1Aefa da'õ ba u'ila! Hiza Nono Mbiribiri andrõ no zumizio ba Hili Ziona. Ba otu a õfa wulu a õfa ngahõnõ nawõnia. Si no musura ba gangango tõi-Nia ba tõi Namania.
2Ba urongo li moroi ba mbanua si yaw̃a sigosogoso hulõ li nidanõ sebua salaw̃a lulu ba hulõ we'ugu'ugu mbanua sabõlõbõlõ. Fa'aterongo li andrõ hulõ li ngawalõ zoli moroi ba zolau biola na idekha kezafi si so ba dangania.
3Ba fõna dadaoma andrõ, ba saliw̃aliw̃a ba danõ si õfa nga'eu awõ ndra sondrõnia'õ si fasui dadaoma andrõ, ba niha si otu a õfa wulu a õfa ngahõnõ wa'ato, la'anunõisi sambua zinunõ si bohou. Ba samõsa gõi lõ si tola mangila sinunõ andrõ baero niha si otu a õfa wulu a õfa ngahõnõ fa'ato. Ya'ira niha si no mu'efa'õ moroi ba gulidanõ.
4Ya'ira no niha si lõ si fabaya hadia ia, bõrõ me lõ sorudu ira ba ndra alawe; no ohauhau ira hulõ nono alawe. Ba ya'ira zolo'õ Ono Mbiribiri andrõ gofu heza manõ mõi Ia. Ba gotalua soi niha fefu, ya'ira niha si no mu'efa'õ nibe'e sumange si fõfõna khõ Lowalangi ba khõ Nono Mbiribiri andrõ.
5Lõ irai molau faya ira ba ma'ifu gõi lõ hadõi sinegu khõra.
6Ba u'ila mala'ika tanõ bõ'õ si hombo ba dalu mbanua si yaw̃a. I'ohe duria sanandrõsa ba duria Somuso Dõdõ si lõ tebulõ nifa'ema ba niha ba gulidanõ; ba ngawalõ soi fefu, banua, li, ba negara.
7Ba muhede mala'ika andrõ ebua linia, "Mi'ata'ufi Lowalangi, ba misuno wa'ebua-Nia! Bõrõ me no irugi inõtõ khõ Lowalangi ba wanguhuku niha. Mi'angalulu khõ-Nia khõ zombõi banua si yaw̃a, ulidanõ, asi ba umbu nidanõ ma'afefu!"
8Ba mala'ika numero dua andrõ i'o'õ mala'ika si fõfõna fao wa iw̃a'õ, "No adudu! No adudu mbanua Mbabilonia andrõ! Si no mombali'õ mabu agu fefu soi -- ya'ia nagu wohorõnia andrõ!"
9Samõsa mala'ika numero tõlu solo'õ mala'ika si darua andrõ, fao wa iw̃a'õ ebua linia, "Niha sangalulu ba gurifõ andrõ awõ ba nadunia, ba si so tandra gurifõ andrõ ba gangangonia ba ma ba dangania,
10ibadu dania nagu Lowalangi niha da'õ, ya'ia nagu wõnu-Nia si no Ifazõkhi bakha ba mako wõnu-Nia andrõ, ba ma'ifu gõi lõ mu'alõsi! Ba tefakao dania fefu niha bakha ba galitõ ba talõ balera fõna mala'ika ni'amoni'õ ba fõna Nono Mbiribiri andrõ.
11Simbo galitõ samakao niha andrõ mõi miyaw̃a dania lõ mamalõ sagõtõ fa'ara. Ba bongi ma'õkhõ lõ tebatobato tefakao ira, ya'ira sangalulu khõ gurifõ andrõ ba famaedonia, ba fefu niha si so tandra dõi gurifõ andrõ."
12Ba da'e, Banua Lowalangi solo'õ amakhoita Lowalangi ba si lõ farõi khõ Yesu, moguna so wanaha tõdõ.
13Aefa da'õ ba urongo li moroi ba zorugo sanguma'õ, "Sura da'e: Ya'ahowu niha si no mate i'otarai da'e fatua enoni Zo'aya nasa ira!" "Sindruhu!" iw̃a'õ Eheha Lowalangi. "Molombase sa'ae dania ira, moroi ba halõw̃õ sabe'e, bõrõ me bua halõw̃õra andrõ lõ aetu faofao khõra."
14Aefa da'õ ba u'ila, oroma lawuo safusi. Ba ba dete lawuo andrõ ba so zi dadao samõsa hulõ niha. So ba hõgõ-Nia sambua dakula ana'a, ba so ba danga-Nia sara zabi satarõ.
15Aefa da'õ so samõsa mala'ika tanõ bõ'õ si otarai Nomo Lowalangi. Ebua linia, mu'ao Ia khõ zi dadao andrõ ba dete lawuo, "Fatõrõ zabi-Mõ andrõ ba amasi iada'e, bõrõ me no irugi inõtõ ba wamasi; no basitõ gulidanõ!"
16Ba Ifatõrõ zabi-Nia ba gulidanõ si dadao andrõ yaw̃a ba dete lawuo, ba tebasi gulidanõ.
17Aefa da'õ ba u'ila samõsa mala'ika tanõ bõ'õ nasa si otarai Nomo Lowalangi ba zorugo. No gõi so ba dangania sara zabi satarõ.
18Ba me no aefa da'õ, ba so samõsa mala'ika tanõ bõ'õ, samatõrõ alitõ, si otarai naha wame'e sumange. Ba ebua linia, mu'ao ia khõ mala'ika si so ba danga sabi satarõ andrõ, "Fatõrõ zabimõ andrõ ba taba mbua dõla nagu andrõ ba gulidanõ, me no a'oi asoso mbuania!"
19Ba ifatõrõ zabinia mala'ika andrõ ba gulidanõ, itaba mbua nagu andrõ moroi ba dõla, itibo'õ bakha ba wolazi wõnu sebua andrõ khõ Lowalangi.
20Ba fefu mbua nagu andrõ telazi baero mbanua, ba moroi ba wolazi andrõ mangele ndro hulõ molõ, tõlu ngaotu kilomete wa'arõu, ba arakhagõ dua mete wa'abakha.
Download Audio MP3 (Wahyu 14):
Mobile (Low Quality) - CD (High Quality)
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel