1Ba me no aefa da'õ ba u'ila samõsa mala'ika tanõ bõ'õ si mõi mitou moroi ba zorugo. So khõnia wa'abõlõ sebua, ba tobali mohaga gulidanõ ma'asagõrõ ba lakhõminia.
2Ba mu'ao ia, wa'ebua linia, "No adudu ndra alawe andrõ! No adudu Mbabilonia sebua andrõ! Iada'e no tobali ia naha gafõkha ba eheha si lõ sõkhi. Auri khõnia bakha ngawalõ wofo sanuzu dõdõ niha ba sogoro niha.
3Fefu soi no oi labadu nagu wohorõnia andrõ. Ba no lalau mohorõ ira razo ba gulidanõ khõnia, ba fefu zaniaga ba gulidanõ no oi tobali mo'okhõta bõrõ hokhania andrõ si lõ mu'ila mufatõrõ."
4Ba urongo li bõ'õ moroi ba zorugo sanguma'õ, "Mi'ae baero, ya'ami banua-Gu! Mi'ae baero mirõi ia! Bõi mi'o'õ horõnia, ba folu'i hukunia!
5Bõrõ me no falawu horõnia irugi mbanua si yaw̃a, awõ wa no Itõrõ tõdõ Lowalangi wa'alõsõkhinia.
6Milau khõnia zi mane si no ilau khõmi; misulõni khõnia dua winaeta ba zi no ilau fefu. Fo'õsi makonia mendrua fa'abe'e moroi ba nibadu si no ihõna khõmi.
7Be'e khõnia wamakao ba fa'abu dõdõ ndrohundrohu lakhõmi ba fa'akayo nibe'enia khõnia samõsa. Bõrõ me lõ mamalõ iw̃a'õ tõdõnia, 'Ya'odo andre ratu, samatõrõ! Tenga lakha mbanua ndra'odo; lõ dania falukha ndra'odo wa'abu dõdõ!'
8Bõrõ da'õ, bakha ba zi ma'õma'õkhõ manõ gõna dania ia famakao -- fõkhõ, fa'abu dõdõ, ba fa'olofo. Ba tekhozi dania ia ba galitõ, bõrõ me So'aya Lowalangi sabõlõ zanguhuku ya'ia andrõ."
9Ba la'e'esi awõ wa la'angenusi mbanua andrõ ira razo ba gulidanõ si fao ba wamalua horõ awõ hokha ndra alawe andrõ, na la'ila zimbo galitõ ba wamunu ya'ia.
10Ba muzizio dania ira moroi ba zarõu bõrõ me ata'u ira na gõna khõra wamakaonia andrõ. Lamane, "Alai, abõlõbõlõ sibai wanguhuku mbanua si tehõngõ andre -- banua Mbabilonia sabõlõ andrõ! Ha ba zi sambua za, no ifakiko ndra'ugõ fanguhukumõ andrõ!"
11Ba mege'ege ba abu dõdõ zaniaga ba gulidanõ gõi bõrõ ndra alawe andrõ, bõrõ me samõsa lõ hadõi sa'ae sowõli faniagara andrõ.
12Lõ hadõi sowõli ana'a, firõ, kara sebua bõli, ba manimani khõra; he gõi nukha lena, nukha sobowo doru, nukha soragi soyo si faruka saitõ, suto ba nukha soyo; fefu ngawalõ geu sabua fanõndra, gamagama moroi ba gaza, ba eu segebua bõli, bego, si'õli, ba kara sabe'e si takile;
13uli geu sami, fangami gõ, ba hadia ia nitunu samohua, emuri, ba kumõyõ; agu ba fanikha, hamo ba gandru; saw̃i ba biribiri, kudo ba kureta, sawuyu, ba noso niha gõi.
14Ba lamane saniaga ba ndra alawe andrõ, "Fefu zomasi ndra'ugõ õ'okhõgõ, no lõ hadõi sa'ae, ba fefu wa'akayo ba fa'asõkhi no taya sa'ae. Ba lõ manõ sa'ae õsõndra ia!"
15Ba fefu zaniaga si no tobali kayo bõrõ waniaga ba mbanua andrõ, ba musindro dania ira moroi ba zarõu, bõrõ me ata'u ira na gõna khõra wamakaonia andrõ. Mege'ege dania ira ba abu dõdõra,
16ba lamane, "Alai, abõlõbõlõ sibai wanguhuku mbanua si tehõngõ andre! Si to'õlõnia ifake nukha lena, nukha sobowo doru, ba nukha soyo; ba si to'õlõnia ba afõnu ia gamagama ana'a, kara sebua bõli, ba manimani!
17Ba hiza, ha ba zi sambua za manõ, no oi taya wa'akayonia andrõ fefu!" Ba durumudi fefu, awõ nõsi gõfa, ba ono gõfa, awõ niha sangalui ba nasi fefu, musindro ira moroi ba zarõu.
18Ba mu'ao'ao me la'ila zimbo galitõ sanunu banua andrõ. Ba lamane, "Lõ irai so mbanua bõ'õ si mane banua sebua andre!"
19Ba lahawui gawugawu hõgõra si tobali tandra wa'abu dõdõra, ba lalau mege'ege ba mu'ao, "Alai, abõlõbõlõ sibai wanguhuku banua sebua andre! Fa'akayonia no tobali fangakayo niha sokhõ kõfa ba nasi fefu! Ha ba zi sambua za, no oi taya fefu hadia ia khõnia!"
20He sorugo, omusoi'õ dõdõu ba wa'adudu mbanua andrõ! He banua Lowalangi, ira sinenge, awõ ndra sama'ele'õ, mi'omusoi'õ dõdõmi! Bõrõ me no ihuku ia Lowalangi si tobali fanulõni ngawalõ zi no ilau khõmi!
21Me no aefa da'õ, so samõsa mala'ika sabõlõ samazaw̃a sambua gowe -- si mane gowe zalaw̃a sebua sibai -- itibo'õ ba nasi awõ wa imane, "Si mane wa'atekiko dania Mbabilonia sebua andrõ irege lõ mu'ila ia sa'ae.
22Ba lõ sa'ae terongo dania ba khõmõ li ngawalõ wakake so li moroi ba zolau kezafi, niha sogonekhe manunõ, solau surune, ba samoli torofe. Ba samõsa gõi lõ sa'ae tesõndra duka hadia ia fefu ba da'õ, ba lõ sa'ae terongo li goko gara fogili gõi.
23Ba lõ sa'ae la'ila niha haga wandru ba khõmõ andrõ; ba lõ gõi sa'ae terongo wa'omuso dõdõ ba da'õ. Ira saniaga khõu ba no niha fondrege zalaw̃a ba gulidanõ, ba ba wa'atuatua wakelemusa õfelungu fefu soi ba gulidanõ!"
24Ba tehuku Mbabilonia andrõ bõrõ me bakha ba mbanua da'õ tesõndra ndro zama'ele'õ, awõ ndro mbanua Lowalangi -- do niha si no mubunu ba gulidanõ fefu.
Download Audio MP3 (Wahyu 18):
Mobile (Low Quality) - CD (High Quality)
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel