Alkitab Mobile SABDA
[VER] : [NIAS]     [PL]  [PB] 
 <<  Wahyu 6 >> 

1Me no aefa da'õ ba u'ila Ibokai dandro si fõfõna Ono Mbiribiri andrõ ba gotalua dandro andrõ si fitu. Ba urongo sageu ba gotalua zaliw̃aliw̃a ba danõ andrõ si õfa nga'eu sanguma'õ, "Aine!" Hulõ we'ugu'ugu mbanua linia.

2Ba u'ila, oroma sageu kudo safusi. Si fakudo yaw̃a khõnia no igogohe sambua wana sinali, ba tebe'e khõnia sambua dakula. Ba mofanõ ia si mane si mõna si mõi mamadõni fa'amõna.

3Aefa da'õ Ibokai dandro si dua Ono Mbiribiri andrõ, ba urongo zaliw̃aliw̃a ba danõ andrõ, numero dua, imane, "Aine!"

4Ba so sageu kudo bõ'õ si mõi baero, kudo da'õ no oyo sibai mbunia. Si fakudo yaw̃a khõnia ba tebe'e wa'abõlõ ba wanayaigõ fa'atulõ ba gulidanõ, ena'õ faoma labunu nawõra niha. Ba tebe'e khõnia sara wõda sebua.

5Aefa da'õ Ibokai dandro si tõlu Ono Mbiribiri andrõ. Ba urongo zaliw̃aliw̃a ba danõ, numero tõlu, imane, "Aine!" Ba u'ila, oroma sageu kudo saitõ, si fakudo yaw̃a khõnia no so ba dangania wali'era.

6Ba urongo zi hulõ li si'ao moroi ba gotalua zaliw̃aliw̃a ba danõ andrõ, si õfa nga'eu. Imane, "Sadumba fakhe gazi ma'õkhõ, ba tõlu dumba rigi gazi ma'õkhõ. Ba bõi mifakiko dõla zaitu ba kabu nagu!"

7Aefa da'õ Ibokai dandro si õfa Ono Mbiribiri andrõ. Ba urongo zaliw̃aliw̃a ba danõ, nomero õfa andrõ, imane, "Aine!"

8Ba ufaigi, ba oroma sageu kudo si no afusitõ. Ba tõi zi fakudo yaw̃a khõnia ba fa'amate. Moroi furi, i'o'õ ia ba wa'ahatõ banua wa'amate. Ba tebe'e khõra wamatõrõ zi sambua ni'o'õfa tanõ andre, ena'õ tola labubunu ba wasuwõta, ba lofo, ba wõkhõ w̃aba ba ba gurifõ safaito.

9Aefa da'õ Ibokai dandro si lima Ono Mbiribiri andrõ. Ba u'ila barõ naha wame'e sumange andrõ so noso niha si no mate nibunu, bõrõ me lõ farõi ira ba wanuriaigõ turia soroi Lowalangi.

10Ba mu'ao ira ebua li, "He So'aya Sabõlõ, ni'amoni'õ ba sindruhu! Hawa'ara tõ nasa awena Õfatõrõ huku ba zowanua ba gulidanõ, ba Õhuku ira me no labunuga?"

11Aefa da'õ ba tedozigõ ira wame'e baru safusi. Ba law̃a'õ khõra akha molombase ira ma'ifu tõ, irege no mo'ahonoa wa'ato nawõra si faoma ohitõ dõdõ khõ-U ba talifusõra nibunu dania si mane ya'ira.

12Aefa da'õ ba u'ila Ibokai dandro si õnõ andrõ Ono Mbiribiri. Ba alua ndruru danõ sabõlõbõlõ. Tobali aitõ luo si mane nukha saitõ si lõ sõkhi, tobali oyo mbaw̃a si mane do.

13Ba adorudoru ba danõ ndrõfi moroi ba mbanua si yaw̃a si mane bua ara sataha sadudu moroi ba dõlania ba ginõtõ ifadõgõ angi sabõlõbõlõ.

14Ba ataya mbanua si yaw̃a si mane karate nifagaõlõ ba fefu hili ba awu'a moroi ba nahiara.

15Ba razo ba gulidanõ, ira sagalaw̃a fetaro, bohalima zaradadu, so'ana'a, ba niha sabõlõ, ba niha bõ'õ fefu, he sawuyu ba he niha si no mu'efa'õ, labini'õ ira fefu ba dõgi, ba barõ gara.

16Ba mu'ao ira, ba hili awõ ba gara andrõ, lamane, "Milangõgõ ndra'aga! Balugõ ndra'aga moroi ba duduma hõrõ zi dadao yaw̃a ba dadaoma andrõ, ba moroi ba wõnu Nono Mbiribiri andrõ!

17Luo sebua andrõ no so, iada'e laduwagõ wõnura, ba samõsa lõ niha si tola fataha fõnara!"



Download Audio MP3 (Wahyu 6):
Mobile (Low Quality) - CD (High Quality)

 <<  Wahyu 6 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran