Alkitab Mobile SABDA
[VER] : [NIAS]     [PL]  [PB] 
 <<  Wahyu 11 >> 

1Me no aefa da'õ ba labe'e khõgu sandroto geu si hulõ zi'o ni'oguna'õ fanu'a, ba lamane khõgu, "Ae su'a Nomo Lowalangi andrõ awõ naha wame'e sumange. Ba erai ha'wa'ato niha sangalulu.

2Ba bõi su'a golayama tanõ baero Nomo Lowalangi andrõ, bõrõ me no mube'e da'õ ba niha si lõ saboto ba dõdõ So'aya. Lahundrahundra dania mbanua ni'amoni'õ andrõ õfa wulu a rua waw̃a wa'ara.

3Ba Ufatenge dania darua zamaduhu'õ andrõ khõ-Gu samake nukha ba wa'abu dõdõ, ba la'ombakha'õ dania duria Lowalangi andrõ saribu a dua ngaotu a õnõ ngafulu ngaluo wa'ara."

4Dombua zamaduhu'õ andrõ no si dua nga'eu dõla zaitu ba si dua rozi ahe wandru si so fõna Zo'aya õlia ulidanõ.

5Na so niha sanandraigõ wamalua si lõ sõkhi khõra, ba moroi ba mbawara mõi baero galitõ samakiko si fa'udu khõra. Ba wolau si manõ, dozi niha somasi mamakao ya'ira tebunu dania.

6So khõra wa'abõlõ ba wondruhõ banua si yaw̃a ena'õ bõi aekhu ba danõ deu sagõtõ fangombakha'õra turia soroi Lowalangi andrõ. So gõi khõra wa'abõlõ ba nungo nidanõ fefu, ba wombali'õ do nidanõ. Ba so gõi khõra wa'abõlõ ba wamõzi ulidanõ ba ngawalõ wamakao fefu, gofu hawa'ara zomasi ira lafalua.

7Ba me awai la'ombakha'õ duria andrõ khõra, ba urifõ si mõi baero moroi ba mbawa danõ fa'amate andrõ zolaw̃a ya'ira. Ba mõna dania ia awõ wa ibunu ira.

8Ba amatelara dania ba tosake ba lala sebua ba mbanua sebua, ba niforõfa So'aya ya'ita. Tõi mbanua andrõ ya'ia Zodoma ba ma Miserai.

9Ba la'ila dania mbotora andrõ niha moroi ba soi fefu, iwa, li, ba mado fefu, tõlu ngaluo a matonga wa'ara, ba lõ latehegõ niko'o mbotora andrõ.

10Ba omuso dõdõ dania zowanua ba gulidanõ ba wa'amate zamaduhu'õ andrõ si darua. La'owuawua'õ dõdõra ba faoma lafa'ohe'õ khõ nawõra, bõrõ me sama'ele'õ andrõ si darua no oya la'a'asogõ wamakao ba niha gulidanõ fefu.

11Me no aefa zi tõlu ngaluo a matonga, ba tohare hanuhanu sauri soroi Lowalangi ba mõi bakha ba zama'ele'õ andrõ si darua. Ba maoso ira muzizio, irege fefu niha sangi'ila ya'ira ata'u sibai.

12Aefa da'õ ba larongo li ira sama'ele'õ andrõ si darua sogaoni ya'ira moroi ba zorugo, "Mi'aine yaw̃a ba da'e!" Ba fõna hõrõ zi fa'udu khõra andrõ, mõi ira yaw̃a ba zorugo, ibalugõ ira lawuo.

13Ba ginõtõ da'õ alua ndruru danõ sabõlõbõlõ. Sambua ni'ofulu moroi ba mbanua andrõ adudu, ba fitu ngahõnõ niha si mate bõrõ ndruru danõ andrõ. Ba niha tanõ bõ'õnia ba ata'u sibai, ba awena lasuno wa'ebua Lowalangi ba zorugo.

14Ba fa'afõkhõ si dua andrõ no numalõ. Ba hiza! Fa'afõkhõ si tõlu andrõ lõ ara tõ tohare.

15Aefa da'õ ifoli dorofenia mala'ika si fitu, ba terongo li sabõlõbõlõ sibai ba zorugo, imane, "Fa'abõlõ ba wamatõrõ ulidanõ iada'e no so ba danga Zo'aya ya'ita ba Razo Sangorifi si no Ifabu'u. Mamatõrõ dania Ia sagõtõ fa'ara!"

16Ba sondrõnia'õ andrõ si dua wulu a õfa si dadao ba dadaomara fõna Lowalangi, latuhi danõ ba lafalõgu tou ira ba wangalulu khõ Lowalangi.

17Lamane, "So'aya, Lowalangi Sabõlõ, si so, ba si no so! Ma'andrõ saohagõlõ khõ-U me no Õ'oguna'õ wa'abõlõ-Mõ andrõ sebua, ba no Õbõrõtaigõ wamatõrõ!

18Aukhu dõdõ zi lõ mangila So'aya, bõrõ me no irugi inõtõnia Õfalua wõnu-Mõ, ba no inõtõnia gõi Õfalua wanguhuku ba niha si no mate. Da'e ginõtõnia ba wame'e bõli gõlõ khõndra sawuyu-Mõ andrõ, ira sama'ele'õ, awõ ba mbanua-U andrõ, ya'ia niha sangalulu khõ-U fefu, sebua ba he side'ide. Da'e ginõtõnia ba wamakiko ya'ira samakiko ulidanõ!"

19Ba tebokai Nomo Lowalangi ba zorugo, ba oroma Dawõla Gamabu'ula Li andrõ. Ba alua gari mbanua si fafalifali ba li we'ugu'ugu mbanua, so'agau'agau awõ ndruru danõ ba teu kara sabõlõbõlõ.



Download Audio MP3 (Wahyu 11):
Mobile (Low Quality) - CD (High Quality)

 <<  Wahyu 11 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel