andrõ.
30Niha si lõ fao khõ-Gu, ba no si fa'udu khõ-Gu. Ba niha si lõ mangozara awõ-Gu, ba no samazaewe!
31Bõrõ da'õ, ya aboto ba dõdõmi, na ifalua horõ niha ba iw̃a'õ wehede fango'aya, tola te'efa'õ khõnia!
32Ba na i'o'aya Geheha Lowalangi, ba tebai te'efa'õ khõnia! Na so niha sanguma'õ hadia ia ba wolaw̃a Ono Niha, ba tola te'efa'õ khõnia, ba na i'o'aya Geheha Lowalangi, ba tebai te'efa'õ khõnia, he iada'e ba he gõi dania ba luo safuria!"
33"Ba wanõndra bua si sõkhi, lõ tola lõ atabõ zinanõnia. Na lõ atabõ zinanõ ba lõ gõi sõkhi mbuania. Bõrõ me ba mbuania oroma na atabõ ba na lõ'õ zinanõ.
34Ya'ami niha si lõ sõkhi! Hewisa wa mi'ila miw̃a'õ zi sõkhi, me no si lõ sõkhi ami? Bõrõ me hadia zi so ba dõdõ da'õ zalua ba mbawa!
35Alua zi sõkhi ba dõdõ niha si sõkhi, bõrõ me no niha si sõkhi ia. Ba alua zi lõ sõkhi ba niha si lõ sõkhi, bõrõ me lõ sõkhi dõdõnia.
36Andrõ, mitõngõni da'e, ba Luo Safuria, ilu'i fefu wehede si lõ sõkhi niw̃a'õnia zamõsana.
37Bõrõ me fehedemi zamõsana ni'oguna'õ ba wangetu'õ hadia fasala ami ba ma lõ'õ."
38Aefa da'õ lamane ira sangila amakhoita awõ ndra Farizai'o, "He Guru, omasi ndra'aga ma'ila Õfazõkhi dandra sahõlihõli dõdõ."
39Itema li Yesu, "Ha wa'alõsõkhi ba ha wa'afaito niha ba ginõtõ andre!" "Mi'andrõ ena'õ Ufazõkhi dandra sahõlihõli dõdõ. Tebai! Lõ Ube'e khõmi dandra sahõlihõli dõdõ baero dandra andrõ salua khõ Yona.
40Tõlu ngaluo, tõlu mbongi so Yona ba dalu gi'a. Si manõ gõi Nono Niha, I'iagõ narõ danõ tõlu ngaluo tõlu mbongi.
41Ba Luo Safuria dania, maoso mbanua Niniwe fao niha ba gõtõ da'e mõi ba wanguhuku. No lafalalini gera'erara niha Niniwe me larongo huhuo Yona. Ba hiza, ba da'e no so zabõlõ ebua moroi khõ Yona!
42Dania ba Luo Safuria, maoso dania Ratu moroi Raya, sangadugõ ya'ami. Bõrõ me no irongo wamahaõ Zalomo satuatua andrõ, ba no mowaõwaõ ia moroi ba mbalõ danõ. Ba hiza ba da'e no so zabõlõ ebua moroi khõ Razo Salomo!"
43"Na irõi niha eheha si lõ sõkhi, ba idõrõdõrõi nahia sotufotufo ba wangalui nahia wolombase. Ba hiza lõ isõndra.
44Bõrõ da'õ imane eheha si lõ sõkhi andrõ, 'Mangawuli ndra'o ba nahiagu si no urõi.' Ba me irugi nomo andrõ, i'ila lõ õsi, no muhaogõ ba mufa'anõ.
45Tobali mõi geheha si lõ sõkhi andrõ awõ wa i'ohe dafitu geheha tanõ bõ'õ, sabõlõ lõ sõkhi moroi khõnia. Aefa da'õ mõi ira ba niha andrõ, torõi ira ba da'õ. Ba itugu abõlõ wa'alõsõkhi niha andrõ. Da'õ gõi dania zalua ba niha si lõ sõkhi ba ginõtõ da'e."
46Me fahuhuo na Yesu ba niha sato, tohare nina-Nia awõ ndra talifusõ-Nia. No muzizio ira baero, omasi ira fahuhuo khõ-Nia.
47Samõsa ba gotalua niha sato andrõ zanguma'õ khõ Yesu, "He Ama! So baero nina-U awõ ndra talifusõ-U. Omasi ira fahuhuo khõ-U."
48Itema li Yesu, "Haniha nina-Gu? Ba haniha dalifusõ-Gu?"
49Ituturu ndra nifahaõ-Nia ba Imane, "Mifaigi, da'e nina-Gu ba ira talifusõ-Gu.
50Niha samalua somasi nama-Gu si so ba zorugo, da'õ dalifusõ-Gu matua ba talifusõ-Gu alawe awõ nina-Gu."
Download Audio MP3 (Matius 12):
Mobile (Low Quality) - CD (High Quality)
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel