Alkitab Mobile SABDA
[VER] : [NIAS]     [PL]  [PB] 
 <<  Roma 7 >> 

1He ya'ami ira talifusõgu! No aboto ba dõdõmi fefu huku. Tobali, aboto gõi ba dõdõmi fa'amokuaso huku ba zisamõsamõsa niha, ha gasagasa auri niha andrõ.

2Dumaduma, samõsa ndra alawe si so fo'omo, tefabõbõ molo'õ huku ia khõ wo'omonia gasagasa auri wo'omonia andrõ. Na mate wo'omonia, aefa ndra alawe andrõ moroi ba huku samõbõ ya'ia khõ wo'omonia.

3Na orudu ndra alawe andrõ ba ndra matua bõ'õ me auri na wo'omonia, ba lafotõi sohorõ ndra alawe andrõ. Ba na no mate wo'omonia, ba molo'õ huku, lõ tabitabi ndra alawe andrõ. Ba na mangowalu ia ba ndra matua bõ'õ, lõ law̃a'õ sohorõ ia.

4Si manõ gõi ami, ya'ami ira talifusõgu. No mate ami ba huku agama Yahudi, bõrõ me no ha sambua ami ba mboto Keriso si no muforõfa, ba tobali tana khõ-Nia ami, si no mu'orifi moroi ba wa'amate. Te'orifi Ia moroi ba wa'amate ena'õ moguna ita khõ Lowalangi ba wa'aurida.

5Bõrõ me mbõrõta, auri ita molo'õ amuata wa'aniha. Me inõtõ da'õ, omasiõ dõdõ ba horõ, si tumbu bõrõ me so huku agama, zamatõrõ fa'aurida. Da'õ mbõrõ wa talau hadia ia zolohe ba wa'amate.

6Ba hiza, iada'e lõ tofesu ita ba huku agama Yahudi. No mate ita ba huku andrõ samatõrõ ya'ita mbõrõta. Tebai sa'ae mõi ita enoni ba lala si no ara, molo'õ huku nisura. Mõi ita enoni iada'e ba lala si bohou ni'oroma'õ Geheha Lowalangi khõda.

7Na si manõ, ba hadia zi tola taw̃a'õ? Hadia, lõ sõkhi huku agama Yahudi? Tatu tenga! Ba hiza, huku andrõ zamahaõ ya'o sanandrõsa ba horõ. Lõ u'ila hadia wa'olu'alu'a andrõ na lõ imane huku agama, "Bõi olu'alu'a ami."

8Bõrõ huku agama, wa so ginõtõ ba horõ wamatumbu'õ isõ'isõ dõdõ soya ngawalõ ba wa'olu'alu'a bakha ba dõdõgu; bõrõ na lõ huku agama, no si mate horõ andrõ.

9Lõ huku agama me auri ndra'o mbõrõta. Ba me tohare huku agama andrõ, ifuli auri zui horõ,

10ba mate ndra'odo. Ohitõ dõdõ ba mbõrõta, wa huku agama andrõ zame'e fa'auri, ba hiza no solohe fa'amate khõgu.

11Bõrõ huku agama andrõ, wa so ginõtõ ba horõ wolimo ya'odo; ba ibunu ndra'odo.

12Soroi Lowalangi huku agama andrõ, ba dozi fareta bakha ba huku andrõ soroi Lowalangi, tobali atulõ ba sõkhi.

13Tobali, hadia si sõkhi andrõ zolohe fa'amate khõgu? Tatu tenga! Horõ zolohe fa'amate andrõ. I'a'asogõ khõgu wa'amate horõ andrõ, i'odela zi sõkhi, ena'õ oroma sibai gamuata horõ. Ba goroisa Lowalangi te'oroma'õ wa'alõsõkhi horõ andrõ.

14No ta'ila wa moroi ba Geheha Lowalangi huku agama Yahudi andrõ; ba hiza, no niha si tebai ndra'odo. No te'amawa ndra'odo tobali sawuyu horõ.

15Lõ aboto ba dõdõgu nilaugu. Ngawalõ zomasido ulau, lõ ufalua; ba hiza si lõ omasido andrõ nilaugu.

16Ba na ulau zi lõ faudu ba zomasido andrõ, eluahania ufaduhu'õ wa sõkhi huku agama Yahudi andrõ.

17Tobali, tenga ya'o sindruhunia zolau da'õ, no horõ andrõ samatõrõ ya'odo.

18Aboto ba dõdõgu wa ma'ifu lõ si sõkhi ba khõgu, ba gamuatagu fa'aniha. Bõrõ omasido wamalua si sõkhi, ba hiza no tebai ndra'o wamalua ya'ia.

19Lõ nilaugu si sõkhi somasi ndra'o ufalua; hiza, no ulau ngawalõ zi lõ sõkhi, si lõ omasido ulau.

20Na ulau ngawalõ zi lõ omasi ndra'o ufalua, eluahania tenga ya'o zamalua da'õ, no horõ andrõ samatõrõ ya'o.

21Tobali, uhalõ rahurahu wa huku andre mbõrõ: ya'ia na omasido ulau zi sõkhi, ba ha si lõ sõkhi manõ zi so khõgu.

22Omasi dõdõgu goroisa Lowalangi,

23ba hiza aboto ba dõdõgu wa so huku bõ'õ zabõlõ mamatõrõ ya'o -- ya'ia huku si lõ faudu ba huku nifaduhu'õ gera'eragu. Da'õ mbõrõ wa tofesu ndra'o ba huku horõ samatõrõ fa'aurigu.

24Si mane zalua khõgu: u'o'õ huku Lowalangi faoma era'eragu, ba hiza, fi'i wa'anihagu zondrõnia'õ ya'o barõ gamatõrõw̃a horõ. Niha si tekiko ndra'odo andre! Haniha zomasi mangorifi ya'o moroi ba mboto solohe ya'o ba wa'amate andre? U'andrõ saohagõlõ khõ Lowalangi! Omasi Ia I'orifi ndra'o ba khõ Yesu Keriso andrõ.

25(7:24)



Download Audio MP3 (Roma 7):
Mobile (Low Quality) - CD (High Quality)

 <<  Roma 7 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel